TEUTELONOME 22 - Tuvalu Revised Bible

1 Eso 23.4,5 “Kafai e lavea ne koe se pulumakau io me se mamoe a tou taina Isalaelu e tekateka mao mai i tena koga, puke o fakafoki ki te tino e a ia te manu.

2Kafai te tino e a ia a te manu e nofo i se koga mao, io me e se iloa ne koe me e ai te manu, puke o ave ki tou fale. Kafai e vau te tino e a ia a te manu o sala, ko tuku ei ne koe ki ei.

3E pena foki te mea e tau o fai ne koe manafai e maua ne koe se asini, io me se laugatu io me se isi mea aka a tou taina Isalaelu tela ne galo.

4“Kafai e lavea ne koe se asini io me se pulumakau a sou taina Isalaelu e siga i lalo, fano o fesoasoani ki a ia o fakatu aka tena manu.

5“A fafine e se tau o pei ki gatu tagata, pena foki tagata, e se tau o pei ki gatu fafine. A te Aliki te otou Atua e se fiafia ki tino e fai ne latou a uiga masei pena.

6“Kafai e maua ne koe se ofaga o se manu eva i se lakau io me i lalo i te laukele, mo te matua e nofo mai i luga i ana fua, io me e nofo mai i tafa o tena punua, e se tau eiloa o puke ne koe te matua.

7E mafai ne koe o puke a punua, ka ko te matua e se tau eiloa o puke ne koe. Ka fakalogo koe ki te fakatonuga tena, kae ka ola koe i se olaga leva kae manuia.

8“Kafai e faite se fale fou o koe, masaua o faite ne pui i kaokao o te tuafale. Kafai e to se tino mai i te tuafale o tou fale kae mate, e se 'se koe i te feitu tena.

9 Levi 19.19 “Sa toki ne koe ne lakau kaina fakaatea i te koga e toki ei au vine; kafai e fai ne koe pena, ko tapu ma fakaaoga ne koe a vine io me ko fua o lakau kaina kona ne toki fakatasi ne koe mo au vine.

10“Sa sai fakatasigina a te pulumakau mo te asini ke fakamalu te laukele.

11“Sa pei ki gatu kola e laga ki te vulu mo te lino.

12 Nume 15.37-41 “Sui ne felefele i kaokao e fa o otou gatu.

Ko Tulafono o te Fakatasi, te Tagata mo te Fafine

13“Kafai se tagata ne avaga ki se tamafine kae fakamuli ifo ko se manako a ia ki ei,

14kae ko fai ana muna i te fafine ne avaga laua se se taupou.

15“Kafai e tupu se mea pena, ko matua o te fafine ka aumai ne laua a te sulukafu tela ne moe ei te tauavaga i te po ne fakaipoipo ei, tela e fakatalitonu ei i te fafine se taupou, kae fakaasi ne laua i te fono, ki takitaki o te fa'kai.

16Ka faipati aka te tamana o te fafine penei, ‘Ne tuku ne au taku tama fafine ke avaga mo te tagata tena, kae tenei ko se manako ki ei.

17A pati a ia kola ne fai i taku tama fafine se se taupou i te taimi ne avaga ei laua, ne pati loi fua. E isi se mea tenei e fakatalitonu ei i taku tama fafine ne avaga kae se taupou; kilo mai ki toto konei i te sulukafu o laua i te taimi o te fakaipoipoga!’

18Tena la, ko takitaki o te fa'kai ka ave ne latou te avaga a te tamafine tena o kini.

19E tau foki o fakasala ne latou a te tagata tena ki te selau siliva, a te tupe tena e tau o ave ki te tamana o te fafine, me i te tagata tena ne fakamasiasi ne ia te tamafine Isalaelu. Kae e ui eiloa i feitu katoa kona, a te fafine e tumau eiloa o fai mo avaga a te tagata, kae e se mafai ne te tagata tena o tiakina te fafine ke oko eiloa ki tena mate.

20“Kae kafai e tonu te molimau a te tagata, kae e seai foki se mea e fakatalitonu ei i te fafine se taupou i te taimi o te fakaipoipoga,

21ko tau la ei o ave ne latou te fafine tena ki te mataloa o te fale o tena tamana, kae peipei a ia ki fatu ke mate ne tagata o tena fa'kai. Ko oko eiloa i te mataga o tena mea ne fai, me ne moe mo tagata kae koi tuai o avaga, i te taimi ne nofo ei a ia i te fale o tena tamana. I te faiga tena, e ave keatea ei ne koutou te amioga masei tena mai i te otou fenua.

22“Kafai e maua atu se tagata e moe mo te avaga a te sua tagata, a laua tokolua e tau o tamate katoa. I te faiga tena, e ave keatea ei ne koutou te amioga masei tena mai i te otou fenua.

23“Kafai se tagata e maua atu i loto i te fa'kai e moe mo se tamafine tela e fai feagaiga mo te sua tagata;

24e tau o ave laua ki tua o te fa'kai o peipei ki fatu ke mate. A te tamafine e tau o tamate me ne seki kalaga ki se fesoasoani i a laua e nofo fua i loto i te fa'kai, kae e mafai fua o lagona mai tena leo ne tino. A te tagata e tau o tamate me ne moe mo te tamafine tela e isi sena feagaiga. I te faiga tena, e ave keatea ei ne koutou te amioga masei tena mai i te otou fenua.

25“Kafai e isi se tagata e puke malo ne ia se tamafine tela e fai feagaiga mo te sua tagata, i tua o te fa'kai, ko te tagata fua e tau o tamate.

26E seai se fakasalaga e tau o oko ki te tamafine, me e seki fai ne ia se agasala e tau ei a ia o tamate. A te mea tena e pau manafai e fanatu te tagata o faitaua ki te sua tagata, tamate eiloa ne ia.

27A te tamafine tena ne puke malo ne te tagata tena i tua o te fa'kai, kafai ne kalaga sale te tamafine ki se fesoasoani, kae e seai eiloa se tino i kona o fesoasoani ki ei.

28 Eso 22.16,17 “Kafai se tagata e maua atu me ne puke malo ne ia se tamafine e seki ai sena feagaiga;

29e tau o togi ne ia te togi o te tamafine, e limasefulu siliva, ki te tamana o te fafine, ko fai ei te fafine tena mo avaga a ia, me ne fai malo ne ia ke moe laua. E se mafai eiloa ne ia o tiaki ke oko ki tena mate.

30 Levi 18.8; 20.11; Teu 27.20 “E tapu se tino e fakamasiasi ne ia tena tamana o moe mo avaga a tena tamana.