2 TUPU 3 - Tuvalu Revised Bible

Ko te Taua a Isalaelu mo Moapi

1I te sefuluvalu o tausaga o te nofoaiga a Iosefatu, te tupu o Iuta, ne fai ei a Iolamo, te tama tagata a Aapo mo tupu o Isalaelu, kae ne tupu a ia i Samalia i tausaga e sefululua.

2Ne agasala a ia ki te Aliki, kae e se oko eiloa ki amioga masei a tena tamana mo tena matua ko Iesepela; ne ofa ne ia a fakatusa kola ne faite ne tena tamana ke tapuaki ei ki a Paala.

3E se fakagata eiloa te takiga ne ia o Isalaelu i te faiga faeloa o agasala, e pela eiloa mo te mea ne fai ne te Tupu ko Ielopoamo te tama a Nepata.

4A te Tupu o Moapi ko Mesa e uke ana lafu mamoe, kae i tausaga takitasi, e ave sale ne ia ki te tupu o Isalaelu e tusa mo te selau afe tamā mamoe, mo fulufulu mamoe mai mamoe e selau afe.

5Kae i te taimi ne mate ei a te Tupu ko Aapo, ko te Tupu eiloa ko Mesa ko taumafai o teke atu ki te malo o Isalaelu.

6Ne fanatu fakavave a te Tupu ko Iolamo mai Samalia, o fakamaopoopo tena kautau.

7Ne avatu tena fekau ki te Tupu o Iuta ko Iosefatu, ana muna: “A te tupu o Moapi tenei ko taumafai o teke mai ki a au; e a, e talia ne koe ke kau mai koe ki a au ke olo tasi taua o taua ki ei?”

Ne tali mai te Tupu ko Iosefatu penei, “Ao, au e toka, penei foki taku kau mo aku solofanua.

8Tefea te auala ka olo ei tatou ki te taua?”

Ne tali atu a Iolamo, “Tatou e olo i te auala loa tela e ui i loto i te vao o Etoma.”

9Tena ne ma'laga atu ei a te Tupu ko Iolamo mo te tupu o Iuta mo te tupu o Etoma mo olotou kau. I te fitu o aso o te ologa a latou, kae iloa aka me ko seai ne olotou vai, ko seai eiloa ne vai mō inu a tino pela foki mo olotou manu.

10Ne kalaga aka te Tupu ko Iolamo penei, “Tatou ko malaia! A te Aliki ko tuku ne ia tatou konei e tokotolu ki lima o te tupu o Moapi!”

11Ne fesili aka te Tupu ko Iosefatu penei, “E isi se pelofeta i konei e mafai o fesili tatou ki ei e uiga ki te loto o te Aliki?”

Ne tali aka te ofisa e tokotasi a te Tupu ko Iolamo penei, “A Elisaia te tama tagata a Safata tenei i konei. A ia ne tokolua ki a Elia.”

12Muna a Iosefatu, “A ia tena se tina pelofeta tonu eiloa.” Tena ne olo atu ei te tokotolu tupu kona ki a Elisaia.

13Muna a Elisaia ki te tupu o Isalaelu penei, “Ai a ka fesoasoani atu ei au ki a koe? Fano o sili atu ki pelofeta kola e sili sale ki ei tou tamana mo tou matua.”

Ne tali atu Iolamo, “Ikai! Ko te Aliki eiloa tenei ne tuku ne ia tatou ki lima o te tupu o Moapi.”

14Ne tali mai Elisaia, “I te igoa o te Aliki ola tenei e tavini au ki ei, au e tauto me moi se fakaava au ki tou taugasoa ko Iosefatu te tupu o Iuta, e penei e seai eiloa se mea e fai ne au mō koe.

15Sala mai nei se tino poto i te tata lakau.”

I te taimi ne tata ei te kitala a te tagata tata lakau, ko te 'mana eiloa o te Aliki ko oko mai ki a Elisaia,

16tena ne faipati ei a ia penei, “Tenei te muna a te Aliki: ‘Keli ne lua i luga i te koga tenei, tela ne tafe sale ei te vai.

17Tiga eiloa e se lavea nei ne koutou ne vaiua ke to io me se matagi ke agi, ka ko te koga tenei ka fonu i te vai; a koutou mo otou pulumakau mo nisi manu aka a koutou ka inu katoa i te vai tena.’ ”

18Ne faipati eiloa Elisaia, muna a ia, “A te mea tenei se mea faigofie faeloa o fai ne te Aliki; ka tuku atu ne ia a te manumalo ki a koe i te kau Moapi.

19Ka fakatakavale katoa eiloa ne koutou a olotou fa'kai 'gali, kola e isi ne olo; ka kati katoa ne koutou ki lalo a olotou lakau fai fuaga; ka fakagata foki te tafe o olotou vaitafe foliki, kae fakama'sei foki ne koutou olotou laukele ola o taotao ki fatu.”

20I te taeao akega, i te taimi e ofo sale ei te taulaga i taeao takitasi, ne tafe mai ei a te vai, ne tafe mai i Etoma, tena ne 'sua ei te laukele.

21I te 'logoga o te kau Moapi i te tokotolu tupu kola ko o'mai o faitaua ki a latou, ne fakamaopoopo ei ne latou a tagata katoa kola e mafai o taua, mai tagata foliki ke oko eiloa ki tagata matua, kae fakatulaga i te tuakoi o latou.

22I te ala akega a latou i te taeao o te sua aso, matea ei ne latou a te vai ko lanu toto i te sulu mai o te la.

23Ne 'poi aka te kau Moapi, olotou muna, “Mea nei ne toto!” “A te tokotolu tupu kola ne o'mai o taua ki a tatou, kaati ne fakatau taua eiloa i a latou, fakatau mate atu foki eiloa! Tatou ka olo o 'fao mai olotou mea i olotou koga ne nofo ei latou!”

24Kae i te oko atuga o latou ki te koga e nofo ei te kau Isalaelu, tena kae ma'fuli mai te kau Isalaelu, 'ta aka latou kae afuli atu ke 'tele. Ne afuli atu eiloa ne te kau Isalaelu a te kau Moapi 'ta valevale atu eiloa ne latou,

25kae fakama'sei foki olotou fa'kai. Kafai e oko atu te kau Isalaelu ki se kogā laukele ola, e tofu katoa latou mo fatu o peipei ki ei, tena ne fonu katoa ei a laukele ola i fatu; ne fakagata foki ne latou te 'tafe o vaitafe foliki kae kati ki lalo a lakau fai fuaga. Ne 'toe mai eiloa te fa'kai o Kila kae ne nikoi ne te kau sana fatu, kola ne taua ki ei.

26I te iloaga ne te tupu o Moapi i a ia ka takavale, ne fakamaopoopo ne ia e fitu selau ana sotia tau pelu, taumafai ei a ia o ulu atu i loto i te kau a te fili ke sola latou ki te tupu o Sulia, kae ne seki taunu te mea ne fakamoemoe a ia ki ei.

27Tena, ne puke mai ne ia tena tama tagata matua eiloa, tela ka sui i a ia o fai mo tupu, kae ofo ne ia i luga i te pui o te fa'kai ke fai mo taulaga ki te atua o Moapi. Ne ma'taku te kau Isalaelu, tena ne tiaki ei ne latou te fa'kai tena, o 'foki atu ki te lotou fenua.