1 SAMUELU 24 - Tuvalu Revised Bible

Ko Fakasao ne Tavita te Ola o Saulo

1I te fokimaiga o Saulo i te 'tauaga mo te kau Filisitia, ne fakailoa atu ki a ia, i a Tavita tela e nofo i te vao e pili ki Eneketi.

2E tolu afe sotia 'lei eiloa i Isalaelu ne olo mo Saulo o sala Tavita mo tena kau i te feitu ki te saegala o Papa o Kouti Vao.

3Sala 57; Sala 142 Ne oko atu a Saulo ki te ana e pili ki sai mamoe i tafa o te auala, tena ne ulu atu ei a ia ki loto i ei o fakamanava. A te ana tena, ko te ana foki e muni ei a Tavita mo tena kau, kae nofo ki loto atu.

4Ne fai atu te kau a Tavita ki a ia penei, “Tenei te taimi! A te Aliki ko oti ne fai atu ki a koe me ka tuku atu ne ia tou fili ki ou lima, kae ka mafai ne koe o fai so se mea e loto koe o fai ki ei.” Ne 'tolo atu Tavita, kati ei ne ia se potu laugatu i te gatu 'loa o Saulo kae se iloa eiloa ne Saulo.

5Tena, ne toe olo aka ne mafaufauga lei ki te ulu o Tavita

61Samu 26.11 kae fai aka ki tena kau penei, “A te Aliki ke fai ne ia a au ke se fakapakia ne au toku pule, tela ne fili ne te Aliki ke fai mo tupu! E se tau eiloa o fai ne au se mea ki ei, me i a ia ko te tupu tela ne filifilia ne te Aliki!”

7Tena ne ma'lie katoa te kau a Tavita me e se tau o ta ne latou a Saulo.

Ne tu ki luga a Saulo, ulu atu ki tua mo te ana, te mea eiloa ko fano.

8Ka ko Tavita ne ulu atu i ona tua, kae kalaga atu ki a ia penei, “Tou Malu!” Ne mafuli mai a Saulo, kae punou ifo Tavita ki te laukele o fakaaloalo atu ki a ia,

9kae fai atu penei, “Ai a e fakalogo ei koe ki tino kola e fai atu i a au e taumafai o tamate koe?

10E tau o iloa nei ne koe, me i a koe ne tuku mai ne te Aliki ki oku lima i tau nofoga i loto i te ana. E isi ne tino i taku kau ne fai mai ke tamate ne au a koe, ka ko au e alofa i a koe, kae ne fai au ki a latou me e se mafai ne au o fai se mea ki a koe, me i a koe ne filifili ne te Aliki ke fai mo tupu.

11Toku tamana, kilo mai ki te potu laugatu o tou gatu loa tenei e puke i toku lima! Moi ne manako au o tamate koe, e mate eiloa koe, kae ne kati fua ne au te potu laugatu tenei mai tou gatu. Ko tau nei koe o talitonu me e seai eiloa ne oku mafaufauga o teke koe, io me fai se mea ki a koe. E ui eiloa e seai se mea 'se ne fai ne au ki a koe, ka ko koe e vau faeloa o sala au o tamate.

12A te Aliki ke fakamasino ne ia taua me ko oi te tino e 'se! Ke fakasala koe ne ia e tusa mo au faiga ki a au, me e se mafai eiloa ne au o fai se mea ki a koe.

13E iloa ne koe te faiga muna taumua penei, ‘A te amioga masei e fai fua ne tino amio masei.’ Tela la, e se mafai ne au o fakapakia koe.

141Samu 26.20 Kilo mai ki te mea tenei e taumafai te tupu o Isalaelu o tamate! Kilo mai ki te mea tenei e afuli ne ia! Se kuli mate fua, se lago fua!

15A te Aliki ka fai ne ia te fakamasinoga, kae ka fa'kaiku ne ia me ko oi te tino i a taua e 'se. A te Aliki ke onoono faka'lei ki te mea tenei, ke puipui ne ia a au mai i a koe, kae fakasao foki au mai a koe.”

16I te otiga o Tavita ne faipati, ko Saulo eiloa ko fai atu penei, “A koe na ko Tavita eiloa, taku tama? Tena, tagi ei Saulo.

17Tena ne fai atu a ia ki a Tavita penei, “E tonu koe ka ko au e 'se. A koe e fai faka'lei mai faeloa ki a au, ka ko au e taumafai eiloa o fakapakia koe!

18I te aso nei, ko fakaasi mai ne koe tou aga'lei mai ki a au, me e seki tamate ne koe a au, ka ko au ko oti ne tuku atu ne te Aliki ki ou lima.

19E se tokouke tagata e fakasao sale olotou fili manafai ko maua ne latou. A te Aliki ke fakamanuia atu ki a koe, e tusa mo tau mea tenei ne fai ki a au i te aso nei!

20Ko iloa lei eiloa ne au i a koe ka fai mo tupu o Isalaelu, kae ka tumau eiloa te malo o Isalaelu i lalo o tau pulega.

21Kae tauto mai ki a au i te igoa o te Aliki, me ka fakasao ne koe a tino i toku gafa, ke se galo atu toku igoa mo te igoa o toku kaiga.”

22Ne tauto eiloa Tavita o fai te manako o Saulo.

Tena, ne foki atu Saulo ki tena palesi, ka ko Tavita mo tena kau ko foki atu ki te lotou koga muni.