SALAMO 9 - Tuvalu Revised Bible

Fakafetai ki te Atua ki tena fai Mea Tonu

1Te Aliki, au ka tavae atu ki a koe mo toku loto katoa;

Ka takutaku foki ne au a galuega 'mana katoa ne fai ne koe.

2Ka 'viki atu au mo te fiafia ona ko koe.

Ka tavae atu au i vikiga ki a koe, te Atua Tafasili i te Maluga.

3I te taimi ne fakasae mai ei koe, ne 'foki ei oku fili;

Ne 'siga ki lalo kae 'mate.

4Au fakamasinoga e 'tonu kae fakamaoni,

Ne fakamasino ne koe au mo te alofa.

5Ne fakasala ne koe a tino pouliuli,

Kae ta fakapalele foki ne koe a tino amio ma'sei;

Ka se toe masaua eiloa latou.

6Ko seai lele eiloa ne omotou fili;

Me ko oti ne fakamasei ne koe olotou fa'kai,

Kae ka se toe manatua eiloa latou.

7Ka ko te Aliki ko te tupu ki te se gata mai;

Ko oti ne fakatu ne ia tena nofogaaliki mō fai fakamasinoga.

8E pule ne ia te lalolagi mo te amiotonu;

E fakamasino foki ne ia a malo mo te amiotonu.

9A te Aliki ko te olo e lafi ei a tino fi'ta,

Ko te koga e 'sao ei i taimi e puapuaga.

10Te Aliki, a tino kola e iloa ne latou a koe, e fakatuanaki ki a koe;

E se tiakina foki ne koe so se tino tela e vau ki a koe.

11Viki atu ki te Aliki tela e pule i Siona!

Fakailoa atu ki malo katoa ana mea ne fai!

12E masaua ne te Atua a latou kola ne fita;

E se mafai o puli i a ia te lotou 'tagi,

E fakasala ne ia latou kola e fai amioga se 'tau ki a latou.

13Te Aliki, a koe ke alofa mai ki a au!

Ko matea mai ne koe toku fi'ta ona ko latou kola e ita mai ki a au!

Te Aliki, fakasao mai au mai te mate,

14Ke mafai ne au o tu atu i mua o tino Ielusalema

Kae taku atu ki a latou a mea katoa kola e 'viki atu ei au ki a koe.

Ka fiafia au me ne fakasao au ne koe.

15Ne keli ne tino o fenua fakaatea te lua kae ne 'to eiloa latou ki ei;

Ne 'tao ne latou te malei kae ne toe lavelave eiloa latou i ei.

16Ko oti ne fakaasi mai ne te Aliki a ia i ana fakamasinoga tonu,

Ka ko tino amio ma'sei e pa'kia eiloa latou i olotou amioga ne fai.

17A te Mate ko te ikuga o tino amio ma'sei,

Pela foki mo latou katoa kola e 'teke ki te Atua.

18A tino ma'tiva e se mafai o fakapuligina;

A te fakamoemoega foki o tino puapuagatia

E se mafai eiloa o galo atu.

19Te Aliki, vau! Sa tuku ne koe a tino ke manumalo i a koe!

Aumai a tino se talitonu ki ou mua kae fakailoa atu ki a latou tau fakamasinoga.

20Te Aliki, fakamatakutaku atu ki a latou;

Fakailoa atu ke iloa ne latou i a latou ne tino fua e oko ki ei te mate.