1Ne taua te kautau Filisitia mo te kautau a Isalaelu i luga o te Mauga o Kilipoa. E tokouke tino Isalaelu ne mate i kona, ka ko te toega, fakatasi mo Saulo mo ana tama tagata ne tele.
2Kae ne vave atu te kau Filisitia, maua ei latou, tena ne tamate ei ne latou e tokotolu tama tagata a Saulo, ko Ionatana, Apinatapu, mo Mikisua.
3A te taua ko fai masei eiloa i tafatafa o Saulo, kae ne pakia malosi eiloa Saulo i matasana a te fili.
4Ne fai atu a ia ki te tamataene tela e pukepuke i ana meatau, “Tapale tau pelu o tamate au, i te kau Filisitia fapaupau kona ma o'mai o kata au, kae tamate au.” Ka ko te tamataene tena e mataku ma fai te mea tena. Tena ne puke aka Saulo ki tena pelu kae eva ki ei.
5Ne lavea ne te tamataene i a Saulo ko mate, tena ne eva foki a ia ki luga i tena pelu, mate tasi atu eiloa mo Saulo.
6E pena te matega o Saulo, ana tama tagata e tokotolu, mo te tamataene ei tena; a te kau katoa a Saulo ne mate katoa i te aso tena.
7I te logoga o tino Isalaelu i te sua feitu o te Vanu o Ieseleelu, pela foki i te feitu ki te saegala o te vaitafe o Iolitana, i te kautau a Isalaelu ko tele, mo Saulo mo ana tama tagata ko mate, tena ne tiaki ei ne latou olotou fa'kai o tele keatea. Ne o'mai a tino Filisitia, nofo ei i fa'kai kona.
8I te aso mai tua o te taua, ne olo atu te kau Filisitia o puke a mea tāua i foitino mate o te kau Isalaelu, tena ne maua ei ne latou te foitino o Saulo mo ana tama tagata e tokotolu e takato i te Mauga o Kilipoa.
9Ne kati ne latou te ua o Saulo, tapale tena gatu tau, kae uga ne latou a avefekau ke olo mo te ulu o Saulo mo tena gatu tau o fakasalalau te tala fiafia tena ki olotou tupua mo olotou tino.
10Tena, ne avatu ne latou ana mea tau ki te faletapu o te atua fafine ko Asitate, kae tuki ne latou te foitino o Saulo ki te pui o te fa'kai o Peta Sana.
11I te logoga o tino Iapese i Kileata i te mea tena ne fai ne tino Filisitia ki a Saulo,
12tena ne olo atu ei a olotou tagata 'toa eiloa i te po kātoa tena ki Peta Sana. Ne tapale ifo ne latou te foitino o Saulo mo ana tama tagata e tokotolu mai te pui, avatu ne latou ki Iapese, sunu ei ne latou i kona.
13Tena, ne puke ne latou a ivi o tanu i lalo o te lakau ko te tamalisi i te fa'kai, kae fakalikiliki ei latou i aso e fitu.
Who We AreWhat We EelieveWhat We Do
2025 by iamachristian.org,Inc All rights reserved.
