1Ne tuku mai ne te Aliki
2a fakatonuga konei ki a Mose mo tino Isalaelu. Kafai se tino ko oti ne tuku atu ki te Aliki i se fakataunuga o se feagaiga, e toe mafai o maua tena saolotoga manafai e togi atu ne ia te aofaki tenei o tupe,
3-7pela eiloa mo te fua faka te malo:
— tagata matua, mai te luasefulu ki te onosefulu tausaga: e limasefulu tupe siliva
— fafine matua: e tolusefulu tupe siliva
— tamataene: mai te lima ki te luasefulu tausaga, e luasefulu tupe siliva
— tamafine: e sefulu tupe siliva
— tamaliki tagata: mai lalo o te lima tausaga, e lima tupe siliva
— tamaliki fafine: e tolu tupe siliva
— tagata matua: mai luga o te onosefulu tausaga e sefulu lima tupe siliva
— fafine matua: mai luga o te onosefulu tausaga e sefulu tupe siliva.
8Kafai te tagata ne fai tena feagaiga e mativa, ko se maua ne ia o togi te aofaki e tau o togi mo te saolotoga o te tagata ne tuku atu ne ia ki te Aliki, e tau o aumai ne ia te tagata tena ki te faitaulaga, tela ka tuku ifo ne ia te togi ki te mea e mafai ne te tagata tena o togi.
9Kafai se manu ne tuku atu ki te Aliki i te faiga o te feagaiga, se toe tau o fakafoki me i meaalofa katoa e tuku atu ki te Aliki e 'malu katoa.
10Tela la, e se toe tau mo te tino ne tuku atu ne ia te manu o toe puke mai kae sui ki se isi manu aka fakaatea, me kafai e fai ne ia pena, ko tena uiga, ko te ava manu katoa ko puke ma te Aliki.
11Kafai se manu lailai ne fakaaoga i te faiga o te feagaiga, tela e se taulia ke fai mo taulaga ki te Aliki, ko tena uiga ko tau o ave ki te faitaulaga.
12Ka fakatau ne te faitaulaga se togi e tau mo te manu, e fuafua eiloa ki tena lei mo te se lei, ko tena togi eiloa tena.
13Kafai e manako te tagata tena o toe togi mai a te manu tena, e tau o togi ne ia te aofaki tena ko oti ne fakamoe, fakaopoopo mo te luasefulu pasene.
14Kafai se tino ko tuku atu tena fale ki te Aliki, ko te faitaulaga ka fuafua ne ia te togi o te fale, e fakatau eiloa ne ia te togi ki te 'lei o te fale.
15Kafai te tino e o ia te fale ko manako o toe togi mai te fale, e tau o togi ne ia te aofaki ko oti ne fakamoe, fakaopoopo ki ei te luasefulu pasene.
16Kafai se tino ko tuku atu se vaega o tena manafa ki te Aliki, ko te togi o te manafa tena ka fuafua faka'lei ki te uke o fuaga o lakau e toki ei te vaega o te manafa tena. E tusa mo te sefulu tupe siliva i te taki luasefulu kilokalame o kalite.
17Kafai ne tuku atu ne ia te manafa mai tua faeloa o te Tausaga o te Fakafokiga o Mea, ko tena uiga e togi katoa eiloa.
18Kafai ne tuku atu i se taimi mai tua ifo, ko te faitaulaga ka fuafua ne ia te togi ki te aofaki o tausaga mai mua o te Tausaga o te Fakafokiga o Mea.
19Kafai te tagata e o ia te manafa ko manako o toe togi mai ne ia, e tau o togi ne ia a te aofaki o te togi fakaopoopo ki ei te luasefulu pasene.
20Kafai e togi atu ne ia a te manafa ki se tino fakaatea kae seki togi mua mai ne ia mai te Aliki, ko tena uiga ko seai se saolotoga o ia o toe togi mai tena manafa.
21I te Tausaga o te toe Fakafokiga o Mea, a te manafa ka fai mo tofi tumau o te Aliki, tela la, e puke ma faitaulaga.
22Kafai se tagata ne tuku atu ne ia ki te Aliki se manafa ne togi ne ia mai te sua tino;
23ka fuafua faka'lei ne te faitaulaga a te aofaki o te togi, faka'tau ki te uke o tausaga mai mua o te Tausaga o te Faka'fokiga o Mea, tela la, e tau mo te tagata tena o togi te aofaki tena i te aso eiloa tena, a te tupe e a te Aliki.
24Kafai e oko ki te Tausaga o te Faka'fokiga o Mea, a te manafa e fakafoki eiloa ki te tagata e o ia tonu te manafa, io me ki tena fanau.
25A 'togi katoa e tau o fua ki te tulaga faka‐te‐malo.
26A te toekimua o so se manu e a te Aliki, tela la, e se mafai ne so se tino o ofo atu ke fai mo taulaga loto malie. Se tamā pulumakau, tamā mamoe io me se tamā kouti e a te Aliki,
27ka ko te toekimua o se manu lailai e mafai o toe togi mai ki te togi ko oti ne fakamau, fakaopoopo ki ei te luasefulu pasene. Kafai e se togi mai ne koe, e mafai foki o togi atu ki se isi tino i te togi tena ko oti ne fakamau.
28 ki te Aliki, e se toe tau o togi mai io me fakatau atu ne ia; me se tino, io me se manu, io me se manafa. A te mea tena ko fai eiloa mo mea totino a te Aliki.
29Ke oko foki eiloa ki te tino ola tela ko oti ne fakamalaiagina ne tino, e se talia eiloa ke toe togi mai ke saoloto; e tau eiloa o tamate.
30 Nume 18.21; Teu 14.22-29 E tasi vae sefulu o mea e fua mai i te laukele, me ne saito io me ne fuaga lakau, e a te Aliki.
31Kafai se tino e manako o togi mai ne ia, e tau o togi ne ia te aofaki o te togi, fakaopoopo ki ei te luasefulu pasene.
32E tasi te manu fagai mai manu fagai e sefulu e tuku ma te Aliki. Kafai e lau a manu, ko te sefulu o manu i te faitauga e a te Aliki.
33Ke mo a te tagata e a ia a manu e fakatoka ne ia ko te mea ke fili faeloa a manu masei; kae ke mo a foki e fai ne ia se fesuiakiga. Kafai e sui ne ia te sua manu ki te sua manu, ko tena uiga ko manu kona e lua e puke ma te Aliki, tela la, e se toe tau o togi mai, mai te Aliki.
34Kona a fakatonuga kola ne tuku mai ne te Aliki ki a Mose i luga i te Mauga o Sinai mo tino Isalaelu.
Who We AreWhat We EelieveWhat We Do
2025 by iamachristian.org,Inc All rights reserved.
