1 KOLINITO 16 - Tuvalu Revised Bible

Ko Meaalofa mō Kelisiano

1 Loma 15.25,26 E uiga ki meaalofa mō kelisiano: e pela mo taku fakatonuga ki Ekalesia i Kalatia ke fai ne latou; ke fai foki ne koutou pena.

2I te aso muamua o vaiaso takitasi, ke tuku la fakaatea ne se tino ne mo tupe o fakaputu e fakatau ki te mea e maua ne ia, ko te mea ke se toe fai ne lukuga o tupe manafai e oko atu au.

3Kae kafai ko oko atu au, ka uga atu ne au a latou kola ne filifili ne koutou, ke olo mo taku tusi o 'kave te otou meaalofa ki Ielusalema.

4Kafai foki e 'tau au o fano, ko olo ei matou.

Ko Fuafuaga a Paulo

5 Galu 19.21 Ka oko atu au ki a koutou manafai ko oti au ne afe i Maketonia, me i a au e mafaufau o ui atu i Maketonia,

6kae kati ka 'nofo tatou i ne mo taimi io me ko te 'nofo eiloa o tatou ke palele aso o te tau 'moko, ko te mea ke fesoasoani mai koutou ki taku malaga, ki te koga ko tonu ka fano au ki ei.

7Me i a au e se manako ke 'nofo fua tatou i se taimi toetoe, au e loto ke tai 'nofo leva tatou, manafai e tonu mo te Aliki.

8 Levi 23.15-21; Teu 16.9-11 Galu 19.8-10 Au ka nofo i konei i Efeso ke oko eiloa ki te Aso o te Penitekoso,

9me uke avanoaga konei mō te galuega a te Atua, kae e tokouke foki a tino e fakalavelave ki taku galuega.

10 1Koli 4.17 Kafai e oko atu a Timoteo ki a koutou, ke fai fakalei koutou ki ei, me fai foki ne ia te galuega a te Aliki e penei mo au.

11Ke seai se tino e fakaseaoga ne ia a ia, kae ke uga mai ne koutou mo te filemu, ko te mea ke toe foki mai ki a au; me i a au mo te kau Kelisiano i konei, e fakatalitali eiloa ki tena oko mai.

12Kae pela mo te tou taina ko Apolo, e kinau malosi faeloa au ki a ia ke olo atu mo nisi taina o asi koutou, kae se loto a ia o fanatu nei. Ka fanatu fakamuli manafai e isi se avanoa.

Ko Muna Fakapalele a Paulo

13Ke matapula'pula koutou, 'tu mautakitaki i te fakatuanaki, ke loto 'toa koutou, ke loto malosi foki.

14Ke fai otou mea katoa i te alofa.

15 1Koli 1.16 Taina, e iloa ne koutou a Setefana mo tena kaiga, ko tino muamua eiloa ne 'fuli i Eleni, kae ne tuku atu latou katoatoa o tavini ki Kelisiano,

16tela la, e tauanau atu au ki a koutou ke faka'logo koutou ki tino pena, e pela foki latou katoa kola e ga'lue tasi latou.

17Ko oko eiloa toku fiafia i te okomaiga o Setefana, Fotunato mo Akaiko, i te mea ne fai ne latou a te mea tela ko seai se otou avanoa o fai;

18me ne toe fakafou ne latou toku loto, e pela foki mo otou loto. Ke fakaaloalo koutou ki tino penei.

19 Galu 18.2 Ko alofa atu a Ekalesia i Asia ki a koutou. Ko 'moli atu alofaaga faka-Kelisiano o Akuila mo Pisila pela foki te Ekalesia tela e potopoto sale i te la fale ki a koutou.

20Ko a'lofa atu a taina katoa i konei ki a koutou. Ke fakatalofa atu a te sua tino ki te sua tino i te sogi tapu.

21Ko au ko Paulo, ko tusi atu alofaaga konei i taku tusilima.

22Kafai se tino e seai sona alofa mō te Aliki, ke malaia a la. Te Aliki, vau!

23Ke i a koutou katoa te alofa tauanoa o te Aliki ko Iesu.

24Ke i a koutou katoa foki a toku alofa i a Keliso Iesu.