SALAMO 41 - Tuvalu Revised Bible

Te Talo i Masaki

1Amutia a latou kola e saga ki tino mativa;

Me ka fesoasoani ki a latou a te Aliki i taimi e maua ei latou ne puapuaga.

2Ka puipui kae tausi faka'lei ne te Aliki olotou ola;

Ka fai ne ia a latou ke fiafia i te fenua;

Ka se tiakina ne ia a latou ki te malosi o olotou fili.

3A te Aliki ka fesoasoani ki a latou manafai e ma'saki a latou,

Kae toe fakafoki ne ia te malosi ki a latou.

4Ne fai ake au penei, “Toku Aliki, au ko oti ne agasala atu ki a koe;

Alofa mai ki a au, kae faka'lei ake toku masaki.”

5E fai muna ma'sei mai oku fili ki a au.

E ma'nako latou ke mate au, kae ke se toe masaua.

6A latou kola e o'mai o asiasi mai,

E se a'lofa; e fakaputu ne latou a tala ma'sei katoa e uiga ki a au,

Ko olo atu ei latou o tala atu i koga katoa.

7A tino katoa kola e takalialia ki a au,

E fakatau musumusu latou e uiga ki a au,

Kae mafau'fau latou ki mea e masei ei au.

8Olotou muna, “Ko oko eiloa i te malosi o tena masaki;

E se toetu ake eiloa a ia mai tena moega.”

9 Mata 26.23; Male 14.18; Luka 22.21; Ioa 13.18 E oko foki eiloa ki toku taugasoa pele,

Te tino tela e tafasili toku fakalagolago ki ei,

Te tino tela e kai fakatasi sale mo au, ko fai fili ki a au.

10Te Aliki, alofa mai ki a au, kae toe fakafoki mai toku malosi,

Kae ka toe taui atu ne au ki oku fili a mea ne fai ne latou ki a au.

11Ka se manumalo a latou i a au,

Ka iloa ei ne au i a koe e fiafia mai ki a au.

12Ke fesoasoani mai koe ki a au,

Me e fai ne au te mea tonu;

Tuku mai au ke nofo i ou mua ki te se gata mai.

13 Sala 106.48 Viki atu ki te Aliki, te Atua o Isalaelu!

Viki atu ki a ia nei, ke oko atu eiloa ki te se gata mai!

Amene! Amene!