GALUEGA 14 - Tuvalu Revised Bible

Ko te Galuega i Ikonio

1Ne tupu foki te mea pena i Ikonio: ne olo atu a Paulo mo Panapa ki te fale tapuaki o Iutaia, kae ne fai'pati a laua i ei. E tokouke a tino Iutaia mo tino o fenua fakaatea ne talitonu ki te la folafolaga.

2Ka ko tino Iutaia se talitonu, ne fakamakosu ne latou a loto o tino o fenua fakaatea, kae 'fuli ne latou ke 'teke atu ki taina talitonu.

3Tela, 'nofo ei laua ke tai leva atu kae faipati atu mo te loto toa e uiga ki te Aliki. Ne fakamaoni ne ia te tonu o te la folafolaga e uiga ki tena alofa tauanoa, i te tukuatuga ki a laua a te mana e fai ei ne laua a vavega mo mea fakaofoofogina.

4Ne vaelua a tino i te fa'kai: ne kau fakatasi a te sua vaega mo tino Iutaia, ka ko te sua vaega ne kau mo apositolo.

5Fakamuli ifo, ne taupulepule fakatasi a tino o fenua fakaatea mo tino Iutaia mo olotou takitaki o fakasaua ki apositolo, kae peipei ne latou ki fatu.

6I te iloaga ne apositolo a te mea tena, 'sola atu ei laua ki Lusa mo Teipe, ne fa'kai o Lukaonia, e pela foki mo fenua e pili mai.

7Ne folafola atu ei ne laua i kona a te Tala 'Lei.

Ko te Galuega i Lusa mo Teipe

8E isi se tagata i kona i Lusa e 'pili ona vae, kae ne 'pili mai eiloa mai tena fanaumaiga, kae seki sasale foki eiloa.

9Ne fakalogologo a ia ki muna a Paulo. Ne lavea atu ne Paulo me ko talitonu a ia, kae mafai foki o fai ke 'lei a ia, tela ne faka'toka atu ei a Paulo ki a ia,

10kae fai atu ki ei i te leo lasi, “Tu tonu ake ki luga i ou vae.” Ne tafuke ake a ia ki luga kae sasale.

11I te laveaga ne te vaitino te mea ne fai ne Paulo, ne paka'laga a latou i te gana Lukaonia: “Ko oko mai a atua ki lalo i a tatou e pela mo ne tino!”

12Ne fakaigoa ne latou a Panapa ko Seu, ka ko Paulo ko Heleme, me i a Paulo ko ia ko te failauga sili.

13A te faitaulaga a te atua ko Seu, tela e tu tona fale tapu i tua o te fa'kai, ne aumai ne ia a pulumakau mo teu pula lakau ki te mataloa lasi o te fa'kai, ke fai ei olotou taulaga ki apositolo.

14I te lagonaga ne Paulo mo Panapa a te mea tena, ne 'sae o la gatu, kae 'tele atu ki te vaitino kae paka'laga atu,

15Eso 20.11; Sala 146.6“E tino konei, ai a e fai ei ne koutou a te mea tena? A maua nei ne tina tino eiloa e pela mo koutou! A maua ne o'mai o taku atu a te Tala 'Lei, ko te mea ke 'fuli keatea koutou mai mea se aoga konei, ki te Atua ola tela ne fai ne ia a te lagi, te lalolagi, te tai mo mea katoa i ei.

16I kautama taumua, ne tuku faitalia ne ia a fenua katoa ke sasale eiloa latou i auala e loto latou ki ei.

17Kae ne seki tuku tiaki ne ia koutou e aunoa mo te fakamaoniga o tona uiga 'lei, tela ne tuku sale mai ei ne ia a vaiua mai te lagi, mo tau aoga e uke mea e maua i ei, e fakama'lie ei otou loto i meakai mo te fiafia.”

18E ui eiloa i muna kona ne fai atu, kae ne tai faigata eiloa i apositolo o 'vao atu ke se fai mai a taulaga ki a laua.

19Ne o'mai nisi tino Iutaia mai Anitioka i Pisitia mo Ikonio; ne fakaoso ne latou a te vaitino, peipei ei ne latou a Paulo ki fatu kae soso ki tua mo te fa'kai, e leake eiloa latou me ko 'mate.

20Ka ko te 'lukuatuga o tino talitonu i ona tafa, ne tu ake a ia ki luga kae fanatu ki te fa'kai. I te aso ne 'soko atu, ne olo atu ei laua mo Panapa ki Teipe.

Ko Toe 'Foki atu a Laua ki Anitioka i Sulia

21I te otiga ne folafola atu ne laua a te Tala 'Lei i te fa'kai tena, ne maua ne laua ne soko e tokouke; 'foki atu ei laua ki Lusa, Ikonio, mo Anitioka i Pisitia.

22Ne fakamalosi atu ne laua a soko i kona, kae fesoasoani atu foki ki a latou ke tumau i te fakatuanaki. Ne fai atu foki ki a latou, “Ko te uke o puapuaga e fepaki mo tatou, e 'sao atu ei ki te Malo o te Atua.”

23Ne 'tofi foki ne laua i Ekalesia takitasi a toeaina mō latou. Ne 'talo kae fakaliki'liki mo tapuakiga, tuku atu katoatoa ei ne laua a latou ki te Aliki tela e fakatuanaki a latou ki ei.

24I te otiga o te la malaga i te fenua ko Pisitia, ne oko atu ei a laua ki Pafulia.

25Ne folafola atu ne laua te Tala 'Lei i Peleka, olo ifo ei ki lalo i Atalia;

26mai kona ne toe 'foki atu ei laua i te vaka ki Anitioka i Sulia, ko te fa'kai tela ne tuku atu ei laua ki te tausiga a te alofa tauanoa o te Atua, e tusa mo te galuega tela ko oti nei ne fai ne laua.

27I te la okoatuga ki Anitioka, ne 'luku ne laua a tino o te Ekalesia, kae fai atu ki a latou a mea katoa kola ne fai ne te Atua ki a laua, e pela foki mo te 'talaga o te auala ki tino o fenua fakaatea ke talitonu.

28Ne leva eiloa te la 'nofoga mo tino talitonu i kona.