SALAMO 34 - Tuvalu Revised Bible

Ko Tavaega ki te Aga'lei o te Atua

1Au e fakafetai faeloa ki te Aliki;

E se gata eiloa aku tavaega ki a ia.

2Ka tavae atu au ki a ia i ana mea ne fai;

Ke faka'logo kae fiafia a tino katoa kola e puapuagatia!

3Ke takutaku fakatasi atu ne tatou te malu o te Aliki;

Ke tavae foki fakatasi tatou ki tena igoa!

4Au ne talo ki te Aliki kae ne tali mai a ia ki a au;

Ne fakasao ne ia au i mea katoa ne mataku au ki ei.

5A tino puapuagatia ne kilo ki a ia kae fia'fia;

Ka se toe fanoa'noa eiloa latou.

6Ne ka'laga atu ki a ia a tino puapuagatia kae ne tali mai a ia;

Ne fakasao ne ia latou mai olotou puapuaga katoa.

7E leoleo ne tena agelu a latou kola e ma'taku ki te Aliki kae fakasao ne ia latou mai mea faiga'ta.

8 1Pete 2.3 Mafaufau ake la koe ki te lasi o te aga'lei o te Aliki.

Amutia latou kola e faka'lafi atu ki a ia.

9Faka'logo ki te Aliki, a ona tino katoa;

A latou kola e faka'logo ki a ia e maua faeloa mea e ma'nako latou ki ei.

10E oko foki eiloa ki leona e likiliki me ko seai ne olotou meakai;

Ka ko latou kola e fakalogo ki te Aliki e se mativa i mea 'lei.

11Oku taugasoa tuputupu, o'mai o faka'logo mai ki a au,

Ke akoako atu ne au a koutou ke ma'taku ki te Aliki.

12 1Pete 3.10-12 E a, e manako koe ki se olaga fiafia?

E a, e manako koe ke ola loa kae fiafia?

13Sa faipati la ki pati ma'sei mo pati loi.

14Sa toe fai a mea ma'sei, kae fai mea lei;

Taumafai ke maua ne koe te filemu mo tou loto katoa.

15A te Aliki, e onoono faeloa ki tino amiotonu kae talia foki olotou fakatagi;

16Kae se fiafia a ia ki a latou kola e fai amioga ma'sei,

E vave puli latou mafai e 'mate latou.

17A tino amiotonu e ka'laga ki te Aliki,

Kae e lagona ne ia; e fakasao foki ne ia a latou mai olotou puapuaga katoa.

18Te Aliki e nofo pili ki a latou kola e loto vaivai,

E fakasao foki ne ia a latou kola ko seai ne olotou fakamoemoega.

19E uke a mea faiga'ta e oko ki te tino amiotonu,

Kae fakaola a ia ne te Aliki mai mea katoa kona.

20 Ioa 19.36 E tausi faka'lei a ia ne te Aliki;

E seai eiloa se ivi o ia e fati.

21Ka tamate ne te masei a tino amio ma'sei;

A latou kola e takalialia ki tino amiotonu ka fakasalagina.

22Ka fakasao ne te Aliki ana tino;

A latou foki kola e olo atu ki a ia mō se puipuiga ka fakaolagina.