SALAMO 30 - Tuvalu Revised Bible

Te Talo Fakafetai

1Te Aliki, au e tavae atu ki a koe i a au ne fakaola ne koe,

Kae ne taofi ne koe oku fili mai te fakatauemu ki a au.

2Te Aliki toku Atua, au ne fakatagi atu ki a koe mō se fesoasoani,

Kae ne fakaola ne koe au;

3Ne tausi ne koe au ke mao mai te mate.

A au ko i toku auala ki te koga 'poko,

Kae ne fakasao ne koe toku ola.

4Usu a tavaega ki te Aliki, koutou ona tino fakamaoni katoa!

Ke masaua ne koutou a mea ne fai ne te Tasi Tapu,

Kae avatu ki a ia a te fakafetai!

5A tena kaitaua e vave oti fua,

Ka ko tena alofa e tumau i te olaga katoa.

Se taumate e ma'ligi loimata i te afiafi,

Ka ko te fiafia e maua i te taeao.

6Ne lagona ifo ne au i a au ko sao 'lei,

Fai ifo ei au ki a au eiloa penei,

“E se toe takavale eiloa au.”

7Te Aliki, a koe ne atafai mai ki a au;

Ne puipui ne koe au ke malu 'lei e pela me se olo mauga.

Ka ko te taimi ne fakagalo ei koe mai a au,

Ko oko eiloa toku mataku.

8Te Aliki, au ne kalaga atu ki a koe;

Ne fakatagi atu au ki tou fesoasoani:

9“Se a te 'lei e maua ne koe mai i toku mate?

Se a te lei e maua i toku fano ifo ki lalo i te tanuga?

E a, e mafai ne tino mate o viki atu ki a koe?

E a, e mafai ne latou o folafola atu tou 'lei katoatoa?

10Te Aliki, fakalogo mai ki toku leo, kae alofa mai!

Te Aliki, fesoasoani mai!”

11Ne 'fuli ne koe toku fanoanoa ki te saka fiafia;

Ko oti ne ave keatea ne koe te fanoanoa mai i a au.

Kae fakafonu ne koe au ki te fiafia.

12Tena la, ka se mapu eiloa toku gutu,

i te usuga o pese tavae ki a koe.

Te Aliki, a koe ko toku Atua,

E avatu ne au te fakafetai ki a koe ki te se gata mai.