2 TUPU 24 - Tuvalu Revised Bible

1 Iele 25.1-38; Tani 1.1,2 I te taimi o te nofoaiga a Ieoiakimo i Iuta, ne puke ei ne Nepukanesa, te Tupu o Papelonia, a te fenua o Iuta, kae e tusa mo te tolu tausaga ne nofo ei Iuta mai lalo o te pulega a te tupu o Papelonia. I te katoaga o te tolu tausaga, ko Ieoiakimo eiloa ko teke atu ki Papelonia.

2Ne uga mai ne te Aliki a kautau Papelonia, Sulia, Moapi, mo kautau Amoni ke taua ki a Ieoiakimo kae fakamasei a Iuta, e pela eiloa mo ana muna ki ana pelofeta.

3Ne tupu te mea tena mai luga i te fakatonuga a te Aliki, ko te mea ke galo atu a tino Iuta mai ona mua ona eiloa ko agasala kola ne fai ne te Tupu ko Manase,

4I te tamatega ne ia o tino e seai ne mea 'se a latou ne fai. E se mafai ne te Aliki o fakamagalo a Manase i te mea tena.

5A nisi tala e uiga ki a Ieoiakimo e fakamau katoa i te tusi o Te Tala Tuku Fakasolo o Tupu o Iuta.

6Ne mate atu Ieoiakimo, kae sui ne tena tama tagata ko Ieoiakini o fai mo tupu.

7A te tupu o Aikupito mo tena kautau e seki toe olo eiloa keatea mo Aikupito, me i te tupu o Papelonia ko pule nei ne ia a kogā laukele katoa kola e o Aikupito, e kamata mai i te Vaitafe o te Eufilate ke oko ki te tuakoi ki matu o Aikupito.

Ko Ieoiakini, te Tupu o Iuta(2NTupu 36.9-10)

8A Ieoiakini ko sefuluvalu ona tausaga kae fai mo tupu o Iuta, kae ne tupu a ia i Ielusalema i masina e tolu. A tena matua ko Neusita, te tama fafine a Elenatano mai Ielusalema.

9A Ieoiakini ne agasala ki te Aliki e pela eiloa mo tena tamana.

10Ko te taimi o tena nofoaiga ne vau ei te kautau a Papelonia tela e takitaki ne ofisa a Nepukanesa o taumafai o puke Ielusalema.

11I te taimi tena, ne oko atu eiloa a Nepukanesa ki Ielusalema,

12Iele 22.24-30; 24.1-10; 29.1,2 tena ne fakatakavale ei ne ia a Ieoiakini, mo tena matua, mo ana tama tagata, mo ana ofisa mo ofisa o te palesi. I te valu o tausaga o te nofoaiga a Nepukanesa,

13ne ave fakapagota ei ne ia a Ieoiakini kae ave katoa foki ne ia ki Papelonia a koloa katoa i te Faletapu pela foki mo koloa i te palesi. Ne fatifati katoa ne Nepukanesa a meafale aulo pela mo sipunu mo tui, kola ne faite ne Solomona ke fakaaoga i te Faletapu, tena ko taunu ei a te valoaga a te Aliki ne fai.

14Ne puke fakapagota ne Nepukanesa a tino o Ielusalema e aofia i ei a pelenise katoa, mo takitaki katoa; a te aofaki katoa o latou e tusa mo te sefulu afe. Ne ave foki ne ia a tino poto katoa i faiga o galuega, pela foki mo tino poto i faiga o galuega ki fiti, tena, ko tino ma'tiva eiloa e toe mai i Iuta.

15 Esela 17.12 Ne ave fakapagota ne Nepukanesa a Ieoiakini ki Papelonia, fakatasi mo tena matua, mo ana avaga, mo ana ofisa, mo takitaki o Iuta.

16Ne ave katoa ne Nepukanesa a tino ma'luga katoa ki Papelonia, e tusa mo te fitu afe te katoaga o latou, kae tokoafe tagata poto i galuega, e aofia ei a tino poto i faiga o galuega ki fiti; a latou katoa kona ne tagata ma'losi, kae e mafai o fai a tiute fakasotia.

17 Iele 37.1; Esela 17.13 Ne fakasopo ne Nepukanesa a te taina o te tamana o Ieoiakini ko Matania ke fai mo tupu o Iuta, kae sui ne ia tena igoa ki a Setekaia.

Ko Setekaia te Tupu o Iuta(2NTupu 36.11-12; Iele 52.1-3a)

18 Iele 27.1-22; 28.1-17 A Setekaia ko tusa mo te luasefulu tasi ona tausaga kae fai mo tupu o Iuta; ne tupu a ia i Ielusalema i tausaga e sefulutasi. A tena matua ko Amutala, te tama fafine a Ielemia se tagata mai te fa'kai o Lipina.

19Ne agasala Setekaia ki te Aliki, e pela eiloa mo te Tupu ko Ieoiakini.

20Esela 17.15 Ne kaitaua malosi eiloa te Aliki ki tino o Ielusalema mo Iuta, tena ne ave keatea ei ne ia latou keatea mai ona mua.