LOMA Fakatomuaga - Tuvalu Revised Bible
Fakatomuaga Te Tusi a Paulo ki tino Loma ne tusi mo fakatoka se auala mai te fuafuaga a Paulo ke fakaoko atu tena asiga ki te Ekalesia i Loma. A tena fuafuaga ke 'galue fakatasi mo te kautaina Kelisiano i kona mo se vaitaimi, kae mai te lago fakatasi o latou, ke fano a ia ki Sepania. Ne tusi ne ia o fakamatala a tena malamalama i te fakatuanakiga kelisiano mo ana pokotiaga ki te olaga o Kelisiano. A te tusi e aofia i ei a te katoatoaga o te fekau a Paulo.Mai i tua o ana muna fakafetaui ki tino o te Ekalesia i Loma tela ne fakaasi atu foki ne i a ki a latou me i a ia e talo foki mo latou, Ne taku atu foki ne Paulo a te manatu taua o te tusi: “Te tala 'lei e fakaasi i ei me ne pefea a te Atua o faka'lei a tino mo ia: ne fai e alatu i te fakatuanaki mai i te kamataga ke oko ki te fakaotiga” (1.17).Tena ne fai i ei ne Paulo te fakavae penei. A tino katoa, se Iutaia me se tino o fenua fakaatea, e tau loa o faka'lei mo te Atua, me i a latou katoa e nofo i lalo o te malosi o te agasala. A tino katoa ne fai faka'lei mo te Atua e alatu i te fakatuanaki ki a Iesu Keliso. A te sua mea ne fakamatala ne Paulo ko te olaga fou i te sokotasi mo Keliso ko tena ikuga ko te mafutaga fou mo te Atua. Te tino talitonu ka maua ne i a se filemu mo te Atua kae ko fakasaoloto ne te Agaga o te Atua mai loto o te malosi o te agasala mo te mate. I te mataupu 5-8 a Paulo ne fakamatala foki ne ia te pogai o te Tulafono a te Atua mo te malosi o te Agaga o te Atua i te olaga o te tino talitonu. Mai kona ne fakafeagai foki te Apositolo mo te fesili me ne pefea a tino Iutaia mo tino o fenua fakaatea o aofia ki loto o te fakatokaga a te Atua mo tino katoa. I te fakaotiga o ana manatu ne fakaasi ne i a me i te 'teke ne tino Iutaia a Iesu se vaega loa o te fakatokaga a te Atua ki te aumaiga o tino katoa ki te mafutaga mo te alofa tauanoa o te Atua i a Iesu Keliso, kae i tena talitonuga me i tino Iutaia ka se toe mafai ne latou o teke a Iesu. I te fakaotiga a Paulo ne tusi ne ia a te tulaga o te olaga tela e 'tau o olagina ne te Kelisiano, kae maise eiloa ko auala o te alofa ki nisi tino. Ne avake ne i a ne mataupu taua pela mo te olaga tavini ki te Atua, ko tiute o te Kelisiano ki te malo e pela foki mo sose tino, mo fesili o te mafaufau. Ne fakaoti ne i a tena tusi ki ana fekau totino mo ana muna tavae ki te AtuaKo Fakasologa o MataupuFakatomuaga mo ulu tala (1.1-17)Ko te manakoga o tino ki te fakaolataga (1.18—3.20)Auala o te fakaolataga a te Atua (3.21—4.25)Ola fou i a Keliso (5.1—8.39)Isalaelu i fuafuaga a te Atua (9.1—11.36)Amioga faka-Kelisiano (12.1—15.13)Fakaotiga mo alofaaga totino (15.14—16.27)
