2 TUPU 21 - Tuvalu Revised Bible

Ko Manase te Tupu o Iuta(2NTupu 33.1-20)

1I te sefululua o tausaga o Manase, ne fai ei a ia mo tupu o Iuta, kae ne tupu a ia i Ielusalema i tausaga e limasefulu lima. A tena matua ko Hefesipa.

2Iele 15.4 Ne agasala Manase ki te Aliki, me ne tautali i amioga ma'sei a malō kola ne afuli keatea ne te Aliki mai te fenua tenei, i te taimi ne o'mai ei tena fenua o nofo i ei.

3Ne toe faite aka ne ia a koga tapuaki fapau'pau kola ne ofa ne tena tamana ko Hesekia; ne faite foki ne ia ne fata-fai-taulaga mō fai tapuakiga ki a Paala kae faite foki se fakatusa o te atua fafine ko Asaila, e pela mo te mea ne fai ne Aapo te tupu o Isalaelu. A Manase e tapuaki foki ki fetū.

42Samu 7.13 Ne faite foki ne ia ne fata-fai-taulaga fapaupau i te Faletapu, ko te koga tela ne fai mai te Aliki me ko te koga e tau o tapuaki atu a tino ki a ia.

5I potu ateatea kola e lua o te Faletapu, ne faite ne ia i ei ne fata-fai-taulaga mō fai tapuakiga ki fetū.

6Ne ofo atu foki ne ia tena tama tagata ke fai mo taulaga sunu. Ne tauloto ne ia a amioga fakataulaitu, kae talitonu ki tino fakamatala mea e 'tupu i aso fakamuli, mo tino faka'tu agaga. Ko oko eiloa i te masei o ana agasala ki te Aliki, tena ne fakaoso ei ne ia te kaitaua o te Aliki.

71Tupu 9.3-5; 2NTupu 7.12-18 Ne fakatu ne ia a te fakatusa o te atua fafine ko Asaila i loto i te Faletapu, te koga ne fai ei a pati a te Aliki ki a Tavita mo Solomona penei: “A te Faletapu tenei, tenei e tu i Ielusalema, ko te koga ko oti ne filifili ne au mai kogā koga katoa o te sefululua matakaiga o Isalaelu, me ko te koga e tau ei koutou o tapuaki mai ki a au.

8Kafai e faka'logo mai te fanauga a Isalaelu ki aku fakatonuga kae tausi ki aku Tulafono katoa kola ne avatu ne Mose ki a latou, kae ka se afuli ne au latou keatea mai te fenua tela ne tuku ne au ki olotou tupuga.”

9Ka ko tino o Iuta e seki faka'logo ki te Aliki; ne 'taki latou ne Manase ke fai ne latou a agasala tafasli i te ma'sei i lo agasala ne fai ne malo kola ne afuli keatea ne te Aliki mai te fenua tenei, i te taimi ne o'mai ei tena fenua o nofo i ei.

10A te Aliki ne faipati mai ki ana tavini ko pelofeta, muna a ia,

11“Ko oti ne fai ne te tupu ko Manase a amioga e tafasili atu i te ma'sei i lo amioga ne fai ne tino o te fenua o Kanana; kae ne 'taki ne ia a tino o Iuta ki te agasala me ne tapuaki ki tupua a ia ne faite.

12Tela la, ko au, te Aliki te Atua o Isalaelu, ka aumai ne au se fakalavelave lasi eiloa ki luga i Ielusalema mo Iuta, so se tino e logo i te fakalavelave tena ko oko eiloa i ana poi.

13Ka fakasala ne au Ielusalema pela mo te fakasalaga ne au o Samalia, pela foki mo te mea ne fai ne au ki te Tupu o Isalaelu ko Aapo mo tino o tena gafa. Ka fulu faka'ma ne au a Ielusalema ke seai eiloa ne tino e toe mai i ei, ke 'ma eiloa pela me se tifa tela ko oti ne fakamalō kae pulou ki lalo.

14Ka tiaki ne au a tino kola e toe mai, kae tuku atu ki olotou fili kola ka mai o 'ta latou kae 'fao olotou mea.

15Ka fai ne au te mea tena ki oku tino me ne agasala mai ki a au kae fakaoso ne latou toku kaitaua talu mai te taimi ne o'mai ei keatea olotou tupuga mai i Aikupito ke oko mai eiloa ki te aso nei.”

16A Manase ne tamate valevale ne ia a tino e seai ne olotou mea 'se ne fai, tela la, a auala o Ielusalema ko fonu eiloa i te toto; ne fai ne ia a te mea tena, kae ne 'taki foki ne ia a tino o Iuta ke ifo ki tupua, tena ko agasala ei latou ki te Aliki.

17A nisi tala e uiga ki a Manase, e pela mo agasala a ia ne fai, e fakamau katoa i te tusi o Te Tala Tuku Fakasolo o Tupu o Iuta.

18Ne mate atu Manase, kae ne tanu i te fatoaga o te palesi, te fatoaga a Usa. Ne sui a ia ne tena tama tagata ko Amoni o fai mo tupu.

Ko Amoni te Tupu o Iuta(2NTupu 33.21-25)

19I te luasefulu lua o tausaga o Amoni kae fai a ia mo tupu o Iuta, kae ne tupu a ia i Ielusalema i tausaga e lua. A tena matua ko Mesulemeta, te tama fafine a Halusa, mai te fa'kai o Iotipa.

20Ne agasala foki a ia ki te Aliki e pela eiloa mo tena tamana ko Manase;

21ne tautali a ia i amioga a tena tamana, kae ifo foki ki tupua kola e ifo sale ki ei tena tamana.

22Ne teke a ia ki te Aliki, te Atua o ona tupuga, kae se fakalogo ki fakatonuga a te Aliki.

23Ne alamati a ia ne ana ofisa, tena tamate ei a ia ne ana ofisa kona i te palesi.

24Ne tamate ne tino Iuta a tino kola ne olo o tamate a Amoni, kae fakasopo ne latou tena tama ko Iosia ke fai mo tupu.

25A nisi tala e uiga ki a Amoni e fakamau katoa i te tusi o Te Tala Tuku Fakasolo o Tupu o Iuta.

26A Amoni ne tanu i te tanuga i te fatoaga o Usa, kae ne sui a ia ne tena tama tagata ko Iosia o fai mo tupu.