IELEMIA 4 - Tuvalu Revised Bible

Ko te Kalaga ke Sala'mo

1Muna a te Aliki, “Tino Isalaelu, kafai ko ma'nako koutou o 'fuli mai, na 'fuli mai la nei ki a au. Kafai e ave keatea ne koutou a tupua kona e se fiafia au ki ei, kae 'saga mai o fakamaoni mai ki a au,

2ko mafai ei ne koutou o fakaaoga toku igoa i otou tautoga. Tena la, ka o'mai a malo katoa ke fakamanuia atu ne au a latou, kae ka 'viki mai latou ki a au.”

3 Hose 10.12 Muna a te Aliki ki tino Iuta mo Ielusalema, “Fakamalū aka otou laukele kona e seki fakamalū; sa tokigina otou fuaga fakatasi mo lakau makai'kai.

4Tausi faka'lei te otou feagaiga ne fai mo au, te otou Aliki, kae fakatapu mai otou foitino ki a au, koutou tino Iuta mo Ielusalema. Kafai e se faka'logo koutou, ko toku kaitaua ka 'ka pela me se afi ona ko amioga ma'sei ne fai ne koutou. Ka 'ka, kae seai eiloa se tino ke tamate ne ia a te afi tena.”

Te Fili ka Faitaua ki Iuta

5Fakatagi te pu i te fenua katoa!

Ka'laga ki luga ke lagona fakalei!

Fai atu ki tino Iuta mo Ielusalema

Ke 'tele ki fa'kai nofo olo.

6Fakasino te auala ki Siona!

'Tele ke sao koutou! Sa fakatalave!

A te Aliki ko aumai ne Ia a te mala

Mo te fakamaseiga valevale mai i matu.

7A te tagata ofa malo tena ko kamata o vau e pela me se leona,

Ko vau mai i tena koga muni.

Ko vau o 'ta fakamasei a Iuta.

A fa'kai o Iuta ka ofa ke maofa,

Kae ka seai ne tino e 'nofo i ei.

8Tela la, 'pei ki gatu lautaga,

Kae 'tagi fanoanoa me i te kaitaua fakamataku o te Aliki e seki gata ki a Iuta.

9Muna a te Aliki, “I te aso tena, a tupu mo ofisa ma'luga ka ma'taku; a faitaulaga ka 'poi, pena foki a pelofeta.”

10Tena, kae fai atu au penei, “Te Aliki Sili, ko oti ne fakatogafiti ne koe a tino Ielusalema! A koe ne fai pela me ka oko mai te filemu, kae tela la, ko te pelu fua tena ko tu i olotou kakia.”

11Ka oko mai te taimi e oko atu ei se fakaasiga ki tino Ielusalema, me ka agi mai se matagi vela mai i te toafa ki a latou. E se se matagi agi malie tela e agina fua i ei se kausaito —

12se matagi tela e agi mai i te fakatonuga a te Aliki, se matagi tafasili i te malosi! Ko te Aliki eiloa tenei ko folafola mai ne Ia a te fakamasinoga ki tino o tena fenua.

Iuta ko Nikoi ne te Fili

13Kiloke, a te fili ko vau pela me ne kaumana. Ana kaliota tau e pela me ne vaeosio, ka ko ana solofanua e ma'kini atu i aeto. Tatou ko se aoga! Tatou ko malaia!

14Ielusalema, ave keatea te masei mai i otou loto, ko te mea ke 'sao koutou. E gata afea te mafaufau o koutou ki mafaufauga ma'sei?

15A avefekau mai i te fa'kai o Tanu pela foki mai i mauga foliki o Efalaima ko folafola ne latou a te tala 'se 'lei.

16Ko o'mai o fakaasi mai ki malo, kae taku mai ki Ielusalema i te fili tena ko vau mai i se fenua 'mao. A te kau o te fili kona ka paka'laga ki fa'kai o Iuta

17kae ka nikoi ne latou a Ielusalema e pela me ne tagata kola e leoleo ne latou se fatoaga; ka tupu te mea tena me i tino Ielusalema ne 'teke ki te Aliki. Ko te Aliki tena ne faipati mai.

18Iuta, a fakalavelave konei ko oko mai ki a koe e pogai eiloa mai i te olaga 'se 'lei ne ola ei koe, mo mea 'se 'lei ne fai ne koe. Ko au agasala foki eiloa konei ko ala ei o oko atu ki a koe a puapuaga konei; ko tu malō tou fatu ne 'velo ne au agasala.

Ko te Fanoanoa o Ielemia mo Tino o tena Fenua

19Ko oko eiloa i toku 'mae! Ko se maua ne au o kufaki toku 'mae!

Toku fatu! Toku fatu ko tuki valevale eiloa!

Ko se mafai ne au o nofo filemu;

E lagona ne au a leo o pu mo leo o te taua.

20A mala ko fetaotaomaki eiloa;

A te fenua kātoa ko masei valevale.

E 'poi atu nei ko oti ne ofa a otou faleie;

A olotou laugatu 'pui ko palele ne saesae.

21E gata afea taku kilokilo atu ki te taua tena e fai mai

Mo toku fakalogologo atu ki te 'tagi mai o pu?

22Muna a te Aliki,‘A tino o toku fenua e va'lea;

E se iloa ne latou a au.

E pela eiloa me ne tama'liki foliki;

E seai se malamalama i a latou.

A latou e apo i te faiga o amioga ma'sei,

Kae se iloa o fai a amioga 'lei.”

Ko te Fakaasiga ki a Ielemia

23Ne kilo atu au ki te lalolagi — ko masei valevale;

Ki te lagi — ko seai se mainaga i ei.

24Ne kilo atu au ki mauga — ko pole'pole;

Pena foki a mauga foliki, ko gasue'sue fua.

25E lavea atu ne au me ko seai ne tino;

Ke oko foki eiloa ki manu eva ko oti ne eva atu keatea.

26A te fenua laukele ola ko liu toafa;

A ona fa'kai ko 'maofa valevale ona ko te kaitaua o te Aliki.

27(A te Aliki ne fai tena muna pela i te lalolagi katoa ka fakaliu vao, kae e se ofa katoatoa ne ia.)

28A te lalolagi ka 'tagi fanoanoa;

A te lagi ka pouli.

A te Aliki ko oti ne faipati

Ka se mafai eiloa o 'fuli ona mafaufauga.

Ko oti ne fai tena ikuga,

Kae se toe 'fuli eiloa.

29A tino katoa ka 'tele manafai ko lagona ne latou

A tagata i solofanua mo tino e sana olotou matasana.

A nisi tino ka 'tele ki te vao,

Ka ko nisi tino ka olo o kake ki luga i kaupapa.

A fa'kai katoa ka seai ne tino i ei,

Kae ka se toe nofogia eiloa ne tino.

30Ielusalema, a koe ko malaia!

Ai a e pei ei koe ki gatu lanu kulakula?

Ai a e teu ei koe ki teuga taua kae vali ou mata?

A koe e teu fakagaligali tou foitino kae seai se aoga!

A ou fiafaiga ko se ma'nako ki a koe kae ko ma'nako o tamate koe.

31Ne lagona ne au se tino e tagi,

E pela me se fafine ka fai o fanau,

E pakalaga pela me se fafine ko fanau mai tena tamaliki muamua eiloa.

Ko Ielusalema tena e tagi o taumafai ke manava aka a ia,

Kae 'fola mai tena lima kae fai mai penei,

“Au ko malaia!

Konei ko o'mai o tamate au!”