IELEMIA 16 - Tuvalu Revised Bible

Ko te Loto o te Aliki mo te Olaga o Ielemia

1Ne toe faipati mai ki a au a te Aliki, ana muna,

2“Sa avaga io me fai ne au tamaliki i se koga penei.

3Ka fakaasi atu ne au a te mea ka tupu ki tamaliki kola e fanau i konei, pela foki olotou matua.

4Ka mate latou i famai fakamataku, kae ka seai ne tino ke tagi fanoanoa ki a latou, seai foki ne tino e o'mai o tanu latou. A olotou foitino ka takato pela me ne kaiao i luga i te laukele. Ka mate latou i te taua, ka mate foki i te fiakai, ka ko olotou foitino ka kai ne manu eva mo manu o te vao.

5“Ke mo a koe e ulu ki loto i se fale tela e tagi fanoanoa i ei a tino. Sa tagi fanoanoa ki se tino. Ka se toe fakamanuia ne au oku tino o avatu te filemu, se toe fakaasi foki toku alofa ki a latou.

6A tino maumea mo tino mativa ka mate i te fenua tenei, kae ka seai ne tino e o'mai o tanu latou, seai foki ne tino e tagi fanoanoa ki a latou. E seai se tino e katikati tena foitino io me vele ona laulu o fakaasi tena fanoanoa.

7E seai se tino e fano o kai kae inu fakatasi mo te tino ne mate tena kaiga, o fakamafanafana atu ki ei. E seai eiloa se tino e fakaasi atu tena fanoanoa ki se tino tela ne mate tena tamana io me ko tena matua.

8“Sa ulu ki loto i se fale tela e isi se 'kaiga e fai i ei. Sa sagasaga fakatasi mo latou o kai kae inu fakatasi.

9Iele 7.34; 25.10; Faka 18.23 Fakalogo mai ki a au, te Aliki Malosi, te Atua o Isalaelu. Ka fakafilemu ne au a leo o te lifu mo te fiafia, mo te leo fiafia i 'kaiga fakaipoipoga. A tino i konei ka ola eiloa ke lavea ne latou a te taimi e taunu ei a mea kona.

10“Kafai e fai ne koe ki a latou a mea katoa kona, kae ka fesili mai latou ki a koe me ai a ne mafaufau ei au o fakasala malosi a latou. Ka fesili atu latou me se a te lotou mea se ne fai, se a foki te agasala ne fai ne latou ki te Aliki te lotou Atua.

11Tena la, ko fai ei koe ki a latou i te Aliki ne fai mai penei, ‘A otou tupuga ne fulitua mai ki a au kae ne tapuaki kae tavini atu ki nisi atua. Ne tiakina ne latou au kae se fakalogo ki aku akoakoga.

12Ka ko koutou, ko silia atu te masei o te mea ne fai ne koutou i lo te mea ne fai ne otou tupuga. A koutou katoa ko oko eiloa i te loto makeke kae masei, kae se fakalogo mai foki koutou ki a au.

13Tela la, ka pei keatea ne au koutou mai i te fenua tenei ki se fenua fakaatea tela e seki iloa eiloa ne koutou io me ko otou tupuga. I kona, ka tavini atu ei koutou ki atua fakaatea i ao mo po, kae ka se alofa lele eiloa au ki a koutou.”’

Ko 'Foki Mai i te Tafeaga

14Muna a te Aliki, “E oko mai te taimi e se toe tauto ei a tino konei ki toku igoa tela ko te Atua ola, tela ko au ne aumai ne au a tino Isalaelu keatea mai i Aikupito.

15Kae ka tauto latou ki a au, ko te Atua ola tela ne aumai ne au a tino Isalaelu keatea mai i te fenua i matū, pela foki mai i fenua kola ne fakasalalau ne au ki ei latou. Ka fakafoki mai ne au latou ki te lotou fenua tonu, ki te fenua tela ne tuku ne au ki olotou tupuga. Ko au, te Aliki, tena ne faipati atu.”

Ka oko mai te Fakasalaga

16Muna a te Aliki, “Ka uga taku fekau ki tino Fai-ika e tokouke ke o'mai o 'po a tino konei. Ka oti, ko uga foki taku fekau ki tino afuli manu e tokouke ke o'mai o afuli a tino konei i luga i mauga pela foki i lalo i ana i kaupapa.

17E lavea ne au olotou mea katoa e fai. E seai se mea e galo i oku mata; a olotou agasala e matea katoa ne au.

18E faluaina te taui ka tuku atu ne au ki a latou ona ko olotou agasala mo olotou amioga masei, me ne fakalailai ne latou toku fenua ki tupua kola e mate pela fua me ne foitino o tino mate, kae ne fakafonu foki ne latou ki olotou atua loi.”

Ko te 'Talo a Ielemia

19Te Aliki, ko koe e puipui ne koe a au kae aumai ne koe te malosi ki a au; e fesoasoani mai foki koe ki a au i taimi o fakalavelave. Ka o'mai malo ki a koe mai i feitu o te lalolagi kae fai atu penei, “A omotou tupuga e tavini ki atua loi, ki tupua e seai ne aoga.

20E mafai ne se tagata o faite ana atua? Ikai, kafai e faite ne ia ana atua, ko tena uiga e se ne atua tonu.”

21Muna a te Aliki, “Tela la, ka fakaasi atu eiloa ne au i te taimi nei ke na iloa ne malo a toku mana mo toku malosi; ka iloa ei ne latou i a au ko te Aliki.”