IOPU 27 - Tuvalu Revised Bible

Iopu

1-2Au e tauto i te igoa o te Atua Malosi,

Tela ne seki fakamasino ne ia a au mo te faimeatonu, Tena ne fakapuapuaga ne ia toku olaga,

3Ke oko eiloa ki te taimi e fakagata ei ne te Atua toku manava,

4Ka ko oku laugutu ka se mafai o faipati ki se muna masei,

Ka se mafai foki eiloa ne toku laulaufaiva o fai se tala loi.

5E se mafai eiloa ne au o fai atu ki a koutou me e tonu otou pati ne fai;

Au e makeke eiloa i a au e se 'se ke oko eiloa ki te aso e mate ei au.

6Ka tumau eiloa au i toku talitonuga i au e tonu;

A toku mafaufau e lei faeloa.

7A tino kola e teke kae faitaua ki a au,

Ke fakasalagina e pela mo tino amio masei.

8Kafai ko oko ki te itula tela ka ta ei ne te Atua a tino masei,

E a, e mata e isi se fakamoemoega o latou ke sao latou?

9Kafai e oko mai fakalavelave, e mata e lagona ne te Atua olotou tagi?

10Ne tau mo latou o malie i te fiafia tela e aumai ne ia;

Ne tau foki mo latou o talo faeloa ki a ia.

11O'mai ke akoako atu ne au koutou, ke iloa ne koutou a te lasi o te mana o te Atua,

Kae fakamatala atu foki ne au a fuafuaga ko oti ne fakatoka ne te Atua Malosi.

12Kae nei, ko oti ne lavea ne koutou ki otou mata;

Ai a la e faipati fakavalevale ei koutou?

(Sofala)

13E fakasala penei ne te Atua Malosi a tino amio masei, mo tino fakasaua.

14E mafai ne latou o fakatokouke olotou fanau, ka ko te fakalavelave, ka mate katoa latou i te taua;

A olotou fanau e se ti lava sale a mea e kai ei.

15A tino kola e toe mai ka mate i famai, kae ke oko foki eiloa ki avaga a latou kola koi ola,

Ka se tagi i te mate o latou.

16A tino masei ko oko eiloa i te uke o olotou siliva,

Ko se maua o lau, pela foki mo gatu,

Ko uke atu i te mea e manakogina ne latou;

17Kae e isi eiloa ne tagata lei ka mai o pei ki gatu kae e isi foki ne tagata amiotonu ka puke ne latou a siliva.

18A tino masei e faite olotou fale pela me se pogaleveleve o te naleau,

Io me e pela mo te fale o te pologa tela e tausi ne ia te fatoaga.

19I se taimi e tasi, ka moe ifo olotou mata mo te maumea lasi, kae kafai ko pula aka,

Ko seai mai fua ne koloa a latou.

20A te mataku ka oko mai ki a latou e pela me se lofiaga;

Ka oko mai te matagi i te po kae ka agina latou keatea;

21Ko te matagi mai i te saegala ka pusi ne ia latou keatea mai i olotou fale;

22Ka agi mai ki a latou mo te se alofa i te taimi e taumafai ei latou o tele ke sao.

23Ka gulu atu te matagi ki a latou i te taimi e tele ei latou o fakamatakutaku latou ki tena mana fakamataku.