SALAMO 19 - Tuvalu Revised Bible

Ko te 'Malu o te Atua i ana mea ne Faite

1E matea i te lagi te 'malu o te Atua!

E fakaasi tonu mai foki i ei ana mea ne fai!

2E fakailoa atu foki ne te aso ki te sua aso te 'malu o te Atua;

Mo te po ki te sua po.

3E seai ne pati io me ne muna e fakaaoga,

E seai foki se leo e lagona;

4

Mo olotou muna ki kapakapalagi.

Ko fakatoka foki ne te Atua i te lagi se koga mo te la;

5E sae mai i te taeao,

Kae fiafia e pela me se tagata fatoa avaga,

E pela me se tagata malosi e fiafia faeloa o tele i se fakatautelega.

6A tena vau e kamata mai i te sua kapakapalagi

Ke oko atu ki te sua kapakapalagi.

E seai foki se mea e sao mai i tena 'vela.

Ko Tulafono a te Aliki

7E tonu katoatoa te tulafono a te Aliki,

E maua mai i ei te malosi fou.

A fakatonuga foki a te Aliki e fakatuagagina,

E aumai ne ia te poto ki a latou kola e valea.

8E tonu faeloa tulafono a te Aliki

E fia'fia faeloa a latou kola e tausi ki ei.

A fakatonuga a te Aliki e 'tonu katoatoa,

Kae fakamaina ne ia te mafaufau.

9E 'lei katoatoa te tapuakiga ki te Aliki;

Kae tumau ki te se gata mai.

E tonu foki ana fakamasinoga;

Kae se fakapito.

10E sili atu te lotou manakogina i lo te aulo tafasili i te 'ma;

E magalo atu foki i lo te tina hani.

11Ko au tulafono e fai ne ia a au, tau tavini, ke poto;

E maua ne au te taui 'lei i au ne tausi ki ei.

12E seai se tino e mafai ne ia o lavea tena 'se;

Te Aliki, fakasao mai au mai agasala e se iloa ne au!

13Puipui mai au mai te fai o agasala;

Ke mo a ma pule mai ki toku olaga.

Tena ka 'ma katoatoa ei au

Kae sao mai i te masei o te agasala.

14Te Aliki, toku lafiga mo toku fakaolataga,

Ke talia mai ne koe aku muna mo oku mafaufauga!