1Fakamuli ifo, e isi se 'kaiga faka-Iutaia ne fai i Ielusalema, kae ne fano ki ei a Iesu.
2E isi se vai koukou i Ielusalema e lima ona fale fakaoso, e tu i tafa o te Mataloa Mamoe, ko Petesa tona igoa i te 'gana Epelu. E lima a fale fakaoso; i te faka-Epelu e fakaigoa ki Petesa.
3E tokouke a tino ma'saki e ta'kato i fale fakaoso kona; ko tino 'kivi, ko tino 'pili, mo tino ma'saki faka'mate ei, (e fakatalitali ki te lepuga o te vai.
4E isi ne taimi e fanaifo ei te agelu o lepu te vai, ko te masaki e mua ki lalo i te otiga o te lepuga o te vai, ka 'lei tona masaki.)
5Kae e isi foki se tino e tokotasi ne masaki i tausaga e tolu sefulu valu.
6Ne onoono atu a Iesu ki a ia e takato mai; ka ko te iloaga ne ia me ko leva ne takato, fai atu ei ki a ia, “E fia 'lei tou masaki?”
7Ne tali mai ki a ia a te masaki, “Te Aliki, e seai eiloa se tino e tuku ifo ne ia au ki te vai ma lepu, ka koi fanaifo au, ka ko mua ifo te sua tino i a au.”
8Fai atu ei a Iesu ki a ia, “Tu ki luga, puke tou moega kae fano.”
9I kona foki eiloa, 'lei eiloa i ei, puke tona moega, sasale eiloa o fano.
A te aso tena, ko te Sapati.
10Nee 13.19; Iele 17.21Tela, fai mai ei a tino Iutaia ki te tagata tela ne faka'lei tona masaki, “Ko te Sapati tenei, e se 'tau la mo koe o ave tou moega.”
11Ne tali atu a ia ki a latou, “A te tagata tela ne faka'lei ne ia toku masaki, ne fai mai ki a au, ‘Puke tou moega kae fano.”’
12Olotou muna ki a ia, “Ko oi te tino ne fai atu ki a koe ke puke tou moega kae fano?”
13Kae ne se iloa ne te tino tela ne faka'lei tona masaki, me ko oi a ia, i a Iesu ko fano fakaatea, me e tokouke a tino i te koga tena.
14Fakamuli ifo, ne fetaui laua mo Iesu i te Fale Tapu, faipati atu ei a Iesu ki a ia, “Kiloke, a koe nei ko 'lei! Sa toe agasala, i te mea ma oko atu ki a koe se mea e sili atu i te masei.”
15Ne fanatu a te tagata tenei, kae fakailoa atu ki tino Iutaia me ko Iesu eiloa ne faka'lei ne ia a ia.
16Tena te pogai ne fakasaua ei a Iutaia ki a Iesu, i te mea ne fai ne ia a mea konei i te Sapati.
17Ne tali atu Iesu ki a latou, “A toku Tamana e galue faeloa ke oko mai ki te aso tenei; e pena foki au.”
18Tena te mea ne ga'sue ei a tino Iutaia o salasala a ia o ta, i te mea e se gata i te soli ne ia te Sapati, kae ne fai mai foki i te Atua ko tena Tamana; kae fakapau foki laua mo te Atua.
Ko te Pule a te Tama19Ne faipati atu a Iesu ki a latou, “Au e fai tonu atu ki a koutou, e se mafai ne te Tama o fai se mea i tona loto eiloa; kae fai fua ne ia a mea kola e lavea ne ia e fai ne te Tamana; ko mea kola e fai ne te Tamana, e fai foki ne te Tama.
20I te mea e alofa te Tamana ki te Tama, kae fakaasi atu foki ki a ia a mea katoa kola e fai ne ia, e fakaasi mai foki ne ia ki a ia galuega tafasili i galuega kona, ko te mea ke ofo ei koutou katoa.
21E pela mo te Tamana e fakatu ne ia a tino 'mate, kae tuku atu ki a latou te ola; e pena foki te Tama, e tuku atu ne ia a te ola ki a latou kola e loto a ia ki ei,
22E se fakamasino ne te Tamana se tino e tokotasi, me ko oti ne tuku atu ne ia ki te Tama ke fai ne ia a te fakamasinoga,
23ko te mea ke ava tino katoa ki te Tama, e pela mo te lotou ava ki te Tamana. Ko te se ava ki te Tama, ko te se ava foki tena ki te Tamana, tela ne uga mai ne ia a ia.
24“Au e muna tonu atu ki a koutou, ko te tino e fakalogo mai ki taku muna, kae talitonu ki a ia tela ne uga mai ne ia au, ko i a ia te ola se gata mai; e se oko foki a ia ki te fakamasinoga, ka ko sao mai a ia mai te mate ki te ola.
25Au e fai tonu atu ki a koutou, ka ko oko mai nei te taimi, ko oko foki eiloa ki ei, e lagona ei ne tino 'mate te leo o te Tama a te Atua; ko tino kola e faka'logo ki ei, ka ola latou.
26E pela mo te Tamana e i a ia te ola, e pena foki te Tama, ko tuku mai ne te Tamana a te ola ki a ia.
27Ko tuku mai foki ki a ia te pule, ke fai ne ia te fakamasinoga, me ko ia ko te Tama a te Tagata.
28Sa ofo koutou i te mea tenei, me ko oko mai eiloa te taimi e lagona ei a tena leo ne latou katoa kola e i loto i tanuga,
29Tani 12.2kae ka ulu mai ei latou ki tua. Ko latou kola ne amio 'lei, e toe'tu i te ola; ka ko latou kola ne amio masei, e toe'tu i te fakasalaga.”
Ko Molimau e Uiga ki a Iesu30“E se mafai ne au o fai se mea e tasi i taku pule eiloa. E fakamasino fua ne au a mea kola e taku mai ne te Atua ki a au. Tela la, e tonu taku fakamasinoga, me se fai ne au i toku loto, ka ko te loto o ia tela ne uga mai ne ia au.
31“Kafai e molimau au ki a au eiloa, e se tonu taku mau;
32me e isi se tino e molimau ki a au, ko iloa foki ne au me tonu tena mau, e molimau ei a ia ki a au.
33Ioa 1.19-27; 3.27-30Ne uga atu ne koutou a nisi ki a Ioane, ne molimau foki a ia ki te munatonu.
34E se aoga ki a au a te molimau a tino; ka ko fai atu ne au a mea konei ki a koutou, ko te mea ke ola koutou.
35A Ioane ko te moli e ka kae maina mai; ne loto foki koutou i nisi aso o fiafia malie ki tona mainaga.
36Kae sili atu taku molimau i te molimau a Ioane; ka ko galuega ne tuku mai ne te Tamana ke fai ne au, ko galuega eiloa konei e fai ne au, e molimau mai foki aku galuega ki au i te Tamana ne uga mai ne ia au.
37Mata 3.17; Male 1.11; Luka 3.22Ko te Tamana ne uga mai ne ia au, ko ia eiloa e molimau ki a au. E seki lagona ne koutou tona leo, e seki lavea foki ne koutou tona foitino.
38E se tumau foki tena muna i otou loto; me se talitonu foki koutou ki a ia tela ne uga mai ne ia au.
39E sukesuke koutou ki Tusi, me ko te otou manatu e maua ne koutou i ei a te ola se gata mai; e molimau foki a Tusi kona ki a au.
40Kae se talia ne koutou o o'mai ki a au, ke maua ei ne koutou a te ola.
41“Au se manako ki te vikiga mai tino.
42Ka ko te mea ko iloa ne au, me se nofo i otou loto a te alofa ki te Atua.
43Au ko vau i te igoa o toku Tamana, kae se talia ne koutou; kae kafai ko vau se tino i tena igoa eiloa, ko talia ei ne koutou.
44E mafai pefea o talitonu koutou kola e ma'nako ki vikiga e maua mai nisi tino; kae se 'sala ne koutou te vikiga tela e maua mai i te Atua e tokotasi?
45Sa taofi pela me 'moli ne au koutou ki toku Tamana. A Mose, tela e faka'na koutou ki ei, ko ia tena e 'moli ne ia koutou.
46Moi fai ne talitonu koutou ki a Mose, penei e talitonu mai foki koutou ki a au, me ne tusi ne ia a mea e uiga ki a au.
47Kae kafai e se talitonu koutou ki ana tusitusiga, e talitonu la pefea koutou ki aku muna?”
Who We AreWhat We EelieveWhat We Do
2025 by iamachristian.org,Inc All rights reserved.
