1 Eso 25.22 Te Tausi Mamoe o Isalaelu, fakalogo mai ki a matou;
A koe te takitaki o te lafu mamoe,
Saga mai ki a matou, ke nofo koe i tou nofoga Aliki i luga aka o kapakau o kelupi.
2Fakaasi atu koe ki matakaiga o Efalaima, Peniamina mo Manase.
Fakaasi mai tou malosi ki a matou; vau o fakaola matou!
3Te Atua, toe fakafoki mai matou!
Fakaasi mai ki a matou tou alofa 'nau ke ola ei matou!
4Te Aliki te Atua e o ia te malosi katoatoa,
E gata afea tou ita ki talosaga a tou fenua?
5Ko oti ne fagai ne koe matou ki te fanoanoa,
Kae fainu foki matou ki te ipu lasi o loimata.
6Ne fai ne koe a fenua 'pili mai ke fakatau'fao i te motou fenua,
Ka ko omotou fili foki e fakatauemu mai ki a matou.
7Te Atua Malosi, toe fakafoki mai matou!
Fakaasi mai ki a matou tou alofa 'nau, ke ola ei matou!
8Ne aumai ne koe a te vine mai Aikupito;
Ne afuli keatea ne koe a nisi fenua kae 'toki ne koe a te vine i te lotou laukele.
9Ne vele 'ma ne koe te koga tena mo fakaola te vine;
Ne 'lave mautakitaki ona aka kae salalau atu i te fenua katoa.
10A mauga mo lakau 'lasi ko alasi, ko ufi katoa i tena malūga,
Mo te malūga o ana kaula.
11Ne oko atu ona kaula ki te Tai Metitilani,
Ne oko atu foki eiloa ki te Vaitafe o Eufilate.
12Ai a ne ofa ei ne koe ona pui ki lalo?
Kafai e fakatafa atu so se tino i te koga tena,
E mafai ne ia o kaisoa ona fuataga.
13E lakalaka foki ki lalo ne puaka vao ko kai ei ne manu fe'kai katoa.
14Te Atua Malosi, saga mai ki a matou!
Kilokilo mai ki a matou mai te lagi;
Vau o fakaola ou tino!
15Vau o fakasao te vine tenei ne toki ne koe,
Ko te tamā vine tenei ne fai ne koe ke olaola 'lei!
16Ne 'kati ne omotou fili kae 'sunu ki te afi;
Kilo kaitaua atu koe ki a latou kae fakamalaia atu!
17Puipui kae atafai atu ki tino ne filifili ne koe,
Te fenua ne fai ne koe ke malosi!
18Ko se toe olo eiloa matou keatea mo koe;
Kae tausi matou ke ola, ko tavae atu ei matou ki a koe.
19Te Aliki te Atua Malosi, toe fakafoki mai matou ki a koe.
Fakaasi mai foki tou alofa 'nau ki a matou, ka ola ei matou.
Who We AreWhat We EelieveWhat We Do
2025 by iamachristian.org,Inc All rights reserved.
