2 KOLINITO 2 - Tuvalu Revised Bible

1Ko oti ne fuafua ne au ke se toe fanatu saku malaga ki a koutou, i te mea mana fakafi'ta ei koutou.

2Me kafai ne fai ne au koutou ke 'mae otou loto, e seai la se tino o koutou e mafai ne ia o fakafiafia toku loto.

3Tena te pogai ne tusi atu ei ne au te tusi tena ki a koutou. Au e se loto ke fanatu au ki a koutou i te mea manafai mo mea e fi'ta ei toku mafaufau ne fai ne tino kola e 'tau o fakafiafia mai ki a au. E talitonu toku loto me kafai e fiafia au, e fia'fia foki koutou.

4Au ne tusi atu muamua ki a koutou i te fi'ta mo te mafaufau se toka, e pela foki mo loimata ma'ligi. Ne seki fai ne au a te mea nei ke fanoa'noa ei koutou, kae ke fai mo mea ke iloa tonu ei ne koutou i te lasi o toku alofa mō koutou katoa.

Ko Fakamagalo a te Tino Sala

5E uiga ki te tino tela ne tusi atu ei au, tela ne fakatupu ne ia te fakalavelave tenei, ne seki fai ne ia ki a au, kae ki a koutou katoa.

6Ko lava te fakasalaga mo se tino e amio pena, i te mea ko oti ne fakasala ne te tokoukega o koutou pena.

7Kae e 'tau mo koutou o fakamagalo atu a ia, kae fakamalosi atu tona loto, ke mo a mana to 'mae i te mea ma loto vaivai.

8Tela la, ko fakamolemole atu au ki a koutou ke a'lofa tonu koutou ki a ia.

9Me tenei eiloa te pogai ne tusi atu ei au, me ko koutou e tau'tali fakamaoni ki aku fakatonuga e uiga mō te tino tena.

10Kafai ne fakamagalo ne koutou se tino e tusa mo tena mea 'se ne fai, e fakamagalo foki ne au. Ne fai ne au te mea tena i mua o Keliso ona ko koutou,

11ko te mea ke faka'mao Satani mo tena taumafaiga o pule ki a tatou, me i a tatou e maina 'lei i ana fuafuaga.

Ko te Loto 'Pole o Paulo i Teloa

12 Galu 20.1 I taku okoga ki Teloa o folafola atu te Tala 'Lei i a Keliso, ne iloa ake ei ne au me ko oti ne 'tala ne te Aliki te auala mō te galuega i kona.

13Ka ko oko eiloa i toku manavase me galo a te tou taina ko Tito i kona; tela, fakatofa atu ei au ki tino i kona, kae fano ei au ki Maketonia.

Ko te Manumalo i a Keliso

14Kae fakafetai ki te Atua! Me i te 'soko tasi o tatou mo Keliso, ko fai ei tatou mo tino o tena malo, ka ko salalau atu te manogi gali o te tala 'lei e uiga ki a ia ki so se koga e alatu i a tatou.

15A tatou ko fakatusa ki te manogi gali o te taulaga 'sunu tela ne fa'ka ne Keliso ki te Atua, tela ko pusaki atu tena manogi ki a latou kola ko fakaolagina, e pela foki mo latou kola ko malaia.

16Ko latou kola ko malaia, e ma'nogi masei pela mo se manogi o te tino mate, ka ko latou kola ne fakaolagina, e ma'nogi 'lei ki a tatou pela mo se sausau tafasili i te manogi 'lei. Ko oi la te tino e fetaui 'lei mō te galuega tena?

17E se pau tatou mo nisi tino, kola e lauga atu ne latou te muna a te Atua ke maua ei olotou tupe. Ka ko matou e lauga atu te Tala 'Lei mo te loto fakamaoni, e pela eiloa mo ne tavini a Keliso ne uga mai ne te Atua.