NUMELA 9 - Tuvalu Revised Bible

Ko te Lua o Paseka

1 Eso 12.1-13 A te Aliki ne faipati ki a Mose i te Vao o Sinai i te masina muamua o te lua o tausaga ne tiaki ei ne tino Isalaelu a te fenua o Aikupito. Muna a ia penei,

2e tau mo te fanauga a Isalaelu o tausi te taimi tonu e fai ei te Paseka.

3“I te po sefulu fa o te masina tenei, e kamata i te taimi e to ei te la, e tau mo tino Isalaelu o fakamanatu a te Paseka kae fai eiloa pela mo tulafono o te fakamanatuga o te Paseka.”

4Tena, ne fai atu ei a Mose ki tino Isalaelu ke fakamanatu a te Paseka;

5ko te afiafi o te po sefulu fa o te masina muamua ne fakamanatu ei ne latou a te Paseka i te Vao o Sinai. Ne fai eiloa ne tino Isalaelu a mea katoa, e pela eiloa mo te fakatonuga a te Aliki ki a Mose.

6Kae e isi ne tino e lai'lai faka te lotu me ne pa'tele ki foitino o tino mate, tela la, ko se mafai ne latou o fakamanatu a te Paseka. Ne olo atu latou ki a Mose mo Alona

7kae fai atu penei: “Matou ko lailai faka te lotu, me i matou ne puke ki foitino mate, ai a ka se kau ei matou ki tino katoa o Isalaelu o ofo atu taulaga ki te Aliki?”

8Ne tali mai a Mose penei, “Fakatali ke maua mai se tali mai i te Aliki.”

9Ne fai mai te Aliki ki a Mose,

10ke fai atu ki tino Isalaelu penei, “Kafai e isi ne tino i a koutou, pela foki otou fanau fakamuli, e lai'lai me ne pa'tele ki foitino mate, io me ne olo malaga, kae e ma'nako eiloa o fakamanatu a te Paseka,

11ko tena uiga e mafai o fakamanatu ne koutou i te sua masina, i te po sefulu fa o te lua o masina. Ke fakamanatu ne koutou ki falaoa se palu ki te isi mo lakau 'kona.

12Eso 12.46; Ioa 19.36 Sa faka'toe ne meakai ki te sua taeao, kae sa fatigina se ivi o se manu vae fa. Fakamanatu a te Paseka, ke tusa eiloa mo fakatonuga o te faifaiga o te aso fakamanatu tena.

13Ka ko tino kola e 'ma faka te lotu, mo tino kola e seki olo ki se koga, kae e se fakamanatu ne latou a te Paseka, ka se toe taku ne tino o toku fenua, me ne seki ofo mai ne latou te taulaga i te taimi ko oti ne fakamoe. Ka maua ne latou te ikuga o te lotou agasala ne fai.

14“Kafai se tino fakaalofa e nofo tasi koutou kae e fia fakamanatu ne ia a te Paseka, e tau eiloa o tautali i fakatonuga o te faiga o te aso fakamanatu tena. A te tulafono tena e fakasino ki so se tino, me se tino Isalaelu io me se tino fakaatea.”

Ko te Kaumana Afi(Eso 40.34-38)

15-16I te aso ne fakatu ei a te Faleie o te Aliki, ne fanaifo a te kaumana o ufi katoa ne ia. I te po, a te kaumana e pela me se afi.

17I te taimi e masagi aka ei a te kaumana, ko tino Isalaelu eiloa ko tala olotou faleie o fakatoka o ma'laga. Ko te koga e fanaifo ei te kaumana, ko te koga foki tena ka toe faka'tu ei olotou faleie.

18A te talagā o faleie o tino Isalaelu, mo te toe faka'tuga i se isi koga aka, e fakatonu mai katoa ne te Aliki. Ko te leva o te kaumana tena i luga o te Faleie o te Aliki, ko te leva foki tena o latou i te koga tena.

19Me e pefea eiloa te leva o te kaumana i luga o te Faleie o te Aliki, e faka'logo eiloa a tino Isalaelu o se ga'sue ki se koga.

20E isi ne taimi, a te kaumana e fia fua a aso e tu ei i luga i te Faleie. A tino Isalaelu, e fakalogo eiloa ki te taimi e fai mai ei te Aliki ke fakamasiki ki se koga.

21I nisi taimi, a te kaumana e nofo mai fua i te afiafi kae toe masiki i te taeao, tena la, e fano eiloa a te malaga a latou mafai ko masiki a te kaumana. I te taimi eiloa e masiki ei a te kaumana ko te taimi foki eiloa tena e fakatoka ei latou o tiakina te koga tena.

22Faitalia eiloa me e lua a aso, io me e tasi te masina, io me se tausaga e tasi e tu ei te kaumana i luga o te Faleie o te Aliki, e se gasue eiloa latou ki se koga; ka ko te taimi eiloa e masiki ei te kaumana, ko latou eiloa ko fakatoka o olo keatea mai i kona.

23A te ma'siki o latou mo te nofo o latou e fakatonu mai eiloa ne te Aliki ki a Mose, kae e faka'logo eiloa latou ki ei.