SALAMO 1 - Tuvalu Revised Bible

TUSI MUAMUA(Sala 1—41)Ko te Fiafiaga Tonu

1Amutia latou kola e se kau ki filifiliga a tino amio ma'sei;

E se fiafia foki ki faifaiga a tino agasala,

E se fakatasi atu foki ki a latou kola e fakatauemu ki te Atua.

2Kae fia'fia o faitau ki Tulafono a te Aliki,

Kae mafaufau 'loto foki ki ei i te ao mo te po.

3 Iele 17.8 A latou e pela mo ne lakau e ola i tafa o se vaitafe,

E fua mai i taimi tonu o te taukai,

E se magemage olotou lau.

E manuia foki i mea katoa e fai ne latou.

4Ka ko tino amio ma'sei e se fai pena;

E pau latou mo kaiga e agina i te matagi.

5A tino amio masei ka fakasala ne te Atua;

Kae vae foki keatea mai tino o te Atua.

6A tino amiotonu e tausi kae takitaki ne te Aliki,

Ka ko tino amio masei ko tu nei i te lotou auala ki te malaia.