NUMELA 23 - Tuvalu Revised Bible

1Muna a Palaamo ki a Palako, “Faite ne fata-fai-taulaga e fitu i konei, aumai ki a au e fitu pulumakau tagata, kae fitu foki mamoe tagata.”

2Ne fai eiloa ne Palako te mea ne fai atu ne Palaamo, tena, ne ofo ei ne laua e tasi te pulumakau tagata mo te mamoe tagata e tasi i luga i fata-fai-taulaga takitasi.

3Tena, ne fai atu ei a Palaamo ki a Palako penei, “Tu i konei, i tafa o tau taulaga sunu tenei, ke fano au o onoono aka me e vau te Aliki o fakafetaui mai ki a au me ikai. Ka fakailoa atu ne au a te fekau e fai mai ne ia ki a au.” Tena, ne fano ei a Palaamo ki te ulu o te mauga foniki,

4kae ne fakafetaui atu ki a ia a te Atua i kona. Muna a Palaamo ki te Aliki, “Ko oti ne faite ne au a fata-fai-taulaga e fitu, kae ne ofo ne au i luga i fata-fai-taulaga takitasi e tasi te pulumakau tagata mo te mamoe tagata e tasi.”

5Ne fai atu ne te Aliki a te fekau e tau o fai ne ia, tela ne uga atu ei ne ia ke foki ki a Palako o fai te fekau tena ki ei.

6Ne foki atu Palaamo, maua atu ne ia a Palako koi tu mai eiloa i tafa o tena taulaga sunu, fakatasi mo takitaki katoa o te fenua o Moapi.

7Tena, ne faipati ei ne Palaamo te valoaga tenei:

“A te tupu o Moapi ko Palako ne aumai ne ia a au

Mai Sulia, mai te fenua mauga i te saegala.

A Palako ne fai mai ke vau au o fai tena fekau

Ke fakamalaia ne au a tino Isalaelu.

8E mafai pefea ne au o muna tuku a tino kola e seki muna tuku ne te Atua,

Io me fakamalaia latou kola e seki fakamalaia ne te Aliki?

9Mai luga i kaupapa ma'luga e lavea ne au a latou;

E mafai o lavea ne au latou mai luga i mauga foniki.

A latou se malo tela e nofo tokotasi;

E iloa ne latou me ko latou fua e lasi atu te olotou fakamanuiaga i malo katoa.

10A te fanau a Isalaelu e pela me ne one

Ko se mafai o lau i te tokouke

Tuku mai au ke mate e pela me se tino o te fenua o te Atua;

Tuku mai au ke mate mo te filemu, e pela mo tino amiotonu.”

11Tena, ne fai atu ei a Palako ki a Palaamo penei, “Se a te mea tenei ko oti ne fai ne koe ki a au? Ne aumai ne au a koe ke fakamalaia ne koe oku fili, ka ko tau mea tenei e fai ko te fakamanuiaga o latou.”

12Ne tali atu Palaamo, “A te mea e faipati ne au ko te mea e fai mai ne te Aliki ke faipati atu ne au.”

Ko te Lua o Valoaga a Palaamo

13Ne toe fai atu a Palako ki a Palaamo penei, “Vau ke olo taua ki te sua koga tela ka matea ei ne koe se vaega foliki fua o tino Isalaelu. Au e manako ke fakamalaia ne koe a latou mai te koga tena.”

14Tena, ne olo ei laua ki te kogā laukele o Sofima i luga i te Mauga o Peseka. I kona ne faite foki ei e fitu a fata-fai-taulaga kae ne ofo i fata-fai-taulaga takitasi, e tasi te pulumakau tagata, kae tasi te mamoe tagata.

15Muna a Palaamo ki a Palako, “Vau o tu i tafa o tau taulaga sunu, ke fano mua au o fakafetaui ki te Atua i te koga tela.”

16Ne fanatu te Aliki ki a Palaamo, fai atu ki a ia a muna e tau o faipati ne ia, uga ei ne ia ke foki atu ki a Palako o fai te fekau tena.

17Tena ne foki atu ei a Palaamo, maua atu ne ia a Palako koi tu mai eiloa i tafa o tena taulaga sunu, fakatasi mo takitaki katoa o Moapi. Ne fesili atu a Palako me ne a muna a te Aliki,

18tena, ne folafola atu ei ne Palaamo a te valoaga tenei:

“Palako te tama tagata a Sipola, vau o fakalogologo ki te fekau ka fai atu ne au.

19A te Atua e se pau mo te tagata, tela e masani o loi;

A ia e se pela mo tino e fulifuli sale olotou mafaufau.

So se mea e tauto a ia ke fai, e fai eiloa;

E fai tena muna, te mea eiloa ko taunu.

20A te fakatonuga ne fai mai ki a au, ko au ke fakamanuia atu.

Kafai ko oti ne fakamanuia ne te Atua so se tino me se fenua,

E se mafai eiloa ne au o toe taofi mai a te fakamanuiaga.

21E seai eiloa se fakalavelave ka oko ki Isalaelu.

A te Aliki te lotou Atua e fakatasi eiloa ki a latou;

E folafola ne latou i te Aliki ko te lotou tupu.

22Ko te Atua ne aumai ne ia latou mai Aikupito;

A te Atua e taua mo latou e pela me se pulumakau vao.

23E seai ne vailakau, seai ne fakataulaitu

E mafai o fakatakavale ki ei a Isalaelu.

A tino ka faipati penei e uiga mo Isalaelu,

‘Kiloke ki mea ne fai ne te Atua!’

24A te malo o Isalaelu e pela me se leona fakamataku!

E se mafai o filemu, vagana ke oti ne saesae io me folo ne ana tino;

Vagana ke oti ne inu ne ia a toto o tino ne tamate ne ia.”

25Tena ne fai atu ei a Palako ki a Palaamo penei, “A koe e ita ma fakamalaia a tino Isalaelu; fakamolemole la, sa fakamanuiagina latou!”

26Ne tali atu Palaamo penei, “Au ne fai atu ki a koe me e tau eiloa o fai ne au a mea katoa kola ne fai mai ne te Aliki ki a au.”

Ko te Tolu o Valoaga a Palaamo

27Muna a Palako, “Vau ke olo taua ki te sua koga. E se taumate kaati ka talia ne te Aliki ke fetu ne koe a tino Isalaelu mai i te koga tena.”

28Tena ne olo atu ei laua ki te ulu o te Mauga o Peolo tela e takato fakasau mai ei a te toafa.

29Muna a Palaamo ki a Palako, “Faite ne fata-fai-taulaga e fitu, kae aumai ne pulumakau tagata e fitu, mo ne mamoe tagata foki e fitu.”

30Ne fai eiloa ne Palako te fakatonuga tena, ofo ei ne ia i luga i fata-fai-taulaga takitasi, e tasi te pulumakau tagata kae tasi te mamoe tagata.