2 SAMUELU 14 - Tuvalu Revised Bible

Ko Taumafai a Ioapo ke Fakafoki mai a Apisaloma

1Ko iloa ne Ioapo i te Tupu ko Tavita ko oko eiloa i te masausau ki a Apisaloma.

2Tena ne uga ei tena fekau ki te fafine poto e tokotasi tela e nofo i Tekoa. I te okomaiga o te fafine tena, ne fai atu a ia ki ei penei, “Fai aka pela i a koe e tagi fanoanoa; pei ki ou gatu fanoanoa, kae sa selu tou ulu. Fai pela me se fafine ko leva ne tagi fanoanoa.

3Tena, ko fano ei koe ki te tupu o fai ki ei a muna konei ka fai atu ne au.” Tena ne fai atu ei ne Ioapo a pati e tau o fai ne ia.

4Ne fanatu te fafine ki te tupu, pūnou ifo ki lalo o fakaaloalo, kae fai atu penei, “Tou Malu, fesoasoani mai ki a au!”

5Ne fesili atu te tupu, “Se a te mea e manako koe ki ei?” Kae ne fai atu a ia penei, “Tou malu, au se fafine mativa fua, kae ko oti foki ne mate taku avaga.

6Tou malu, e isi ne aku tama e tokolua, kae i te aso e tasi ne fakakinau i koga e tu ei fatoaga, kae e seai se tino ke 'vae ne ia laua, tela ne mate eiloa te sua tino.

7Kae nei, tou malu, a oku kaiga katoa ko ita mai ki a au kae ko ma'nako ke avatu taku tama tagata ke tamate me ne tamate ne ia tena taina. Ka fai la e tamate ne latou taku tama tagata, ko tena uiga ko seai ei se tama tagata a aku. Ka tamate ne latou toku toe fakamoemoega, kae ka se ola foki te igoa o taku avaga.”

8Ne tali atu te tupu, “Foki ki tou fale, kae ka onoono faka'lei au ki te mea tena.”

9Muna a te fafine, “Tou Malu, so se mea e fai ne koe, ka ko te 'se e pakū eiloa ki luga i a au mo toku kaiga; a koe mo tou kaiga e se 'se i te mea tena.”

10Ne tali atu te tupu, “Kafai se tino e fanatu o fai koe, folafola mai ki a au, kae ka se toe fakalavelave ne ia koe.”

11Ne fai atu te fafine, “Tou Malu, fakamolemole, talo atu ki te Aliki tou Atua, me i te kaiga o oku tela e tau o taui ne ia te mate o taku tama ke se fai ne ia se mea e mate foki ei te sua tama a aku.”

Ne tali atu Tavita, “Au e tauto i te igoa o te Aliki ola, me e seai eiloa se mea e oko ki luga i tau tama.”

12Muna a te fafine, “Fakamolemole eiloa Tou 'Malu, talia mai ke toe fai atu taku toe fekau tenei.”

Ne tali atu Tavita, “Ko lei.”

13Muna a te fafine ki a Tavita, “Ai a ko fai ei ne koe se mea 'se pena ki tino o te Atua? E se talia ne koe tau tama tonu tela ne sola ke foki mai, tela la, ko taia koe i au muna kona ne fai mai ki a au.

14A tatou e 'mate katoa; a tatou e pela me ne vai e 'ligi ki luga i te laukele, kae se toe maua o fakamaopoopo. Ke oko ki te Atua, e se faka'foki mai ne ia a tino mate ki te ola nei, ka ko te tupu e mafai faeloa ne ia o sala se auala o fakafoki mai te tino ne sola.

15Tou Malu, a te pogai ne vau ei au o faipati atu ki a koe, me i tino e fakamatakutaku ne latou a au, tela la, ne mafaufau aka au ke faipati atu au ki a koe, mo te fakamoemoega me e fai eiloa ne koe te mea e manako au ki ei.

16Au ne mafaufau pelā i a koe ka fakalogo mai ki a au o fakasao au mai te tagata tela e taumafai o tamate taku tama tagata pela foki mo au, kae ko toese foki ei māua mai te fenua ne tuku mai ne te Atua ki ona tino.

172Samu 19.27 Tou malu, au ne mafaufau pela me ko tau muna e saogalemu ei toku olaga, me i te tupu e pela me se agelu a te Atua tela e mafai o faka'kese te mea 'lei mai te mea masei. A te Aliki tou Atua ke fakatasi atu ki a koe!”

18Ne tali atu te tupu, “Au ka fesili atu ki a koe, kae e tau o fakaasi mai ne koe te mea tonu ki a au.”

Muna a te fafine, “Tou Malu, 'sili mai so se fesili.”

19“E mata, Ko Ioapo ne fai ne ia koe ke vau o faipati mai ki a au pena?”

Ne tali atu te fafine, “Tou malu, au e tauto atu, me e seai eiloa se auala e mafai ei ne au o kalo tau fesili tena. E tonu, ko tau ofisa eiloa ko Ioapo ne fai mai te mea e tau o fai, mo pati e tau o faipati atu.

20Kae ne fai ne ia ko te mea ke faka'tonu faka'lei te fakalavelave tenei e tupu. Tou Malu, a koe e poto, e pela eiloa mo te agelu a te Atua, kae e iloa foki ne koe a mea katoa kola e 'tupu.”

21Fakamuli ifo, ko te tupu eiloa ko fai atu ki a Ioapo penei, “Ko oti ne iku i a au ke fai te mea ne manako koe ki ei. Fano la o puke mai Apisaloma.”

22Ne fakasiga ifo Ioapo i mua o Tavita mo te fakaaloalo, kae fai atu penei, “Tou Malu, a te Atua ke fakamanuia ne ia koe. Ko iloa nei ne au i a koe e fiafia mai ki a au, tena ko talia ei ne koe toku manakōga.”

23Tena, ne fanatu ei a Ioapo ki te fa'kai o Kesula o puke mai a Apisaloma ki Ielusalema.

24Ne fai te fakatonuga a te tupu i a Apisaloma e se tau o nofo i te palesi. Muna a ia, “Au se manako o kilo oku mata ki a Apisaloma.” Tena, ne nofo eiloa a Apisaloma i tena fale, seki fano eiloa ki mua o te tupu.

A Apisaloma ko Faka'lei mo Tavita

25E seai eiloa se tino i Isalaelu e takutakua i te gali pela mo Apisaloma; e seai eiloa se pona i tena foitino mai te ulu ke oko ki ona vae.

26Ko ia eiloa ko pūlāulu, kae e 'kati faeloa i tausaga takitasi, manafai ko to 'loa kae ko to 'mafa foki ki a ia. E tusa mo te lua kilokalame te 'mafa, e tusa mo te fua faka-te-malo.

27A Apisaloma e tokotolu ana tama tagata, kae tokotasi tena tama fafine e igoa ki a Tamala, se tamafine taulekaleka.

28E lua tausaga ne nofo ei a Apisaloma i Ielusalema kae seki matea eiloa ne ia a te tupu.

29Ne uga tena fekau ki a Ioapo, o fai ki ei ke fano o fai tena fekau ki te tupu; ka ko Ioapo e seki fanatu. Ne toe uga atu te fekau a Apisaloma, kae seki fanatu foki a Ioapo.

30Tena ne fai atu ei a Apisaloma ki ana tavini penei, “Kiloke, a te fatoaga a Ioapo e tu i tafa o taku fatoaga, kae e ola i ei a kalite. Olo o 'sunu.” Tena, ne olo atu a tavini kona, 'sunu ei te fatoaga a Ioapo.

31Ne fanatu Ioapo ki a Apisaloma kae fai atu penei, “Ai a ne sunu ei ne au tavini a taku fatoaga?”

32Ne tali atu Apisaloma, “I a koe ne ita ma vau i te uga atuga ne au taku fekau ke vau koe. Au ne manako ki a koe ke fano koe ki te tupu o fai ki ei aku muna konei: ‘Ai ā ne aumai ei au ki konei? E sili atu eiloa te lei moi ne nofo eiloa a au i Kesula.’ ” Ne faipati eiloa Apisaloma, muna a ia, “Au e manako ke fai'pati māua mo te tupu, kae kafai e 'se au, ko tamate la ei au ne ia.”

33Tena, ne fanatu a Ioapo ki te Tupu ko Tavita, o fai atu a muna a Apisaloma ki a ia. Ne uga te fekau a te tupu ki a Apisaloma ke fanatu. Ne fanatu Apisaloma, punou ifo ki te laukele i mua o te tupu, kae fakatalofa mai te tupu o sogi mai ki a ia.