NUMELA 18 - Tuvalu Revised Bible

Ko Tiute o Faitaulaga mo Sa Levi

1Muna a te Aliki ki a Alona, “Kafai e isi se mea se lei e fai, faka'tau ki galuega i loto i toku Faleie, ko koe mo au tama tagata mo te kau sa Levi ka amo ne koutou te agasala tena. Kae kafai e isi se mea se tonu i te feitu o te galuega fakafaitaulaga, ko koe eiloa mo au tama tagata e paku ki ei te 'se tena.

2A te matakaiga o Levi, kola ko ou kaiga, ke aumai ne koe ke fesoasoani atu ki a koe mo au tama tagata i te galuega a koutou i toku Faleie.

3E tau eiloa mo latou o fai olotou tiute ko oti ne fakasino atu, kae ke mo a eiloa e fakapatele'tele ki mea tapu i loto i te Potu Tapu, pena foki te fata-fai-taulaga. Kafai e se faka'logo latou, ko latou ka tamate, pena foki mo koe.

4A latou e galue fakatasi mo koe o fai a tiute katoa kola e tau o fai ne latou i loto i toku Faleie, kae e tapu se tino e seai sena taliaga, ke galue i toku Faleie.

5Ko koe fua mo au tama tagata e tau o ga'lue i te Potu Tapu mo te fata-fai-taulaga, ko te mea ke se toe kaitaua au ki tino Isalaelu.

6Ko au ne filifili ne au a te kau sa Levi, kola ko ou kaiga, mai tino Isalaelu, ke fesoasoani atu ki a koe. A latou ko oti ne fakatapu ke fai mo oku, ko te mea ke mafai ne latou o fai olotou tiute i toku Faleie.

7Ko koe fua mo au tama tagata e tau o fai a galuega faka faitaulaga kola e fai i luga i te fata-fai-taulaga, pela foki i te Potu Tafasili i te Tapu. A mea kona ko tou tofi, me ko oti ne avatu ne au a te meaalofa tenei ko te tofi faitaulaga ki a koe. So se tino e fakapilipili mai ki mea malu konei kae e seai se taliaga, e tau o tamate.”

Ko te Vaega o Faitaulaga

8Muna a te Aliki ki a Alona, “Masaua i meaalofa katoa kola e tuku fakapitoa mai ki a au, kola e seki sunu mo fai taulaga, konei e avatu ne au ki a koe. E tuku atu ne au ki a koe mo tino i tou gafa, me ko te vaega tena o koutou ki te se gata mai.

9Konei a taulaga tafasili i te tapu, kola e se sunu i luga i te fata-fai-taulaga, kola e puke ma koutou: ko taulaga saito, ko taulaga mo agasala, mo taulaga o te toe togiga o te agasala. A mea katoa kola e ofo mai ki a au e fai mo taulaga malu ki a au, e puke ma koe mo au tama tagata.

10E tau o kai ne koutou a mea kona i se koga tapu. Ko tagata fua e tau o kai ne latou; masaua i mea kona ne mea tapu.

11“Kafai e isi ne nisi meaalofa fakapitoa ake kola e ofo mai ne tino Isalaelu ki a au, e puke foki ma koutou. E tuku atu ne au ma koe mo au tamaliki tagata mo tamaliki fafine mo taimi katoa fakamuli. E mafai ne so se tino i tou kaiga o kai ki mea kona manafai e 'ma eiloa a ia i feitu faka tapuakiga.

12“E tuku atu ne au ma koutou a mea tafasili i te lei o te fua muamua o lakau kola e aumai ne tino Isalaelu ki a au i tausaga takitasi: ko sinu olive, ko uaina, mo saito.

13A mea kona e a koutou. So se tino i tou gafa e mafai o kai ki mea kona manafai e ma eiloa latou i feitu faka tapuakiga.

14 Levi 27.28 “A mea katoa i Isalaelu kola ko oti ne tuku katoatoa mai ki a au e a koe.

15“A tama toekimua a tino Isalaelu, mo toekimua a olotou manu kola ko oti ne ofo mai ki a au, e a koe foki. Kae e tau o talia ne koe te togi e tuku mai ne se tino manafai ko manako ke fakafoki atu tena toekimua. E tau foki o talia ne koe ke togi a toekimua a manu kola e se 'ma i feitu faka tapuakiga.

16A tamaliki a tino e tau o togi mai ne olotou matua manafai ko katoa te masina e tasi, ki te lima tupe siliva, te togi ko oti ne fakamau, e tusa eiloa mo te fua faka-te-malo

17Ka ko toekimua o pulumakau, mamoe mo kouti, e se tau o toe togi mai; ko puke eiloa ma aku, tela la, e tau o ta ke fai mo taulaga ki a au. A toto o manu kona ke ligiligi ki te fata-fai-taulaga, ka ko ona gako ke sunu ke fai mo taulaga meakai, ko tena manogi e fiafia au ki ei.

18A kano o manu e a koe, pela mo te fatafata mo te vae tua fakaatamai o te taulaga tela ne ofo fakapitoa mai ki a au.

19“Ka avatu ne au ma koe mo au tama tagata mo tama fafine a tusaga katoa kola e ofo fakapitoa mai ne tino Isalaelu ki a au. A te faiga tena e tumau mo taimi katoa fakamuli. A te mea tena se feagaiga e se mafai o ofa, tela ne fai ne au mo koe mo tou gafa.”

20Muna a te Aliki ki a Alona, “E seai se mea e maua ne koe, tela e mafai o fakasolo i tou gafa, e seai foki se vaega i manafa o Isalaelu e avatu ma koe. Ko au, te Aliki, e ola ei koe.”

Ko Tusaga o Sa Levi

21 Levi 27.30-33; Teu 14.22-29 Muna a te Aliki, “Ko oti ne tuku ne au ma te kau sa Levi a te takitasi vae sefulu o mea kola e ofo mai sale ne tino Isalaelu ki a au. A te mea tena ko te togi o latou i te lotou galuega ki te tausiga o toku Faleie.

22A nisi tino Isalaelu e se tau eiloa o fakapilipili atu ki toku Faleie i a latou ma mate.

23Mai te taimi nei, ko te kau sa Levi fua ka tausi kae onoono faka'lei ki toku Faleie. A te mea tena se tulafono e tumau, e fakasino foki ki tou gafa. A te matakaiga o Levi e seai ne mea tumau a latou i luga i Isalaelu,

24me ko oti ne tuku ne au ma latou a te tasi vae sefulu o mea kola e ofo mai sale ne tino Isalaelu e fai mo tusaga fakapitoa ki a au. Tena te mea ne fai ei au ki a latou me e seai ne mea tumau ma latou i luga i Isalaelu.”

Ko te Tasi Vae Sefulu a te kau Sa Levi

25Ne fakatonu mai a te Aliki ki a Mose

26ke fai atu ki tino sa Levi penei: “Kafai ko maua ne koutou mai tino Isalaelu a te tasi vae sefulu o mea kola ne tuku atu ne te Aliki ma koutou, e tau o toe ofo ne koutou te tasi vae sefulu i ei ke fai mo tusaga fakapitoa ki te Aliki.

27A te tusaga fakapitoa tena e seai se kese mo te taulaga o saito fou mo uaina fou a te tagata toki lakau.

28I te faiga tena, e tau foki mo koutou o ofo mai a te vaega fakapitoa a te Aliki mai te tasi vae sefulu o mea kola e maua ne koutou mai tino Isalaelu. A te tusaga fakapitoa tena mo te Aliki e tau o tuku atu ki a Alona te faitaulaga.

29Ko mea tafasili i te lei kona e maua ne koutou ke ave ki a Alona.

30Kafai ko oti ne ofo atu ne koe a te vaega tafasili i te lei, ko mea e toe e puke ma koutou, e pela eiloa mo te tagata toki lakau e puke ma ia a mea kola e toe manafai ko oti ne fai tena taulaga.

31A koutou mo otou kaiga e talia o kai a mea kona e toe i so se koga, me ko te togi tena o koutou i te otou galuega i toku Faleie.

32E seai se mea e agasala ei koutou manafai e kai koutou ki ei, vagana ke oti mua ne ofo atu ne koutou te vaega tafasili i te lei ki te Aliki. Masaua ke se fakamasei ne koutou a meaalofa tapu a tino Isalaelu o kai ki ei kae seki avatu a te tasi vae sefulu ki faitaulaga. Kafai e se faka'logo koutou, ko koutou ka tamate.”