SALAMO 88 - Tuvalu Revised Bible

Ko te Fakatagi mō se Fesoasoani

1Te Aliki te Atua toku fakaola, au e tagi ki a koe i te aso katoa,

Kae e fakapilipili atu au ki a koe i te po.

2Fakalogo mai ki taku talo;

Kae saga mai ki taku fakatagi mō se fesoasoani!

3Momea eiloa kae mate au i te uke o fakalavelave ne oko ki a au.

4Au e pela eiloa mo nisi tino katoa kola ka fai o mate,

Mo toku malosi foki ko seai lele eiloa.

5Au ne tiakina i te fenua o tino 'mate,

E pela eiloa au mo tino kola ne 'ta ke mate e 'moe i olotou tanuga,

Kola ko puli lele i a koe,

Ko se toe maua foki se fesoasoani mai i a koe.

6Ko oti ne pei ne koe au ki te koga 'poko o te tanuga,

Ki te lua 'poko mo te pouli tagataga.

7Ko oko eiloa te malosi o tou ita ki a au,

Ka ko logofiofio eiloa au i tou kaitaua.

8Ko oti ne fai ne koe oku taugasoa ke tiaki au,

Ka ke takalia'lia mai foki oku fili ki a au.

Au ko i loto i te lotou malei, ko faigata o sao;

9Ko vaivai oku mata i te fita.

Te Aliki, au e kalaga sale atu eiloa ki a koe i aso katoa,

Kae sisi ake oku lima ki a koe i aku talosaga.

10E a, e fai ne koe a vavega mō tino 'mate?

E a, e toe 'tu a latou o 'viki atu ki a koe?

11E a, e takutaku ne tino 'mate tou alofa tumau i olotou tanuga,

io me ko tou fakamaoni i te koga o te malaia?

12E a, e lavea au vavega i te koga pouli tena,

io me ko tou atafai i te fenua o te malaia?

13Te Aliki, au e kalaga atu ki a koe mō se fesoasoani;

E 'talo atu au ki a koe i taeao katoa.

14Te Aliki, ai a ko fulitua mai ei koe ki a au?

Ai a ko muni ei koe mai i a au?

15Talu mai taku folikiga, au ne puapuagatia kae momea eiloa kae mate au;

Au ko fi'ta mai te 'mafa o au fakasalaga.

16A tou kaitaua fakamataku ko oko mai ki a au;

Mo tou oso ita fakamataku ko fakamasei ne ia a au.

17I aso katoa ko nikoi au ne latou e pela mo se lofiaga;

Ko ii mai latou ki a au i feitu katoa.

18E oko foki ki oku taugasoa pili, ne fai ne koe ke tiakina mai au,

Na ko te pouliga fua ko toku taugasoa tenei e 'toe mai.