2 SAMUELU 24 - Tuvalu Revised Bible

Ko te Lauga ne Tavita a Tino o te Fenua(1NTupu 21.1-27)

1Ko toe kaitaua te Aliki ki Isalaelu, tela ne fai ei ne ia Tavita ke aumai ne ia te puapuaga ki luga i a latou. Muna a te Aliki ki a ia penei, “Fano o lau a tino Isalaelu mo Iuta.”

2Tena ne fakatonu atu ei a Tavita ki a Ioapo te takitaki o tena kautau penei, “Olo mo au ofisa ki matakaiga katoa o Isalaelu mai te sua mata o te fenua ki te sua mata, o lau a tino Isalaelu katoa. Au e manako ke iloa ne au te aofaki katoa o latou.”

3Kae ne tali atu a Ioapo ki te tupu penei, “Tou Malu, a te Aliki tou Atua ke fai ne ia a tino Isalaelu ke selau taimi te tokouke i lo te taimi nei, kae ke ola foki koe ke lavea ne koe manafai ko fai pena ne ia. Ai a e manako ei koe, Tou Malu, o fai te mea tenei?”

4Ka ko te tupu ne fai eiloa ne ia Ioapo mo ana ofisa ke faka'logo ki tena fakatonuga. Tena ne olo atu latou mai i a Tavita, o olo o lau a tino Isalaelu.

5Ne sopo atu latou ki te sua feitu o te Iolitana, fakama'nava ei latou i te feitu ki saute o Aloela, te fa'kai i te kogaloto o te vanu, i te laukele o Kato. Mai kona, olo atu ei latou faka matu ki Iaseli,

6ke oko atu foki eiloa ki Kileata mo Katesa i te laukele o te kau Heti. Mai Tanu, ne olo atu ei latou ki Saitonu i te togala.

7Ne olo atu foki eiloa latou ki saute ki te fa'kai o Tulo tela e isi sena olo, pela foki ki fa'kai katoa o tino Hivi mo tino Kanana, kae fakaoti eiloa ki Pelesepa i te feitu ki saute o Iuta.

8Tela la, e tusa mo te iva masina mo aso e luasefulu ne olo ei latou i loto i te fenua katoa, oti i ei, foki mai ei latou ki Ielusalema

9Ne lipoti mai ne latou ki te tupu a te aofaki katoa o tagata ko tau o fai mo sotia, e tusa mo te valuselau afe i Isalaelu, kae limaselau afe i Iuta.

10Kae i te otiga ne fai ne Tavita te lauga o tino, ne tai se toka tena loto, tena ne fai atu ei a ia ki te Aliki penei, “Au ko agasala i te faiga ne au o te mea tenei! Fakamolemole fakamagalo mai au. Ko oko eiloa i toku valea.”

11I te tafataeao e tasi, i te alaakega a Tavita, ne faipati mai ei a te Aliki ki te pelofeta ko Kato, tena tagata kilo mao, ana muna penei,

12“Fano o fai ki a Tavita ke filifili a ia i mea konei e tolu, kae e fai eiloa ne au a te mea e filifili ne ia.” I te tafataeao o te sua aso, a Tavita ko fatoa pula aka eiloa,

13kae fanatu Kato ki a Tavita o fakaasi atu a muna a te Aliki ki a ia, kae ne fesili atu foki ei a ia penei, “Tefea te mea e filifili ne koe? Ko te tolu tausaga o te oge i tou fenua, io me ko te tolu masina e tele ei koutou mai otou fili, io me ko te tolu aso o te famai i tou fenua? Mafaufau faka'lei ki te mea tena, ko fai mai ei se tali ke fano au o fakailoa ki te Aliki.”

14Ne tali atu Tavita, “Ko se iloa ne au me se a taku mea ka fai! Au se manako ke fakasala au ne tino. Tuku eiloa ke fakasala tatou ne te Aliki, me ko ia foki eiloa ko alofa.”

15Tena, ne aumai ei ne te Aliki se famai ki luga i Isalaelu, e kamata i te taeao ke oko eiloa ki te taimi ko oti ne fakamoe ne ia. Mai i te mata o te fenua ki te sua mata, e tusa mo te fitusefulu afe tagata Isalaelu ne mate.

16I te taimi ko fakatoka ei te agelu a te Aliki o ofa fakapalele a Ielusalema ne toe 'fuli mafaufauga o te Aliki ki te fakasalaga o tino, tena ne fai atu ei ki te agelu tela e fai te taga o tino, “Ko lava! Ko gata i kona!” A te agelu e nofo i te taimi tena i te koga solo saito a Alauna, te tagata Iepuse.

17Ne lavea ne Tavita te agelu e tamate a tino, tela ne fai atu ei a ia ki te Aliki penei, “Ko au te tagata agasala. Ko au ne fai ne au te mea 'se. Ne a mea a tino fakaalofa kona ne fai? E tau eiloa o fakasala ne koe a au mo toku kaiga.”

18I te aso foki eiloa tena, ne fanatu a Kato ki a Tavita kae fai atu penei, “Fano ki te koga solo saito a Alauna o faite se fata-fai-taulaga i kona ki te Aliki.”

19Ne fakalogo Tavita ki te fakatonuga a te Aliki, tena, fano eiloa e pela mo te fakatonuga a Kato ki a ia.

20Ne kilo ifo Alauna, lavea ei ne ia a te tupu mo ana ofisa e olo atu ki a ia. Ne fakasiga ifo a ia i mua o Tavita

21kae fesili atu penei, “Tou Malu, ai a ko o'mai ei koutou ki konei?”

Ne tali atu Tavita, “Matou ne o'mai o togi tau koga solo saito, ke faite se fata-fai-taulaga i ei ki te Aliki, ke na fakagata te famai tenei e poko.”

22Muna a Alauna, “Tou Malu, puke atu, kae ofo atu ki te Aliki so se mea e loto koe ki ei. Konei a pulumakau ke sunu mo fai taulaga i luga i te fata-fai-taulaga; konei a amo e sai sale ki ei, mo laupapa o te mea solo saito ke fai mo fafie.”

23Ne tuku katoa atu ne Alauna ki te tupu kae fai atu ki a ia penei, “A te Aliki tou Atua ke talia ne ia tau taulaga.”

24Kae ne tali atu te tupu, “Ikai, e togi atu eiloa ne au te tupu mo au mea kona. E se mafai o ofo ne au ki te Aliki toku Atua a taulaga kola e seki togi ne au.” Tena, ne togi ne ia a te koga solo saito tena mo pulumakau ki te limasefulu tupe siliva.

25Tena, ne faite ne ia se fata-fai-taulaga ki te Aliki kae ofo ne ia a taulaga sunu mo taulaga fakafetai. Ne tali mai te Aliki ki tena talo, ko te famai eiloa i Isalaelu ko gata.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help