IOPU 31 - Tuvalu Revised Bible

1Ko oti ne fai ne au se tautoga malu, ke mo a e kilo oku mata ki se fafine mo toku loto lailai.

2Se a te mea a te Atua Malosi e fai ki a tatou? E taui pefea ne ia a faifaiga a tino?

3E aumai ne ia a puapuaga mo te fakamasei ki a latou kola e fai mea 'se.

4E iloa ne te Atua aku mea katoa e fai; e lavea ne ia oku auala katoa.

5Au e tauto me ne seki fai eiloa ne au ne amioga masei,

Kae seki fakaloiloi foki eiloa ne au a nisi tino.

6Te Atua ke fua ne ia au i fua mea mafa kola e tonu katoatoa, kae ka iloa ne ia i au e se 'se.

7Kafai au ne kalo keatea mai i te auala tonu,

Io me ne tautali au i te masei,

Kafai ko fonu oku lima i te agasala,

8Ko 'tau ei o tuku atu aku lakau kaina ke fakamaseigina,

Io me o'mai a tino o kai a mea ne toki ne au.

9Kafai au ne manako ki te avaga a toku tuakoi,

Kae ne muni au o fakatalitali ki ei i tua o tena mataloa,

10Ko tuku atu la ei taku avaga ke 'tunu ne ia a meakai a te sua tagata kae ke 'moe i te moega o te sua tagata.

11A vaega amioga masei pena e tau o fakasala ki te mate.

12Ka pela me se afi fakamataku tela e sunu ei aku mea katoa.

13Kafai se tavini a aku e tagi mai ki a au,

Me e isi se mea e se malie ei,

Au e fakalogologo eiloa ki tena tagi,

Kae e fai eiloa ne au ki ei a te mea tonu.

14Kafai ne seki fai ne au, e mafai la pefea ne au o fakafesagai te Atua?

Ne a aku pati ka fai manafai ko vau te Atua o fakamasino au?

15A te Atua ne faite ne ia a au, ko te Atua foki tena ne faite ne ia taku tavini.

16E seki ai se taimi kai ita ei au ma fesoasoani ki tino mativa;

E seki tuku tiaki foki eiloa ne au a fafine ko mate olotou avaga ke nofo puapuaga;

17E seki tiakina foki eiloa ne au a tamaliki ko mate olotou matua ke olo mo te fiakai i te taimi e kai ei au.

18Ne saga eiloa au o tausi a latou kona i aso ne ola ei au.

19Kafai ne maua ne au se tino mativa tela ko se maua eiloa ne ia o togi ne gatu mo ia,

20E ave eiloa ne au ki ei a laugatu ne faite ki vulu,

Ko vulu mai aku mamoe.

Tena la, ko tavae ei ne ia a au mo tena loto katoa.

21Kafai ne fakaloiloi ne au se tamaliki ko seai ne ana matua,

Me e iloa ne au i au e mafai o manumalo i te fono tulafono,

22Ko tau la ei o fatifati aka oku lima,

Kae ke 'to keatea foki mai i oku tuauma.

23Ona ko au e mataku i te fakasalaga a te Atua,

Tena te pogai e se mafai ei ne au o fai se vaega mea pena.

24Au ne seki talitonu eiloa ki te aoga o koloa

25Io me fakamatamata i toku maumea.

26E seki tapuaki foki eiloa au ki te la ona ko tena mainaga io me ko te masina ona ko tena gali.

27E seki mafuli eiloa au o fakaaloalo ki ei,

O sogi oku lima o fakaasi toku fakaaloalo ki ei.

28A te vaega agasala pena e tau o fakasala ki te mate;

E fakaseaoga ne ia te Atua Malosi.

29E seki ai eiloa se taimi kai fiafia ei au manafai e puapuaga oku fili,

Io me katakata manafai ko maua latou ne fakalavelave;

30E seki agasala eiloa au i te agasala ko te talo ke mate oku fili.

31A tagata katoa kola e galue i a au, e iloa ne latou me e tali lei faeloa ne au a tino fakaalofa.

32E aumai ne au a tino faimalaga ki loto i toku fale,

Kae seki tuku eiloa ne au latou ke moe i auala.

33A nisi tagata e taumafai o funa olotou agasala,

Ka ko au e se mafai ne au o funa aku agasala.

34Au e seki mataku eiloa ki muna a tino e taumafai o fai;

Au e seki nofo mū eiloa io me nofo i loto i fale,

Me i a au e mataku i olotou gutu kotekote.

35E a, e seai se tino e fakalogo mai ki aku muna konei e fai atu?

Au e tauto atu me i muna kona e tonu katoa.

Te Atua Malosi ke tali mai ki aku muna ne fai.

Kafai ne fakamau ki lalo a te molimau o aku fili o teke ki a au,

Ko te mea ke lavea ne au,

36Kaati e fakamau eiloa ne au mo te fakamatamata i toku tuauma kae na i toku ulu e pela me se kalauna.

37Ka fakamatala ne au ki te Atua aku mea katoa ne fai,

Kae ne fanatu au ki mua o te Atua mo toku ulu e fakatutonu eiloa ki luga.

38Kafai ne kaisoa ne au a te laukele tenei e toki ne au

Io me ne puke ne au mai i tino kola e o latou tonu te laukele;

39Kafai ne kai ne au a fuaga o lakau e ola i kona kae tuku a tino toki lakau kola ne toki ne latou ke fia'kai,

40Ko tau la ei ke ola fua i kona a mouku mo lakau makaikai,

Kae ke se ola i ei ne saito mo kalite.

Ko gata i kona muna a Iopu.