SALAMO 69 - Tuvalu Revised Bible

Ko te Fakatagi mō se Fesoasoani

1Te Atua, fakasao mai au!

I a au ko tai malemu i te vai;

2Au ka galo ki lalo i te pela 'poko,

Me ko se 'tale oku vae;

Au ko to atu ki te koga poko, ko tai malemu au i galu.

3Au ko vaivai i te kalaga atu mō se fesoasoani,

Ko fa foki toku leo.

A oku mata ko 'mae i te kilokilo atu ki se fesoasoani mai i a koe.

4 Sala 35.19; Ioa 15.25 A latou kola e takalia'lia mai fua ki a au e uke atu i laulu o toku ulu;

A oku fili e fai ne latou a pati 'loi o fakamasei au;

E malosi latou kae ma'nako o tamate a au.

Ne taumafai latou ke tuku atu ne au a mea e seki kaisoa ne au.

5Te Atua, e se galo aku agasala i tau kilokiloga;

E iloa lei ne koe toku valea i aso ko teka.

6Te Aliki te Atua e o koe te Malosi Katoatoa,

Ke mo a ma fakamasiasi ne au a latou kola e fakatuanaki ki a koe!

Te Atua o Isalaelu, ke mo a ma fakamasiasi ne au a latou kola e tapuaki ki a koe!

7Ko fakalumalumagina au ona ko koe;

Ko maua foki au ne te masiasi e pogai mai i a koe.

8Ko fai au e pela me se tino fakaalofa i oku taina,

E pela foki me se tino fakaatea i toku kaiga.

9 Ioa 2.17; Loma 15.3 A toku fia tapuaki i tou Faletapu ko 'ka i toku loto e pela mo se afi;

A muna masei kola ne fai atu ki a koe,

Ko pakū ki luga i a au.

10Au e fakamalalo atu i te fakalikiliki,

Ko muna maseigina ei au ne tino;

11Ne pei au ki gatu o te fanoanoa,

Kae ne fakatauemu mai latou ki a au.

12Ko faipatigina au ne latou i auala,

Kae fatu foki a pese a tino ko'na e uiga ki a au.

13Ka ko au e te Aliki, au e 'talo atu ki a koe;

Te Atua, tali mai ki a au i te taimi ne filifili ne koe.

Tali mai e pela mo te lasi otou alofa,

E pela foki mo tau folafolaga me fakaola ne koe au.

14Fakasao mai au, i a au ka galo ki lalo i te pela;

Fakasao mai foki au mai oku fili,

Pela foki mo te vai 'poko.

15Sa fakaoko mai ki a au a te lofiaga;

Sa tuku atu au ke malemu i te koga 'poko,

io me to ki lalo i te tanuga.

16Te Aliki, tali mai ki a au i te 'lei o tou alofa tumau;

Saga mai ki a au i te lasi o tou loto alofa!

17Sa kalo keatea ou mata mai tau tavini;

Au ko i loto i te puapuaga lasi,

Na tali mai nei ki a au!

18Vau o fakaola au, fakasao au mai oku fili.

19Ko iloa ne koe i a au ne muna maseigina,

Ne fakalumalumagina kae fakamasiasi;

Ko matea katoa ne koe oku fili.

20Ko fatifati toku loto i muna ma'sei,

Au ne fakamoemoe ki se tino ke alofa mai ki a au, kae seai eiloa;

Ne 'sala foki ne au se tino e fakamafanafana mai ki toku loto, kae seai eiloa.

21 Mata 27.48; Male 15.36; Luka 23.26; Ioa 19.28,29 Au ne fia kai, kae ne aumai ne latou te mea poisini ke kai ei au;

Au ne fia inu, kae ne aumai ne latou te vinika ke inu ei au.

22 Loma 11.9,10 Ke fai olotou 'kaiga mo mea e malaia ei latou;

Olotou 'kaiga fakatapuakiga foki ke fai mo mea e pakū ei latou.

23Faka'kivi ake olotou mata!

A olotou tua foki ke vaivai!

24Ita atu ki a latou; kaitaua atu foki ki a latou.

25 Galu 1.20 Ke fakalavaki aka a koga e nofo ei latou;

Ke mo a e isi ne tino ola e 'toe i olotou faleie!

26E fakasaua ne latou a tino kola ko oti ne fakasala ne koe;

E fai'pati latou e uiga ki puapuaga o tino kola ne fakapa'kia ne koe.

27Fakamau ake olotou agasala katoa;

Ke mo a ma maua ne latou se vaega o tau fakaolataga.

28 Eso 32.32; Faka 3.5; 13.8; 17.8 Ke 'solo keatea olotou igoa mai te tusi o te ola;

Ke se fakaopoopo atu foki latou ki te fakasologa o ou tino.

29Au ko mativa kae fita; te Atua,

Puke ake au o fakaola!

30Au e 'viki ki te Atua i pese;

E folafola atu foki ne au tena 'malu i te tuku atu o fakafetai ki a ia.

31E sili atu te fiafia ki ei o te Aliki,

i lo te ofo atu o taulaga ki a ia ki pulumakau,

E sili atu eiloa i lo te avatu ki a ia se pulumakau tagata ko matua 'lei.

32Kafai e iloa ne tino ma'tiva te mea tena,

Ka fia'fia latou;

A latou foki kola e tapuaki ki te Atua ka fakamalosigina.

33A te Aliki e saga mai ki tino ma'tiva,

E se puli foki i a ia ona tino i te falepuipui.

34Tavae ki te Atua te lagi mo te lalolagi,

Te tai mo mea katoa kola e ola i ei.

35Ka fakaola ne ia Ielusalema

Kae toe faite ne ia fa'kai o luta.

Ka 'nofo i kona ona tino, kae fai foki mō latou te fenua;

36Ka fai foki mo tofi o fanau a ana tavini;

E 'nofo ei foki a latou kola e alofa ki a ia.