GALUEGA 24 - Tuvalu Revised Bible

Ko 'Moli a Paulo ki te Fono ne Tino Iutaia

1Ko teka atu aso e lima, fano ei Anania te Faitaulaga Pule ki Kaisaleia fakatasi mo nisi toeaina, mo te loia e igoa ki a Tetulo. Ne 'tu latou i mua o te Kovana ko Filiki, kae fakaasi atu te lotou mau e uiga ki a Paulo.

2Ne kamata Tetulo o fai tena mau e uiga ki a Paulo penei:

“Tou 'malu! Ko tau takitakiga poto ko filemu ei matou i aso e uke, kae e uke foki a mea fou mo te aoga ne fai ne koe mo te 'lei o te fenua o matou.

3Ko tali fiafia atu matou ki au faiga i so se koga, ka ko oko eiloa i te motou loto fakafetai ki a koe.

4E se manako au o fakalavelave malosi atu ki a koe, kae fakamolemole atu fua ki a koe, ke malie mai koe o fakalogologo ki te motou fakamatalaga toetoe.

5Ne maua ake ne matou i te tagata tenei, se tino fakatupu fakalavelave; e ofa ne ia te filemu i tino Iutaia katoa i te lalolagi, kae se takitaki i te kau Nasaleta.

6Ne taumafai foki o fakamasei a te Fale Tapu, tena puke ei ne matou fakapagota. (Ne filifili matou ke fakamasino a ia e tusa mo te motou tulafono,

7kae ne vau te pule ko Lusia o ave malo ne ia a Paulo mai i a matou. Ne fakatonu atu foki a Lusia ki tino kola ne 'moli ne latou a ia, ke o'mai ki ou mua.)

8Kafai e fesili mai koe ki a ia nei, ka iloa 'lei ei ne koe a mea katoa kola ne 'moli ei a ia ne matou.”

9Ne kau fakatasi foki a tino Iutaia ki te mau tenei, kae muna mai me tonu katoa eiloa a mea konei.

Ko Fakamatalaga a Paulo i Mua o Filiki ke Sao a ia

10A te Kovana ne tugaki atu tona ulu ki a Paulo ke faipati, tela fai atu ei a Paulo,

“Ko iloa ne au i a koe ne fai mo famasino i te fenua nei i ne tausaga e uke, tela la, ko fiafia au o fakasako atu i ou mua ke sao ei au.

11E mafai o fakatalitonu ne koe, me tusa mo te sefulu lua aso ko teka ne fano ei au ki Ielusalema o tapuaki.

12Ne seki maua foki au ne latou i loto i te Fale Tapu e finau mo se tino, io me fakatupu se fakalavelave i loto i olotou fale tapuaki, io me i so se koga o te fa'kai.

13E se gata i ei, e se mafai foki ne latou o fakatalitonu olotou mau e uiga ki a au.

14Kae e takutonu atu au ki a koe: au e tapuaki ki te Atua o omotou tupuna, i toku tautali i te Ala Tonu tela e fai mai ei latou me 'se. Ka ko au e talitonu ki mea katoa e tusi i te Tulafono a Mose, mo tusi a pelofeta.

15E pau faeloa omotou fakamoemoega ki te Atua mo latou, me i tino 'lei mo tino se 'lei, ka faka'tu mai katoa mai te mate.

16Tenei la, e taumafai malosi faeloa au, ke maua ne au a te loto 'ma i mua o te Atua mo tino.

17 Galu 21.17-28 “E uke tausaga ne teka ei au keatea mo Ielusalema, kae ne toe foki au ki ei o avatu ne meaalofa ki tino ma'tiva o toku fenua, mo taulaga.

18Ka koi saga au o fai a mea konei, kae maua mai au ne latou i loto i te Fale Tapu, i te taimi ne fatoa oti atu ei te faiga ne au a te lotu o te faka'maga. E se tokouke a tino i ei, e seai foki se fakalavelave ne tupu.

19Ka ko nisi tino Iutaia mai Asia kola ne i kona, ne 'tau mo latou o o'mai ki ou mua o fai atu te mau a latou, manafai e isi se lotou mau ki a au.

20E se gata i ei, fai ake ki tagata konei, ke taku atu me se a taku agasala ne fai, e iloa ei ne latou i a au e 'se i taku tuga i mua o te Fono,

21Galu 23.6kae se aofia i ei a te mea tela ne kalaga atu ne au i taku tuatuga i olotou mua: ‘Ko fakamasinogina au ne koutou i te aso nei, i toku talitonu me toe'tu mai a tino 'mate.”’

22Ko malamalama 'lei a Filiki i faifaiga o te talitonuga o te Ala Tonu, fakapalele atu ei ne ia te Fono, ana muna, “Ka mafaufau au ki te otou tagi, manafai e oko mai a Lusia te pule o kautau.”

23Fakatonu ei ne ia te ofisa e pule i a Paulo, ke leoleo faka'lei a Paulo, kae ke tuku atu foki ne mo taimi saoloto mo ia, ke fakasaoloto foki ne ia a taugasoa o Paulo kola e o'mai mo mea e manako a ia ki ei.

Ko Paulo i Mua o Filiki mo Tusila

24Ko teka atu nisi aso, o'mai ei Filiki mo tena avaga, ko Tusila, se fafine Iutaia. Ami ei ne Filiki a Paulo, ke fakalogologo a ia, ki te faipati mai o ia e uiga ki te fakatuanaki ki a Keliso Iesu.

25Ka koi fai eiloa a te fakamatalaga a Paulo e uiga ki te amiotonu, mo te loto kufaki, mo te oko mai o te Aso Fakamasino, ne mataku Filiki kae fai atu, “E 'lei ke fano koe. Ka toe ami atu ne au a koe manafai e maua se avanoa.”

26Ne fakamoemoe pela a Filiki i te taimi eiloa tena, me ka tuku atu ne Paulo ne tupe ma ia; tena te pogai ka ami sale ei ne ia a Paulo ke fai'pati laua.

27Ko teka atu tausaga e lua, sui ei a Filiki ne Pokio Feso. A Filiki ne fia 'lei ki tino Iutaia, tena tuku eiloa i ei ne ia a Paulo ki te fale puipui.