FAATAOTO 29 - Tuvalu Revised Bible

1Kafai e gasolo ake eiloa koe o lotomakeke i taimi katoa kola e fakatonu mai ei au mea 'se ne fai, ko tena uiga e iku koe o pakia i se aso, se toe lei eiloa koe.

2A tino e fiafia manafai e pule a tino amiotonu, kae e se fiafia manafai e pule a tino amio masei.

3Kafai e fiafia koe ki te poto, kae ka fakamatamata tou tamana i a koe.

Se faiga valea fua o fakamaumau a tupe ki fafine tali tagata.

4Kafai te tupu e taumafai ke manumalo te mea tonu, kae ka malosi te malo, kae kafai e saga fua ki tupe, ko tena malo ka se aoga.

5Kafai e takolekole ne koe ou taugasoa, ko tena uiga, e 'tao fua ne koe te malei e lave ei koe.

6A tino amio masei e lavelavea i olotou agasala, ka ko tino fakamaoni e fiafia kae saoloto.

7A te tino amio lei e iloa ne ia te saolotoga o tino mativa, ka ko tino amio masei e se iloa ne latou a vaega mea pena.

8A tino kola e se ava ki nisi tino e fakatupu valevale ne latou a fakalavelave i loto i fa'kai, ka ko tino poto e taumafai o tausi te filemu.

9E seai se aoga e finau ei te tino poto mo te tino valea. A te tino valea e sona pakalaga fua ko 'tupu ei fakalavelave.

10A tino tatino e takalialia ki sose tino tela e fakamaoni, kae ko tino amiotonu ka puipui ne latou. A te ola o sose tino pena.

11A tino valea e vave fakaasi olotou kaitaua, ka ko tino atamai e kufaki ne latou olotou ita.

12Kafai se takitaki e fakalogo ki fakamatalaga loi, ko tena uiga ka loi katoa foki eiloa mo ana ofisa.

13E tasi te mea e pau ei a tino mativa mo tino kola e pule fakasaua ki a latou — ne aumai ne te Aliki a mata ki a latou katoa.

14Kafai se tupu e puipui ne ia te saolotoga o tino mativa, kae ka leva tena pulega.

15A te fakatonuga o mea se, mo te kini, e lei mō tamaliki. Kafai se tamaliki e se fakalogo, a tena matua ka masiasi.

16Kafai ko pule a tino amio masei, kae ka gasolo o uke a amioga masei, ka ko tino amiotonu ka ola eiloa ke lavea ne latou te takavale o tino amio masei.

17Akoako malosi tau tama, kae ka fakamatamata faeloa koe ona ko ia. Ka se mafai eiloa o fakamasiasi ne ia a koe.

18A te malo tela e se talia ne ia te takitakiga a te Atua, se malo seai se fakavae. Amutia te tagata tela e tausi ne ia a tulafono a te Atua!

19E se mafai ne koe o fakatonu te mea se a te tavini o faipati fua ki ei. E mafai o malamalama i au pati, kae ka se saga eiloa ki ei.

20E tai isi atu se fakamoemoega o te tino valea i lo te tino tela e faipati mo te se mafaufau.

21Kafai e ave faeloa ne koe ki tau tavini a mea e manako mai ki ei, mai i te folikiga ke oko ki te taimi e matua ei, ko tena uiga, i se aso, e iku o fao ne latou au mea katoa.

22A tino mataitaita e fakatupu ne latou a finauga mo fakalavelave e uke.

23A te fakamatamata e aumai ne ia te takavale o te tino, kae kafai e loto malalo koe kae ka fakaaloalogina koe ne tino.

24A te taugasoa o te tino kaisoa ko te toe fili fakamataku eiloa o ia. E fakasalagina a ia manafai e fakaasi ne ia te mea tonu i te fono fakamasino, kae ka fakamalaia a ia ne te Atua manafai e se fakaasi ne ia te mea tonu.

25E fakamataku manafai e mafaufau mafa koe ki manatu o tino e uiga ki a koe, kae kafai e fakatuaga koe ki te Aliki, kae sao koe.

26A tino katoa e manako ke takulei latou ne te takitaki; ka ko te Aliki fua e maua mai i ei te mea tonu.

27A tino amiotonu e takalialia i tino amio masei, pena foki tino amio masei e takalialia i tino amiotonu.