IELEMIA 24 - Tuvalu Revised Bible

Ko Kete Mati e Lua

1 2Tupu 24.12-16; 2NTupu 36.10 Ne fakaasi mai ne te Aliki ki a au e lua kete mati e tuku mai i mua o te Faletapu. (Ne tupu a te mea tenei mai i tua o te taimi ne ave fakapagota ei ne te tupu o Papelonia ko Nepukanesa a te tupu o Iuta ko Ieoiakini, te tama tagata a Ieoiakimo. Ne ave fakapagota ne ia mai i Ielusalema ki Papelonia, fakatasi mo takitaki o Iuta, tino apo i galuega mo tino ko masani i faiga o galuega.)

2A te kete muamua e tuku i ei a mati lei, kola e sulu vave; a te sua kete e tuku i ei a mati masei, kola ko se tau o kai.

3Tena kae fai mai te Aliki ki a au penei, “Ielemia, se a te mea e lavea ne koe?”

Ne tali atu au penei, “Ne mati. A mati lei ko oko eiloa i te lei, ka ko mati masei e se fakatau eiloa i te masei, se tau eiloa o kai.”

4Tena ne fai mai ei te Aliki ki a au penei,

5“Au, te Aliki, te Atua o Isalaelu, e fakavasega ne au a tino kola ne ave ki Papelonia, e pau mo mati lei, kae ka fai fakalei eiloa ne au latou.

6Ka tausi fakalei ne au latou, kae toe fakafoki mai ki te fenua tenei. Ka atiake ne au latou, kae se ta fakamasei; ka toki fakalei ne au latou, kae se unu keatea.

7Ka fai ne au latou ke iloa ne latou i a au ko te Aliki. Tena la, ka fai latou mo oku tino, ka ko au ka fai mo Atua o latou, me ka toe foki mai latou ki a au mo olotou loto katoa.

8“Ka ko te tupu o Iuta ko Setekaia, mo ana ofisa, mo te toega o tino Ielusalema kola ne nofo i te fenua tenei io me ne olo ki Aikupito — ko au, te Aliki, ka fai ne au latou pela mo mati masei konei, kola ko se tau eiloa o kai.

9Ka aumai ne au se mala fakamataku ki a latou, ko te mea ke mataku a malo katoa o te lalolagi. A tino ka o'mai o fakalili latou, ka fai faifa'kata e uiga ki a latou, kae faka takalialia ki a latou, kae fakaaoga te lotou igoa e fai mo muna fakamalaia i so se koga e fakasalalau ei ne au ki ei latou.

10Ka aumai ne au te taua, te mate fiakai, mo famai ki a latou, ke oko eiloa ki te taimi e seai ei se tino o latou e toe i luga i te fenua tenei ne avatu ne au mo latou mo olotou tupuga.”