2 NOFOAIGA TUPU 28 - Tuvalu Revised Bible

Ko Aasa te Tupu o Iuta(2Tupu 16.1-4)

1A Aasa ne fai mo tupu ka ko luasefulu ei ona tausaga, kae ne pule a ia i Ielusalema i tausaga e sefuluono. Ne seki tautali a ia i auala lei o tena tupuga ko Tavita; ne fai ne ia a mea e se fiafia ki ei a te Aliki,

2kae tautali i uiga masei o tupu o Isalaelu. Ne fai ne ia a fakatusa fiti o Paala,

3sunu mea manogi i te Vanu o Hinomo, kae ta ana tama tagata mo fai taulaga sunu ki tupua; ko fakaakoako a ia ki faiga masei a tino kola ne afuli ne te Aliki mai i te fenua, i te taimi ne olo atu ei a tino Isalaelu

4Ne ofo atu ne Aasa a taulaga mo taulaga sunu i koga tapuaki fapaupau katoa, pela foki i luga i mauga foliki, ke oko foki eiloa ki malūga o lakau katoa.

Ko te Taua a Sulia mo Isalaelu(2Tupu 16.5)

5-6Ona ko Aasa ne agasala, tena ne tuku atu ei a ia ne te Aliki tena Atua, ke fakatakavale ne te tupu o Sulia, kae ave fakapagota foki a tino o Iuta e tokouke ki Tamaseko. Ne tuku atu foki ne te Aliki a Aasa ke fakatakavale ne te tupu o Isalaelu ko Peka te tama tagata a Lemalia, kae ne tamate ne Peka e tusa mo te 120,000 sotia toa eiloa o Iuta i te aso e tasi. Ne talia ne te Aliki te Atua o olotou tupuga ke tupu a te mea tena, me i tino o Iuta ne fulitua atu ki a ia

7E isi se sotia Isalaelu e igoa ki a Sikeli, ne tamate ne ia a Maseia, te tama tagata a te Tupu ko Aasa, ne tamate foki ne ia a Asilikama, te tagata e pulepule i te palesi, mo Elekana te tokolua ki te tupu.

8E ui eiloa a tino Iuta e fenua tasi latou, kae ne puke fakapagota eiloa ne latou e tusa mo te 200,000 fafine mo tamaliki, o ave ne latou ki Samalia, fakatasi mo mea taua ne puke ne latou.

Ko Oteta te Pelofeta

9E isi se tagata e igoa ki a Oteta, se pelofeta a te Aliki, e nofo i te fa'kai o Samalia. Ne fetaui a ia mo te kautau a Isalaelu ko foki atu mo pagota Iuta, ko tai ulu atu eiloa ki loto i te fa'kai. Ne fai atu a ia penei, “A te Aliki te Atua o otou tupuga ne kaitaua ki tino Iuta, tena ne tuku atu ei ne ia ke fakatakavale ne koutou, kae nei, ko lavea ne ia a te tāga fakagamua ne koutou a tino Iuta.

10Ko mafaufau nei koutou ke fai ne koutou a tagata mo fafine o Iuta mo Ielusalema, ke fai mo otou pologa. E a, e se iloa ne koutou i a koutou ne agasala foki ki te Aliki te otou Atua?

11Fakalogo mai! A pagota kona ko otou taina mo tuagaene. Tuku atu latou ke olo, i a koutou ma fakasala ne te Aliki i tena kaitaua.”

12E tokofa foki a tagata maluga i te Malo ki Matu ne teke atu ki te mea ne fai ne te lotou kautau: ko Asalia te tama tagata a Ioananu, ko Pelekia te tama tagata a Mesilemota, ko Ieisikia te tama tagata a Saluma, mo Amasa te tama tagata a Hatalai.

13Muna a latou, “Sa aumaigina a pagota kona ki konei! A tatou ko leva ne agasala ki te Aliki, kae ko kaitaua foki ki a tatou, ko tau eiloa tatou o fakasala. Nei, ko manako koutou o fakaopoopo te agasala a tatou.”

14Tena, ne tuku atu ne te kautau a pagota mo mea ne puke mai ne latou, ki te vaitino mo olotou takitaki.

15Ne fili ake a te tokofa tagata kola ne 'teke ki te aumaiga o pagota, ke avatu ne latou ne gatu mō pagota mai i mea kola ne 'fao malo mai ne te kautau Isalaelu. Ne avatu ne latou a gatu mo taka mo olotou pei, mo ne meakai mo meainu, kae mili foki olotou pakiaga ki sinu olive. A tino kola ko to vaivai, ko se maua o sasale, ne fakasopo ki luga i asini, tena ne fakafoki atu katoa ei a pagota ki te kogā laukele o Iuta i Ieliko, te fa'kai o lakau ko pama. Tena, foki ei a te kau Isalaelu ki Samalia.

Aasa ko Sala Fesoasoani ki Asulia(2Tupu 16.7-9)

16-17Ne toe faitaua mai te kau Etoma ki Iuta, kae e tokouke eiloa tino Iuta ne puke fakapagota ne latou, tena la, ne fakamolemole ei a te Tupu ko Aasa ki te tupu o Asulia ko Tikila Pilesa, ke fesoasoani atu ki a ia.

18I te vaitaimi foki tenei, a te kau Filisitia e taua atu ki fa'kai i tafito mauga i te togala, pela foki i Iuta ki saute. Ne puke ne latou a fa'kai ko Peta Semese, Aitialona, mo Ketelota, pela foki a fa'kai lasi ko Soko, Timenata, mo Kimoso, mo olotou fa'kai foliki, nofo tumau eiloa latou i kona.

19Ne aumai ne te Aliki te puapuaga ki Iuta, me i tena Tupu ko Aasa ne fakaseaoga ne ia a te Aliki, pela foki mo tino.

20A te tupu o Asulia ne seki fesoasoani ki a Aasa, kae ne teke kae fakapuapuaga ne ia.

21Tena la, ne puke mai ei ne Aasa a te aulo mai i te Faletapu, mai i te palesi, pela foki mai i fale o takitaki o te fenua, kae ave ne ia ki te tupu o Asulia; kae e ui i tena, e seai eiloa se fesoasoani ne maua ne ia.

Ko Agasala a Aasa

22I te taimi ko oko eiloa i te uke o puapuaga o Aasa, ne gasolo ake eiloa a ia o agasala malosi ki te Aliki.

23Ne ofo ne ia ne taulaga ki atua o tino Sulia kola ne fakatakavale ne latou a ia. Muna a ia, “A atua o Sulia ne fesoasoani ki tupu o Sulia, tela la, kafai e ofo taulaga au ki atua kona, e se taumate e iku o fesoasoani mai foki ki a au.” Ne puapuaga a ia mo tena fenua ona ko te mea tena.

24Ne puke aka foki ne ia a mea o te Faletapu kae foa ke mafā valevale. Ne pono ne ia a te Faletapu kae fakatu ne ia a fata-fai-taulaga i kogā koga valevale i luga i Ielusalema.

25Ne faite ne ia a koga tapuaki fapaupau i fa'kai lasi katoa, mo fa'kai foliki, i Iuta. I koga kona e sunu ei mea manogi ki atua fakaatea. I ana faiga kona, ne kaitaua ei te Aliki, te Atua o ona tupuga.

26A nisi mea katoa a ia ne fai i aso o tena nofoaiga, mai i te kamataga ke oko ki te fakaotiga, e fakamau i te tusi ko Te Tala Tukufakasolo o Tupu o Iuta mo Isalaelu.

27Isa 14.28 Ne mate atu te Tupu ko Aasa kae ne tanu i Ielusalema, kae seki tanu i tanuga o tupu. Ne sui a ia ne tena tama tagata ko Hesekia o fai mo tupu.