FAILAUGA 3 - Tuvalu Revised Bible

Ko te Taimi mo mea katoa

1A mea katoa konei e tupu i te lalolagi nei e tupu katoa i taimi ko oti ne filifili ne te Atua.

2Ne fakamoe ne ia te taimi e fanau ei tino mo te taimi e mate ei,

Te taimi e toki ei lakau mo te taimi e toe unu ei,

3Te taimi e tamate ei tino mo te taimi e toe fakalei ei,

Te taimi o te fakamaofa, mo te taimi o te toe faite.

4Ne fakasino foki ne Ia a te taimi o te fanoanoa mo te taimi o te fiafia,

Te taimi o te tagi fanoanoa mo te taimi o te saka fiafia,

5Te taimi o te alofa mo te taimi o te se alofa,

Te taimi o te sogi mo te taimi e seai se sogi e fai.

6Ne fakasino foki ne Ia te taimi e maua ei ne mea mo te taimi e galo ei,

Te taimi e fakaputu ei mea mo te taimi e laku ei keatea,

7Te taimi e saesae ei mea mo te taimi e toe faite ei,

Te taimi o te nofo mu mo te taimi o te faipati.

8Ne fakasino foki ne Ia te taimi o te alofa mo te taimi o te ita,

Te taimi o te taua mo te taimi o te filemu.

9Se a te mea e maua ne tatou mai o tou galuega ne fai?

10E iloa ne au a amoga mafa ne tuku mai ne te Atua ki luga i a tatou.

11Ko oti ne fakasino ne Ia a taimi e tau ei o tupu a mea kesekese katoa. Ko oti ne aumai ne ia ki a tatou a te manako ke iloa a mea e tupu i aso fakamuli, kae e se mafai o fai ne ia tatou ke malamalama faka'lei i mea e fai ne Ia.

12Tela la, ko iloa aka nei ne au me i te mea sili e tau o fai ne tatou ko te fakafia'fia i te olaga tenei koi ola tatou i ei.

13E tau mo tatou katoa o kai kae inu kae fakafia'fia ki mea ne maua ne tatou mai o'tou galuega. Ko te meaalofa a te Atua tena.

14E iloa ne au me i mea katoa e fai ne te Atua e tumau ki te se gata mai. E se mafai ne se tino o faopoopo se mea ki ei io me toese ne ia se mea mai i ei. Kae e tasi te mea e fai ne te Atua, e fai ne ia tatou ke ma'taku ki a Ia.

15A mea katoa konei e tupu io me konei ka tupu, ne mea foki ko oti ne tupu i aso mua. A te Atua e fakafokifoki faeloa ne ia a mea ne tupu.

Ko Faiga se Tonu i te Lalolagi

16I tafa o mea kona, e lavea foki ne au me i te lalolagi nei e matea ne tatou te amio masei i koga e tau o fai i ei te fai mea tonu.

17Ne faipati ifo au ki a au eiloa penei, “A te Atua ka fakamasino fakatasi ne ia a tino amiotonu mo tino amio masei, me i mea katoa, faiga katoa, e isi eiloa ne taimi ko oti ne fakamoe e tupu ei a mea takitasi kona.”

18Ne iku i toku manatu i te Atua e tofotofo ne ia tatou, ke fakaasi mai ki a tatou i a tatou e pau fua mo manu.

19E tonu, te ikuga e iku ki ei a manu ko te ikuga foki o tatou tena. Tatou, pela foki a manu, e mate katoa. A tino mo manu se itu kaiga manu e tasi. A te tino e pau faeloa mo te manu, me i te olaga tenei e seai se uiga ki tino mo manu.

20E toe 'foki tasi eiloa te tino mo te manu ki te koga e tasi — te pefu. Ne mafua mai laua i te pefu; kae ka toe foki laua ki ei.

21Ko oi te tino e iloa tonu ne ia i te agaga o te tino e fano ki luga ka ko te agaga o te manu e fano ki lalo?

22Tela la, ko iloa aka nei ne au me i te mea sili e tau o fai ne tatou, ke fakafia'fia tatou ki mea ne fi'ta tatou ki ei i te olaga nei. E seai aka foki eiloa se mea e mafai o fai ne tatou. E se mafai o iloa ne tatou me se a te mea ka oko ki a tatou manafai ko mate tatou.