SALAMO 26 - Tuvalu Revised Bible

Te Talo a te Tino 'Lei

1Te Aliki, fakailoa atu ki tino i a au e amiotonu,

i a au e fai mea tonu, kae fakatuaga ki a koe.

2Te Aliki, sukesuke mai kae tofotofo mai toku loto;

Fakamasino mai oku manakoga mo oku mafaufauga.

3A tou alofa tumau ko toku takitaki;

A tou fakamaoni e takitaki mai faeloa ki a au.

4Au se fai takaga ki tino e seai ne aogā;

Au se kau foki ki tino amio 'pelo.

5Au se fia fakatasi mo tino amio ma'sei,

Kae kalo keatea foki au mai tino ma'sei.

6Te Aliki, e 'fano oku lima e fakaasi atu ei i a au se tino se agasala,

Kae tapuaki fakatamilo au i tou fata-fai-taulaga.

7E usu ne au te pese fakafetai kae takutaku atu au galuega fakaofoofogina katoa.

8Te Aliki, au e fiafia ki te fale tena e nofo koe i ei,

Ko te koga tena e nofo i ei tou 'malu.

9Sa fakamalaiagina au fakatasi mo tino agasala,

Fakaola mai au mai te malaia o tino tatino,

10Ko latou kona e fai amioga ma'sei i taimi katoa

Kae toka faeloa o talia a meaalofa faka'kolekole.

11Ka ko au, e fai faeloa ne au te mea tonu;

Alofa mai ki a au kae fakaola mai au!

12Au ko sao mai mea faigata katoa;

Au e viki atu ki te Aliki i te fakapotopotoga o ona tino.