2 SAMUELU 3 - Tuvalu Revised Bible

1A te taua i te va o tino kola e kau i te kaiga o Saulo mo tino e kau i a Tavita ne tumau eiloa i se taimi tai leva eiloa. Ne gasolo aka eiloa o malosi a te kau a Tavita, ka ko ana fili ko ga'solo ifo eiloa o vai'vai.

Ko Tama Tagata a Tavita

2Konei a igoa o te tokoono tama tagata a Tavita kola ne fa'nau i Hepelona, e fakasolo eiloa mai te toekimua o fano ki lalo: ko Amanono, tena matua ko Ainoama mai i Ieseleelu;

3Ko Kiliapa, tena matua ko Apikaila, te avaga a Napalu tela ko oti ne mate, mai Kalamelu; ko Apisaloma, tena matua ko Maaka, te tama fafine a Talamai, te tupu o Kesula;

4ko Atonia, tena matua ko Hakita; ko Sefatia, tena matua ko Apitala;

5ko Iteleamo, tena matua ko Ekela. A tama tagata katoa kona, ne fa'nau i Hepelona.

Apinelu ko Kau i a Tavita

6I te taimi koi taua sale ei a te kau a Tavita mo te kau kola koi tau'tali eiloa ki te kaiga o Saulo, ka ko Apinelu ko gasolo eiloa o maluga i te kau kola e tau'tali i te kaiga o Saulo.

7I te aso e tasi, ne fai a Isoposeta, te tama a Saulo, ki a Apinelu i a ia ne 'moe mo Lisepa, te avaga fakasalasala a Saulo, kae ko te tama fafine a Aia.

8Ne kaitaua Apinelu, muna a ia, “I tau fakatau, e mafai ne au o amio masei pena ki a Saulo? I tau fakatau, au nei e galue mō Iuta? Mai te kamataga, au ne galue eiloa mo tou tamana ko Saulo, pela foki mo ana taina mo ana taugasoa, kae ne fakasao foki ne au a koe mai te takavale i a Tavita; kae nei ko fai mai koe i a au ne agasala mo te fafine!

9-10A te Aliki ne tauto ki a Tavita me ka puke keatea ne ia te malo mai i a Saulo mo tena gafa, kae fai Tavita mo tupu o Isalaelu mo Iuta, mai te sua mata o te fenua ke oko ki te sua mata. A te Atua ke tamate ne ia a au manafai e se fakataunu ne au te mea tena!”

11A Isoposeta ko oko eiloa i tena mataku i a Apinelu, tela la, e seai eiloa sena pati ne fai.

12Ne uga ne Apinelu ana avefekau ki a Tavita i Hepelona mo te fekau tenei, “Ko oi te tino ka takitaki ne ia te fenua tenei? Talia mai ke fai se feagaiga i te va o taua, kae ka fesoasoani atu au ke maua ne koe Isalaelu katoa.”

13Ne tali atu Tavita, “Ko 'lei! E talia ne au o fai se feagaiga mo koe, manafai e aumai ne koe a Mekala, te tama fafine a Saulo, i te taimi e vau ei koe ki a au.”

141Samu 18.27 Ne uga foki ne Tavita ana avefekau ki a Isoposeta mo te fekau tenei: “Fakafoki mai taku avaga ko Mekala. E selau muā pakili Filisitia ne togi atu ne au ki a Saulo ke avaga maua mo Mekala.”

15Tena, ne puke keatea mai eiloa ne Isoposeta a Mekala mai tena avaga ko Palatielu, te tama tagata a Laisa.

16A Palatielu ne tautali atu eiloa i tena avaga, kae tagi, ke oko eiloa ki te fa'kai o Paulima. Kae i te faiatuga o Apinelu ki a ia ke foki, te mea eiloa ko foki.

17Ne fanatu Apinelu ki takitaki o Isalaelu, kae fai atu ki a latou penei, “Ko leva eiloa ne ma'nako koutou ki a Tavita ke fai mo otou tupu.

18Tenei la te taimi. Masaua a muna a te Aliki ne fai, ‘Ka fakaaoga ne au Tavita taku tavini ke fakasao ne ia toku fenua ko Isalaelu mai tino Filisitia, pela foki mai nisi fili katoa o latou.”’

19Ne faipati foki Apinelu ki tino i te matakaiga o Peniamina, tena fanatu ei a ia ki Hepelona, o fakailoa ki a Tavita a te mea ko loto ki ei a tino Peniamina mo Isalaelu katoa.

20I te okoatuga o Apinelu ki a Tavita i Hepelona, mo tena kau e tinolua tagata, tena kae fai ei ne Tavita se 'kaiga ki a latou.

21Muna a Apinelu ki a Tavita, “Au nei ka fano o futi mai a tino Isalaelu katoa ke kau atu ki a koe. Ka talia ne latou ke fai koe mo olotou tupu, tena ka taunu ei te mea ne manako sale koe ki ei, ko pule ei koe i te fenua katoa.” Tena ne uga atu ei ne Tavita a Apinelu ke fano mo te saogalemu.

Apinelu ko Tamate

22Fakamuli ifo, ne foki mai a Ioapo mo nisi ofisa a Tavita mai te taua, kae ne aumai ne laua a mea tāua e uke kola ne fao mai i te fili. A Apinelu i te taimi tena, ko se nofo i a Tavita i Hepelona, me ko oti a ia ne uga atu ne Tavita ke fano mo te saogalemu.

23I te okoatuga o Ioapo mo tena kau, kae logo i a Apinelu ne vau ki te Tupu ko Tavita, kae ne uga atu ne Tavita ke fano mo te saogalemu.

24Tena, ne fanatu a Ioapo ki te tupu kae fai atu penei, “Se a tau mea ko oti ne fai? A Apinelu ne vau ki a koe, ai a ne tuku ei ne koe ke fano mo te saogalemu?

25A ia ne vau fua o fakaloiloi koe, ko ia ke alamati ki au mea katoa e fai mo koga e fano koe ki ei. E tau eiloa o iloa ne koe te mea tena!”

26I te fanatuga o Ioapo mai i a Tavita, ne uga ne ia ana avefekau ke puke mai a Apinelu, tena ne aumai ei ne latou a ia mai te vaikeli o Sila; kae e se iloa eiloa ne Tavita.

27I te okoatuga o Apinelu ki Hepelona, ne puke atu a Ioapo o futi mai ki tafa o te pui, pela me e fai ke musumusu a ia ki ei, i kona eiloa, suki eiloa ne ia tena tinae. Tena, ne tamate ei a Apinelu me ne tamate ne ia a te taina o Ioapo ko Asaelu.

28I te logoga a Tavita i te mea tena, muna a ia, “E iloa eiloa ne te Aliki i au mo taku kau e se agasala i te tāga o Apinelu.

29A te fakasalaga ke pakū eiloa ki a Ioapo mo tena kaiga! I tupulaga katoa, ke isi faeloa se tino i tena kaiga e maua ne te poloki, io me e lepela, io me e amio pela me se fafine, io me e mate i se taua, io me e mate i te fiakai!”

30Tena, a Ioapo mo tena taina ko Apisai ne taui ne laua te mate o te la taina ko Asaelu i lima o Apinelu, i te taua i Kipeona.

Ko te Tanūga o Apinelu

31Tena, ne fakatonu atu Tavita ki a Ioapo mo tena kau ke saesae olotou gatu, kae ke 'pei ki lautaga, o 'tagi fanoa'noa mō Apinelu. I te taimi o te tanūga, a te Tupu ko Tavita ne sasale mai i tua o te pusa mate o Apinelu.

32A Apinelu ne tanu i Hepelona, ka ko te tupu ne tagi eiloa i luga i tafa o te tanūga; pela foki a tino katoa.

33Tenei te pese fanoanoa ne usu ne Tavita ona ko Apinelu:

“Ai a ne sona mate ei a Apinelu e pela me se vale?

34A ona lima e seki 'sai,

Mo ona vae e se 'sai foki:

A ia ne mate e pela me se tino ne ta ne tino amio ma'sei!”

Tena, ne toe 'tagi foki ei a tino ona ko Apinelu.

35I te aso kātoa tena, ne taumafai a tino ki a Tavita ke kai aka i se meakai, ka ko Tavita ne tauto penei, “A te Atua ke ta ne ia a au, manafai e kai au i se meakai kae seki palele te aso tenei!”

36Ne lagona ne latou te mea tena, tena ne fia'fia ei latou. So se mea e fai ne te tupu e fiafia faeloa ki ei a tino.

37A tino katoa o Isalaelu e malamalama me e seai eiloa se fekau a Tavita i te mate o Apinelu.

38Muna a te tupu ki ana ofisa, “E se iloa ne koutou me i aso nei, ko mate ei te takitaki e tokotasi mai takitaki takutakua o Isalaelu?

39E ui eiloa i a au ko te tupu ne filifilia ne te Atua, ka ko au e lagona eiloa te vaivai i te aso nei. A tama tagata konei a Seluia ko to sauā katoa. A te Aliki ke fakasala ne ia a tino tatino kona e tusa mo te lotou mea ne fai!”