1Ne sau aka au ne te agaga o te Atua, ave ei ne Ia au ki te mataloa ki te saegala o te Faletapu. I kona, i tafa o te mataloa, ne lavea ne au e tinolua mo te tokolima tagata, e aofia i ei a Iasania te tama tagata a Asula, mo Pelatia te tama tagata a Penaia, ne takitaki e tokolua o te malo.
2Muna a te Atua ki a au, “Te tagata ola, a tagata konei e fai ne latou a fuafuaga masei, kae fai ne latou a manatu fakatonutonu se lei i te fa'kai tenei.
3Muna a latou,‘E se leva nei kae ka toe galue matou ki te faitega o fale. A te fa'kai e pela me se ulo tunu meakai, ka ko matou e pela me ne kano manu i loto i te ulo tena, kae e tai isi se lei e maua, me e puipui matou ne te ulo mai i te afi.’
4Te tagata ola, na fulitua atu nei ki tagata kona.”
5Ne ulufia au ne te agaga o te Aliki, tena ne fai mai ei te Aliki ki a au ke avatu te fekau tenei ki tino: “Tino Isalaelu, e iloa ne au otou muna kona e fai, mo otou fuafuaga kona e fakatoka.
6Ko oko eiloa i te lasi o te tāga tino a koutou i te fa'kai nei, tenei ko fonu ei auala i foitino mate.
7“Tela la, konei aku muna e fia fai atu ki a koutou, ko au ko te Aliki Sili. A te fa'kai tenei se ulo tunu meakai eiloa, kae se a te kano manu e tau o tunu i ei? Ko foitino mate o tino kola ne tamate ne koutou! A koutou ka se nofo i konei — ka pei koutou ne au ki tua mo te fa'kai!
8A koutou e mataku i te pelu? Ka aumai ne au se potukau mo olotou pelu o ta koutou.
9Ka ave ne au koutou keatea mai i te fa'kai kae tuku atu koutou ki tino fakaatea. Ko oti ne fai taku ikuga i a koutou e tamate,
10Kae ka mate eiloa koutou i te taua i te otou fenua eiloa. Tena la, ka iloa ei ne tino katoa i a au ko te Aliki.
11A koutou e se 'pulu ne te fa'kai tenei, pela mo te kano manu tela e 'pulu ne te ulo mai i te afi. Ka fakasala ne au koutou i so se koga e nofo ei koutou i luga i te fenua o Isalaelu.
12Ka iloa ne koutou i a au ko te Aliki, kae i te taimi e tausi ei ne koutou a tulafono a malo i otou tafa, ko tena uiga ko ofa ne koutou aku tulafono kae se fakalogo ki aku fakatonuga.”
13I te taimi koi fai ei aku muna fakapelofeta, kae siga ifo a Pelatia, mate eiloa. Ne fakasiga ifo au mo oku mata e fuli ki lalo i te laukele, kae pakalaga au penei, “Te Aliki Sili, sa faigina te mea tena! E a, ka tamate ne koe a tino katoa e toe i Isalaelu?”
Ko te Feagaiga a te Atua ki te kau o te Tafeaga14A te Aliki ne faipati mai ki a au,
15ana muna, “Te tagata ola,” a tino i Ielusalema ko faipati e uiga ki a koe mo ou taina Isalaelu kona i te tafeaga. Olotou muna penei,‘A te kau o te tafeaga ko to mao, ko se tau o tapuaki atu ki te Aliki. Ko oti ne aumai ne te Aliki a te fenua tenei mo tatou.’
16“Fai atu ki ou taina i te tafeaga aku muna konei. Ko au ne uga ne au latou ke olo o nofo i malo mao, kae fakasalalau ne au ki nisi fenua. Kae nei, au ka fakatasi atu ki a latou i fenua kola ne olo latou ki ei.
17“Tela la, fai ki ei aku muna konei e fai atu. Ka toe fakamaopoopo mai ne au latou mai i fenua ne fakasalalau ne au ki ei latou, kae ka toe fakafoki atu te fenua o Isalaelu ki a latou.
18Kafai ko 'foki mai latou, e tau o ave keatea ne latou a tupua fakafoufou kae mataga kola e maua atu ne latou.
19Eseki 36.26-28 Ka avatu ne au ki a latou se loto fou mo te mafaufau fou. Ka ave keatea ne au olotou loto makeke pela me ne fatu, kae tuku atu ki a latou a loto fakalogo.
20Tena, kae ka tausi latou ki aku tulafono kae tausi fakamaoni ki aku fakatonuga. Ka fai latou mo oku tino, ka ko au ka fai mo Atua o latou.
21Kae ka fakasala eiloa ne au a tino kola e fia tapuaki ki atua fakafoufou kae masei. Ka fakasala ne au latou ona ko mea ne fai ne latou.” Ko te Aliki Sili tena ne faipati atu.
Ko tiaki ne te Aliki a Ielusalema22 Eseki 43.2-5 Ne masagi aka a manu kona o eva, ka ko teka ne olo tasi atu eiloa mo manu kona. A te mainaga o te Atua o Isalaelu e nofo mai i luga o latou.
23Ne tiaki ne te mainaga tena a te fa'kai, fanatu ei ki mauga i te feitu ki te saegala o te fa'kai.
24I te fakaasiga tena, ne sapai ake au ne te agaga o te Atua, kae toe fakafoki mai au ki te kau o te tafeaga i Papelonia. Tena la, ko te fakaasiga eiloa ko fano o matafi,
25kae ne taku atu eiloa ne au ki te kau i te tafeaga a mea katoa kola ne fakaasi mai ne te Aliki ki a au.
Who We AreWhat We EelieveWhat We Do
2025 by iamachristian.org,Inc All rights reserved.
