NUMELA 7 - Tuvalu Revised Bible

Ko Taulaga a Takitaki

1I te aso ne palele ei a te galuega a Mose i te fakatuga o te Faleie o te Aliki, ne milimili kae fakatapu foki ei ne ia a te Faleie o te Aliki mo mea katoa i ei, pela foki te fata-fai-taulaga mo ana mea katoa.

2I te otiga o te mea tena, te mea eiloa ko o'mai a takitaki o kaukaiga takitasi, kola ko takitaki i matakaiga takitasi o Isalaelu, ko latou foki kona kola ne takitaki i te lauga o tino,

3mo olotou taulaga ki te Aliki: e ono ka kae sefulu lua a pulumakau. E tokolua takitaki kae tasi te la ka, kae tofu katoa mo te pulumakau e tasi. I te otiga ne tuku atu ne latou ki te Aliki,

4tena ne fai mai ei a te Aliki ki a Mose penei,

5“Talia mo te fiafia a meaalofa konei ke fakaaoga i te galuega mo toku Faleie; tuku atu ki te matakaiga o Levi e tusa mo te galuega e tau o fai ne latou.”

6Tena, ne tuku ei ne Mose a ka mo pulumakau kona ki te kau sa Levi.

7Ne tuku ne ia e lua ka kae fa pulumakau ki te kaukaiga o Kelesona,

8kae fa a ka, kae valu pulumakau ki te kaukaiga o Melali. A galuega katoa a latou e tau o fai i lalo o te pulega a Itamala te tama tagata a Alona.

9E seai ne ka io me ne pulumakau ne tuku ne Mose ki te kaukaiga o Koate, me i mea tapu kola e tausi ne latou e tau o amo i olotou tuauma.

10Ne o'mai foki a takitaki mo olotou taulaga o fakamanatu te fakatapuga o te fata-fai-taulaga. I te taimi ko toka ei latou o ofo atu olotou meaalofa i te fata-fai-taulaga,

11ne faipati mai ei a te Aliki ki a Mose penei, “Fai atu ki takitaki me e tau mo latou o fakasolosolo taki tokotasi i aso takitasi i aso e sefulu lua, o ofo mai olotou taulaga mo te fakatapuga o te fata-fai-taulaga.”

12-83Tenei te fakasologa o latou i aso e ofo ei olotou taulaga:

Te Aso

Te Matakaiga

Te Takitaki

1

Iuta

Nasona te tama tagata a Aminatapu

2

Isakala

Natanielu te tama tagata a Sualo

3

Sepulona

Eliapo te tama tagata a Helona

4

Leupena

Elisula te tama tagata a Setulo

5

Simeona

Selumielu te tama tagata a Sulisatai

6

Kato

Eliasafo te tama tagata a Teuelu

7

Efalaima

Elisama te tama tagata a Amiuta

8

Manase

Kamalielu te tama tagata a Petasula

9

Peniamina

Apitano te tama tagata a Kiteone

10

Tanu

Aiesa te tama tagata a Amisatai

11

Asela

Pagielu te tama tagata a Okilani

12

Nafatali

Aila te tama tagata a Enanu

A taulaga a takitaki taki tokotasi e pau katoa: e tasi te pola siliva e tusa mo te tasi tesimale lima kilokalame te mafa, e tasi te pola siliva e tusa mo te tasi tesimale lima kilokalame te mafa, kae tasi te pesini siliva e tusa mo te valu selau kalame te mafa, kae fonu katoa i falaoa e palu tasi mo te sinu olive mo fai te taulaga saito; e tasi te tisi aulo e tusa mo te selau sefulu kalame e fonu i mea manogi; e tasi te tamā pulumakau tagata, e tasi te mamoe tagata, mo te tamā mamoe ko tasi tena tausaga mo fai taulaga mō agasala; e tasi te kouti mo te taulaga o agasala; kae lua pulumakau tagata, e lima kouti kae lima tamā mamoe ko takitasi olotou tausaga mo fai te taulaga fakafetai.

84-88A te aofaki katoa o taulaga kola ne aumai ne takitaki kola e tinogafulu mo te tokolua mo te fakatapuga o te fata-fai-taulaga e penei:

Sefululua pola siliva kae sefululua pesini siliva, a te māfa o mea katoa kona e tusa mo te luasefulu fitu tesimale tasi kilokalame

Sefululua tisi aulo e tusa mo te tasi tesimale tolulua kilokalame, kae 'fonu katoa i mea manogi

Sefululua pulumakau tagata, e sefululua mamoe tagata, e sefululua tamā mamoe ko taki tasi tausaga, fakatasi mo taulaga saito kola e fakatasi ki ei, mo fai a taulaga 'sunu

Sefululua kouti mo te taulaga mo agasala

Luasefulu fa pulumakau tagata, e onosefulu mamoe tagata, e onosefulu kouti, e onosefulu mamoe ko takitasi tausaga, mo fai te taulaga fakafetai.

89I te taimi ne fano ei a Mose ki loto i te faleie o te Aliki o faipati mo te Aliki, kae ne lagona ne ia a te Aliki ne faipati atu ki a ia mai i luga o te 'pono o te Pusa o te Feagaiga, i te va o kelupi e lua.