GALUEGA 17 - Tuvalu Revised Bible

Ko te Galuega i Tesalonia

1Ne ui atu laua i loto i Amefipoli mo Apolonia, oko atu ei laua ki Tesalonia, i te koga tela e tu i ei a te fale tapuaki o te kau Iutaia.

2Ulu atu a Paulo ki loto i te fale tapuaki, e pela eiloa mo tena masani, e tolu Sapati ne kinau sale ei latou e uiga ki muna o te Tusi,

3e fakamatala kae fakapatonu atu, me e 'tau eiloa o logo'mae te Keliso kae toetu ake mai te mate. Fai atu ei Paulo ki a latou penei: “A Iesu, tela ne folafola atu ne au ki a koutou, ko te Keliso eiloa tena.”

4E isi ne tino o latou ko talitonu, kau atu ei latou ki a Paulo mo Sila; e pela foki te tokoukega o tino Eleni kola e tapuaki ki te Atua, e pela foki mo takitaki fafine e tokouke.

5Ka ko tino Iutaia ko loto ma'sei, tela ne 'luku mai ei ne latou a tino ma'sei kola e olo sale i auala, ke kau mo latou, ke fakamakosu ne latou a te fa'kai, kae ualolo atu latou ki te fale o Iasona o 'sala laua ke aumai ki te fenua.

6Kae ne seki maua ne latou, toso mai ei ne latou a Iasona mo nisi o te kau taina ki tagata pule o te fa'kai, kae ka'laga penei: “Konei tagata fakatupu fakalavelave i koga katoa, ka ko oko mai foki ki a tatou.

7Kae ne tausi katoa latou ne Iasona i tona fale, ne 'teke atu foki latou ki tulafono a Kaisala, kae fai ake olotou pati pela, me isi aka foki se isi tupu, ko Iesu tona igoa.”

8I te lagonaga ne tino mo tagata pule o te fa'kai a te mea tenei, ko oko eiloa i te ga'sue o olotou loto, kae ua'te valevale.

9Ne fakatonu atu ne tino pule o te fa'kai a Iasona mo nisi tino, ke 'togi atu a te katoaga tonu o te tupe tela e mafai o fakasaoloto ei latou ke olo.

Ko te Galuega i Pelea

10I te poifoga ne uga atu ne taina konei a Paulo mo Sila ke olo ki Pelea. I te la okoatuga, ne olo laua ki te fale tapuaki o te kau Iutaia.

11E sili atu a tino i kona i te ala olotou mafaufau, kae talia gofie ne latou a te talaiga i lo tino Tesalonia. Ne sukesuke malosi foki latou ki muna mai te Tusi i aso takitasi, e fakatalitonu ei ne latou me tonu a muna a Paulo.

12E tokouke latou ne talitonu; e tokouke foki a fafine ma'luga o Eleni ko talitonu e pela foki mo tagata.

13I te lagonaga ne tino Iutaia i Tesalonia i a Paulo ko lauga foki i te muna a te Atua i Pelea, ne o'mai foki latou ki kona o fakamakosu a loto o tino o te fa'kai.

14A te kau taina konei, ne uga fakavave ne latou a Paulo ke fano ki tai o 'sala sena auala ki Atenai, ka ko Sila mo Timoteo ne 'nofo i Pelea.

15A te kau kola ne olo mo Paulo, ne olo fakatasi foki eiloa mo ia ki Atenai. Kae ne toe 'foki mai latou ki Pelea, mo te fakatonuga a Paulo ki a Sila mo Timoteo ke vave atu ki a ia.

Ko te Galuega i Atenai

16Ka koi fakatali Paulo ki a Sila mo Timoteo i Atenai, ko oko eiloa i te 'mae o tena loto i te lavea atu ne ia te fa'kai ko fonu eiloa i tupua.

17Tela, fakakinau ei latou mo te kau Iutaia mo tino o fenua fakaatea kola ne tapuaki ki te Atua i loto i te fale tapuaki; e masani sale foki a ia o faipati i loto i malae ki tino kola e fetaui mo ia i aso takitasi.

18E isi ne faiakoga o te kau Epikulo mo te kau Setoiko ne fakakinau mo ia. Muna nisi tino, “Se a te mea e taumafai ei a te tagata valea mo te fakamatamata tenei o faipati ki ei?”

Kae fai ake nisi tino, “E pela me faipati a ia e uiga ki atua fakaatea.” Ne fai olotou muna konei ona ko te lauga atu ne Paulo a Iesu mo tena toetu.

19Ne puke ne latou a Paulo o avatu ki mua o te Fono o Aleopako, kae fai atu: “E fia iloa ne matou me se a te akoakoga fou tenei e faipati koe ki ei.

20A nisi o mea kola ne lagona ne matou ne faipati ne koe, ko oko eiloa i te fou i te motou fakalogo, kae fia malamalama i a matou me ne a uiga o mea kona.”

21Ko se toe iai ne mea e fai ne tino Atenai mo tino fakaalofa kola e 'nofo i ei, na ko te talatala atu mo te fakalogologo ki nisi mea fou.

22Ne tu Paulo i mua o te Fono o Aleopako, kae fai atu: “Tino Atenai! E matea ne au koutou ko oko eiloa i te fia'fia ki tapuakiga valevale.

23Au ne fano sale i loto i te fa'kai, kae matea ne au a koga kola e tapuaki sale koutou i ei, ne matea foki ne au te fata faitaulaga mo te muna tenei e tusi i ei, ‘Mō te Atua e se iloa ne matou tona igoa.’ Ko ia tenei e tapuaki koutou ki ei kae se iloa ne koutou tena igoa, kae tenei e fakailoa atu ne au ki a koutou.

241Tupu 8.27; Isa 42.5; Galu 7.48Ko te Atua tela ne fai ne ia a te lalolagi mo mea katoa i ei, ko te Aliki o te lagi mo te lalolagi, kae se nofo i fale tapu ne faite ne tino.

25E se manako a ia o maua mai se mea mai galuega a tino mō ia, me ko ia fua e tuku mai ne ia te ola mo te manava, mo mea katoa eiloa ki tino katoa.

26Mai te tagata e tokotasi, ne faite ei ne te Atua a itukaiga o tino katoa, kae ne fai foki ne ia ke ola latou i luga i te lalolagi katoa. Ko leva foki ne fakatoka ne ia te taimi tonu mo te fakagataga o koga kola e ola ei latou.

27Ne fai ne ia te mea tenei, ko te mea ke 'sala atu latou ki te Atua, i te fakamoemoe ka maua ne latou a ia i te salasala atu ki a ia; ka ko ia foki e se 'mao mai i a tatou takitokotasi.

28Me

‘Ko ia e ola kae gasue'sue ei tatou.’

E pela mo muna a nisi fatupese o koutou,

‘A tatou foki ko tena fanau.’

29Ona ko tatou ko fanau a te Atua, e se 'tau mo tatou o taofi pela i te uiga o te Atua e tusa mo se aulo, io me se siliva, io me se fatu taua. Tela ne fakafoliga ne se tino ki se mea i tena poto mo tena atamai.

30Ne seki saga te Atua ki te toe taimi tela koi va'lea ei a tino, nei ko fakatonu atu ne ia a tino katoa kola e 'nofo i so se koga ke 'fuli keatea mai i olotou auala ma'sei.

31I te mea ko oti ne fakamoe ne ia te aso ka fakamasino ei ne ia te lalolagi katoa ki te amiotonu, e alatu i te tino tela ko oti ne filifili ne ia. Ko oti ne fakamaoni ne ia a te mea tenei ki tino katoa, i te toe fakatumaiga o te tino tenei mai te mate.”

32I te lagonaga ne latou a Paulo e faipati ki te toetu mai te mate, e isi ne tino ne fakatauemu ki a ia, ka ko nisi tino ne fai ake penei, “A matou e fia faka'logo ke toe faipati mai koe ki te mataupu tenei.”

33Oti ake, fano ei Paulo keatea mai te fono.

34E isi ne tino ne olo tasi mo ia ko talitonu; a nisi i a latou kona ko Taionusio, se tino o te Fono o Aleopako, mo te fafine e igoa ki a Tamali, mo nisi tino ake foki.