IOPU 15 - Tuvalu Revised Bible

Ko te Lua o Sautalaga(15.1—21.34)Elifasa

1-2Iopu, au muna kona ne muna se aoga! Ne muna se aoga!

3E seai se tagata poto e faipati pena mo koe,

Io me taumafai o puipui a ia ki muna se aoga pena.

4Kafai e fai ne koe te mea e loto koe ki ei,

Ka seai se tino e mataku ki te Atua;

Ka seai foki se tino e talo atu ki a ia.

5A tou uiga masei ko lavea atu eiloa i au muna kona e fai;

A koe e taumafai o muni mai tua o au muna gali kona e fai.

6Ko se tau eiloa o fakamalaia ne au a koe;

A koe ko fakamalaia eiloa ne au muna katoa kona ne fai.

7I tau fakatau, a koe ko te tino muamua ne fanau mai?

Ne nofo koe i te taimi ne faite ei ne te Atua a mauga?

8Ne lagona ne koe a fuafuaga a te Atua ne fai?

E pule koe i te poto faka‐te‐tagata?

9E seai se mea e iloa ne koe kae e se iloa ne matou.

10A matou ne akoako ne tagata ko sinā olotou ulu;

Ne akoako matou ne tagata kola e matua atu i tou tamana.

11Ne avatu ne te Atua te filemu; ai a e se talia ei ne koe?

Ne fai foki matou mo sui o te Atua o faipati atu a muna fakamafanafana.

12A koe ko to manavase kae pula 'toka mai koe ki a matou mo te kaitaua.

13A koe ko kaitaua ki te Atua kae ko taku fakaseaoga ne koe a ia.

14 Iopu 25.4-6 E a, e isi se tino e mafai o ma katoatoa?

E isi se tino e mafai o sao i mua o te Atua?

15A te Atua e se talitonu foki ki ana agelu;

Me e se ma katoatoa foki i ona mua.

16A te tagata e inu ki te masei, e pela eiloa me e inu ki vai;

E tonu, a te tagata e se aoga, e se aoga eiloa.

17Iopu, fakalogo mai ki te mea e iloa ne au.

18Au ne akoako ne tino poto ki poto e uke, kola ne tauloto ne latou mai olotou tamana,

Kae e seai ne mea e funa ne latou.

19E seai ne tino fakaatea i te lotou laukele;

E seai ne tino ke taki ei latou keatea mai i te Atua.

20A te tino amio masei tela e fakapuapuaga ne ia a nisi tino,

E fakafitagina i tena olaga kātoa.

21A leo fakamataku ka pakalaga i ona taliga,

Kae ka taua atu ki a ia a tino fao mea,

I te taimi e mafaufau ei a ia i a ia ko sao.

22E seai sena fakamoemoega ke sao a ia mai i te pouliga,

Me e isi se koga e fakatalitali ei te pelu o tamate a ia,

23Mo manu ko valatua e fakatalitali o kai tena foitino mate.

E iloa eiloa ne ia i ona aso fakamuli e pouli, seai se lei e maua i ei;

24A te puapuaga e pela me se tupu malosi tela ko fakatalitali o ta a ia.

25Tena te ikuga o te tagata tela e fia toa ki te Atua

Kae se fia saga ki te Atua Malosi.

26-27A te tagata e fakamatamata kae fia teke;

E loto makeke eiloa a ia o puke tena talita,

E loto makeke eiloa o puke tena talita,

Kae tele o taua ki te Atua.

28Tena te tagata tela e fakatakavale ne ia a fa'kai

Kae puke ne ia a fale kola ko seai ne tino i ei me ko oti ne 'tele,

Ka fakamasei a fa'kai mo fale kona i se taua.

29Ka se tumau tena maumea i se taimi leva;

E seai se mea a ia e tumau i a ia.

Ke oko foki eiloa ki tena ata ka galo atu,

30Kae ka se sao eiloa a ia mai i te pouliga.

Ka pela a ia me se lakau tela ne sunu ona kaula i se afi,

Mo ona pula ko agina keatea ne te matagi.

31Kafai ko to valea a ia, o talitonu ki te masei,

Ko tena uiga, ko te masei foki ko tena taui.

32Ka mage atu a ia, kae koi tuai o oko mai tena taimi,

Ka mage pela me se kaula kae ka se toe ola lau usiusi.

33A ia ka pela me se vine tela ko galo ona fuagā vine kola seki sulu;

Pela me se lakau ko te olive tela ko 'to keatea ona pula.

34Ka seai se gafa o tino se talitonu ki te Atua,

A fale kola ne faite i faiga fakatogafiti ka fakamasei katoa i te afi.

35Kona a tagata kola ne fuafua ne latou a togafiti masei,

Kae fai a amioga masei; a olotou loto e fonu faeloa i uiga fai togafiti.