NEEMIA 6 - Tuvalu Revised Bible

Ko te Togafiti Masei ki a Neemia

1A Sanipalata, Tovia, Gesemu, mo omotou fili katoa, ne 'logo me ko palele te faitega o te pui kae ko oti foki ne pono a koga kola e 'pu i te pui, ka ko mataloa e seki faka'piki.

2Tela la, ne uga mai te fekau a Sanipalata mo Gesemu ke fetaui matou i te fa'kai e tasi i te Kogā Koga Laugatasi o Ono. A te mea tena se togafiti a latou o taumafai o ta a au.

3Ne uga ne au a avefekau ki ei mo te fekau tenei, “E isi ne galuega taua konei e fai ne au, tela la, au ko se oko atu. E se loto au ke tiaki te galuega kae fanatu ke fetaui tatou.”

4Ne uga mai ne latou te fekau tena ki a au, e fakafa taimi, kae ne tali faeloa atu au i taku tali tena muamua.

5Tena ne toe uga mai ei ne Sanipalata a te tavini a ia e tokotasi mo te lima o fekau ki a au, a te fekau tena ne aumai i te tusi e seki 'pono.

6E penei a muna o te tusi:

“A Gesemu ne fai mai ki a au me e isi se tala tenei e faipatigina ne tino o fenua pili mai, me i a koe mo te kau Iutaia e taumafai o 'teke ki te malo, tena te mea ne toe faite ei ne koutou a te pui o te fa'kai.

7Ne fai mai foki a Gesemu i a koe e mafaufau ke fai koe mo tupu, kae ko oti ne fakatoka ne koe pelofeta ke folafola ne latou i Ielusalema i a koe ko fai mo tupu o Iuta. A tena malu te tupu e iku eiloa o logo i te mea tenei, tela la, au e fai atu ke vau koe ke fetaui tatou ke faipati tatou ki te mea tena.”

8Ne avatu ne au taku tali ki a latou penei: “E seai eiloa se pati i au muna kona e tonu. A te mea tena se tala fua a koe ne fatu.”

9Ko oko eiloa i te taumafai o latou o fakamatakutaku tatou ko te mea ke se fai te galuega. Tena ne 'talo ei au penei, “Te Atua, fakamalosi mai au!”

10I te taimi tenei, au ne fano o asi ki a Semaia, te tama tagata a Telaia kae ko te mokopuna o Metapelu tela ko se maua ne ia o fano keatea mai i tena fale. Ne fai mai a ia ki a au penei, “E tau mo taua o olo o muni i te Potu Tapu o te Faletapu kae loka a mataloa, me i ou fili kona ka o'mai o tamate koe. I so se po pili mai nei, kae ka o'mai o tamate koe.”

11Ne tali atu au penei, “Au se ko te vaega tino tela e mataku kae tele o muni. I tau fakatau ko au ke fano o muni i te Faletapu ke sao au? E se fai ne au te mea tena.”

12Ne toe mafaufau fakalei aka au, iloa aka ei ne au i te Atua e seki faipati ki a Semaia, ka ko Tovia mo Sanipalata ne togi ne laua a Semaia ke fai mai ne ia a te fekau tena.

13Ne togi ne laua a Semaia ke fakamatakutaku ne ia a au, ko au ke agasala, tena la, ko masei ei toku igoa kae ko takuvalea foki ei a au.

14Ne 'talo au penei, “Te Atua, masaua te mea a Tovia mo Sanipalata tenei ne fai, tela la, ke fakasala aka laua. Masaua te fafine e igoa ko Noatia mo nisi pelofeta katoa kola ne taumafai o fakamatakutaku a au.”

Ko te Fakaotiga o te Galuega

15I te po luasefulu lima o te masina o Elula, ne palele ei te galuega i te faitega o te 'pui o te fa'kai, kae e tusa mo te lima sefululua aso ne fai ei te galuega.

16I te 'logoga o omotou fili kola e nofo i malo pili mai i te mea tenei, tela la, ko masiasi faka eiloa a latou, me i tino katoa ko iloa ne latou i te Atua ne fesoasoani mai i te faiga o te galuega.

17I te taimi katoa tenei, a takitaki o Iutaia ne ave tusi sale mo Tovia.

18A te tokoukega o tino Iuta ne 'kau i a ia me i te tamana o tena avaga se tagata Iutaia, ko Sekania te tama tagata a Ala. A tena tama tagata foki ko Ieoananu ne avaga ki te tama fafine a Mesulama te tama tagata a Pelekia.

19A tino e masani o faipati sale mai i oku mua e uiga ki mea 'lei ne fai ne Tovia, kae ne fai ne au ki a latou a mea katoa kola ne fai atu ne au. Kae ne aumai sale eiloa ne ia a tusi ki a au o taumafai o fakamatakutaku a au.