ISAIA 26 - Tuvalu Revised Bible

Te Atua ka Aumai ne ia te Manumalo ki tena Fenua

1I se aso mai mua nei kae ka usu ne tino a te pese tenei i te fenua o Iuta:

A te motou fa'kai e malosi!

Ko te Atua eiloa e puipui ne ia ona olo!

2Tala mataloa o te fa'kai

Kae tuku mai te malo fakamaoni ke ulu mai,

Ko te malo tela e amiotonu a tino i ei.

3Te Aliki, ko koe e avatu ne koe te tina filemu ki a latou

Kola e tausi mau ki olotou fakamoemoega, kae fakatuaga ki a koe.

4Fakatuaga ki te Aliki ki te se gata mai;

E puipui faeloa ne ia tatou.

5Ne fakaseaoga ne ia a tino fakamatamata;

Ne ofa ne ia a te fa'kai malosi tela e nofo i ei latou,

Kae ofa ne ia ona pui ke siga ki lalo i te pefu.

6A tino kola ne pule fakasauagina ko sasale i luga i koga maofa kona,

Kae lakalaka ki olotou vae.

7Te Aliki, e fakatoka ne koe te auala ke gali mō tagata amio lei;

A te auala e olo ei latou e laugatasi lei.

8A matou e tautali i te mea e loto koe ki ei kae fakamoemoe ki a koe;

Ko koe e manako matou ki ei.

9I te po, au e manako faeloa ki a koe mo toku loto katoa;

Kafai ko fakamasino ne koe te lalolagi mo tino i ei,

Kae ka iloa ei ne latou a te mea tonu.

10E ui eiloa e aga'lei koe ki tino amio masei,

Kae e se mafai o fai ne latou te mea tonu.

Ke oko foki eiloa ki te fenua tenei o tino amiotonu,

E fai foki ne latou amioga se tonu;

E se talia ne latou tou takutakua.

11

13Te Aliki te motou Atua, a matou ne pule ne nisi malo,

Kae ko koe fua tokotasi ko te motou Aliki.

14A tino kona ko mate atu nei, kae ka se toe ola mai;

A olotou agaga ka se toetu ake,

Me ko oti ne fakasala kae ta fakapalele ne koe latou.

Seai se tino e toe manatua ne ia latou.

15Te Aliki, ne fai ne koe te motou malo ke gasolo o lasi,

Ne fakalasi ne koe a te kogā fenua i ona feitu katoa,

Ona ko te mea tena, ko ala ei o maua ne koe se tulaga fakaaloalogina.

16Te Aliki, ne fakasala ne koe ou tino, kae ne toe fuli atu mo olotou loto mafatia o talo atu ki a koe.

17Te Aliki, ne fai ne koe matou ke tagi,

Pela me se fafine kafai o fanau tela e tagi ona ko te mae.

18A matou ne mae kae fita,

Kae e seai se mea ne fanau mai ne matou.

E seki ai se manumalo ne maua ne matou mō te motou fenua;

E seai eiloa se mea aoga kai maua ne matou.

19A tino o te tou fenua kola ne mate, ka toe ola mai!

A olotou foitino ka toe ola mai.

A tino katoa kola e moe i olotou tanuga ka ala aka ki luga kae usu pese mo te fiafia.

E pela mo te sau tela e aumai ne ia te ola fou ki te lalolagi,

E pena foki a tino kola ko leva ne mate, me ka toe fakaola ne te Aliki.

Ko te Fakamasinoga mo te Toe Fakaolaga

20Toku fenua, olo ki loto i otou fale kae pono mai otou mataloa. Muni ke tai leva malie ke oko ki te taimi e gata ei te kaitaua o te Atua.

21A te Aliki ko vau mai i te lagi o fakasala a tino o te lalolagi ona ko olotou agasala. A tino kola ne tamate kae e se iloa i te lalolagi, ka fakaasi katoa ke iloa, mo te laukele foki ka se mafai o fakamuni ne ia a tino kola ne tamate.