1Ne mate atu te Tupu ko Avia, kae ne tanu i tanuga o tupu i te Fa'kai o Tavita. Ne sui a ia ne tena tama tagata ko Asa o fai mo tupu. Ne filemu te fenua i tausaga e sefulu i te taimi o te nofoaiga a Asa.
2Ne fakafiafia ne Asa a te Aliki tena Atua, me ne fai ne ia a uiga tonu mo amioga lei.
3Ne ave keatea ne ia a fata-fai-taulaga a tino fakaatea, kae fakamasei a koga tapuaki fapaupau, kae ofa ki lalo ne ia a pou fatu kola e tapuaki ki ei a tino fapaupau, kae ofa foki ki lalo a fakatusa o te atua fafine ko Asaila.
4Ne fakatonu ne ia a tino o Iuta ke fai te loto o te Aliki, te Atua o olotou tupuga, kae tausi faka'lei ki ana akoakoga mo ana fakatonuga.
5Ne tumau te filemu i te malo i aso ne tupu ei a ia, me ne ofa ne ia a koga tapuaki fapaupau mo fata-fai-taulaga fapaupau i fa'kai katoa o Iuta.
6Ne faite ne ia a pui fakamalosi o fa'kai o Iuta, tela la, e uke eiloa tausaga ne filemu ei te fenua, me ko te Aliki ne aumai ne ia te filemu.
7Muna a ia ki tino o Iuta, “Tatou ka taumafai o fakamalosi a fa'kai o tatou, o faite a pui mo taoa, mo mataloa kola e mafai o pono kae loka. Ko maua nei ne tatou te fenua tenei, me ne fai ne tatou a te loto o te Aliki te 'tou Atua. Ne puipui ne ia tatou, kae puipui foki ne ia tatou i o'tou feitu katoa.”Tena ne faite olotou pui kae ko gasolo ake eiloa o maumea.
8A te kautau a te Tupu ko Asa, e tusa mo te 300,000 tagata mai i Iuta, e tofu mo talita mo tao, kae e 280,000 tagata mai i Peniamina, e tofu mo talita mo kausana. A sotia kona ne tagata toa, kae ko oti ne fakamasani faka'lei eiloa.
9E isi se tagata Sutana e igoa ki a Sela mo tena kautau e miliona tagata, kae e toluselau kaliota, ne taua ki te fenua o Iuta, kae ne oko atu eiloa ki Malesa.
10Ne fanatu a te Tupu ko Asa mo tena kautau o taua mo te kautau a te tagata tena, tena ne fakatoka ei a tulaga o te ava kau kona i te Vanu o Sefata i tafa o Malesa.
11Ne talo atu a Asa ki te Aliki tena Atua penei,“Te Aliki, e mafai faeloa ne koe o fesoasoani ki se kautau vaivai, pela foki ki se kautau malosi. Te Aliki te motou Atua, fesoasoani mai nei ki a matou, me i a matou e fakalagolago atu ki a koe, ka ko matou e o'mai nei o taua ki te kautau lasi tenei i tou igoa. Te Aliki, a koe ko te motou Atua; e seai se tino e mafai ne ia o fakatakavale a koe.”
12Ne fakatakavale ne te Aliki a te kautau a Sutana, i te oloatuga o te kautau a Asa, te tupu o Iuta, o taua ki a latou.
13Kae ne afuli atu latou ne Asa mo tena kautau ke oko atu eiloa ki Kela. Ko oko eiloa i te tokouke sotia o Sutana ne mate, tela la, ko se mafai ne latou o toe fakatoka faka'lei te lotou kau o taua. Ne fakatakavale latou ne te Aliki mo tena kautau, kae e uke eiloa a mea taua ne fao malo ne te kautau a Iuta.
14Tena la, ko mafai foki ei ne latou o fakama'sei a fa'kai i tafa o Kela, me i tino i kona ko oko eiloa i te mataku i te Aliki. Ne ta fakamasei ne te kautau a Iuta a fa'kai i kona, kae fao malo ne latou a mea taua e uke i kona.
15Ne taua atu foki latou ki nisi koga e nofo ei a tausi mamoe, kae puke ne latou a olotou mamoe mo kamela e uke. Oti aka, foki atu ei latou ki Ielusalema
Who We AreWhat We EelieveWhat We Do
2025 by iamachristian.org,Inc All rights reserved.
