1 NOFOAIGA TUPU 26 - Tuvalu Revised Bible

Ko Tino Tiute o te Faletapu

1Tenei te fakasoaga o galuega mō te kau sa Levi kola e tausi ne latou a te Faletapu. A te tagata mai i te kaukaiga o Kola, ko Meselemia, te tama tagata a Kole, mai i te kaiga o Asafo.

2E tokofitu ana tama tagata, konei olotou igoa, mai i te tino matua o fanaifo ki lalo: ko Sakalia, Ietiaelu, Sepatia, Ietanielu,

3Elama, Ieoananu, mo Elioenai.

4 2Samu 6.11; 1NTupu 13.14 A te sua tagata, ko Opeta Etoma. Ne fakamanuia a ia ne te Atua o avatu ki a ia e tokovalu tama tagata. Konei olotou igoa mai i te tino matua o fanaifo ki lalo; ko Semaia, Ieosapata, Ioa, Sakala, Netanelu,

5Amielu, Isakala, mo Peuletai.

6-7A Semaia, te tama matua eiloa a Opeta Etoma, e tokoono ana tama tagata: ko Otini, Lefaelu, Opeta, Elisapata, Eliu, mo Semakia. A latou ne tagata e tauā i te lotou kaukaiga, me ne tagata fai mea mafai; a te tokolua fakamuli, ne tagata e poto.

8E tusa mo te tino ono mo te tokolua tagata tafasili i te atamai mai i te kaiga o Opeta Etoma, mō te galuega tenei.

9Mai i te kaiga o Meselemia, e tusa mo te tinoagafulu mo te tokovalu tagata tafasili i te atamai mō te galuega tena.

10A te tagata mai i te kaukaiga o Melali ko Hosa; e tokofa ana tama tagata: ko Semeli, (ne fai a ia ne tena tamana ke fai mo takitaki, e ui eiloa a ia e se ko te toekimua),

11Hilikia, Tepalia, mo Sakalia. A te aofaki katoa o tino i te kaiga o Hosa kola ko tino tausi o te Faletapu e tusa mo te tinogafulu mo te tokotolu.

12A tino tausi o te Faletapu ne vaevae ki potukau, i olotou kaiga eiloa, kae ne fakasoa foki latou ki olotou tiute kesekese i te Faletapu, e pela eiloa mo te mea ne fai ki nisi sa Levi.

13Ne fai te vili i kaiga takitasi, faitalia me e pefea te tokouke, ke iloa ei a mataloa e tausi ne latou.

14Ne fili a Selemia i te faiga o te vili, ke tausi ne ia te mataloa i te saegala, ka ko tena tama tagata ko Sakalia, tela e tuku faeloa ne ia a muna fakatonutonu lei, ne maua ne ia a te mataloa i matu, i te faiga o te vili.

15Ko Opeta Etoma e pule i te tausiga o te mataloa ki saute, ka ko ana tama tagata ne avatu ki ei te tofi ko te tausiga o potu teu koloa.

16Ko Supima mo Hosa ne tuku ki ei te tausiga o te mataloa ki te togala mo te Mataloa o Salekata i te auala i luga. A tiute kona ki te tausiga o mea kona, e fakasoa foki i taimi, e oti te sua potukau, kae sui atu te sua potukau.

17E tokoono tino tausi i te feitu ki te saegala, i aso takitasi; e tokofa i te feitu ki matu, kae e tokofa foki i te feitu ki saute. E tokofa tausi i potu teu koloa, e taki tokolua i te potu teu koloa e tasi.

18E tokofa tino tausi i te fakaosoga i te togala, i tafa o te auala, kae e tokolua i loto i te fale tena.

19Tena te fakasoaga o tiute o tino i te kaukaiga o Kola mo te kaukaiga o Melali.

Ko Nisi Tiute i te Faletapu

20A nisi sa Levi e tausi ne latou a koloa o te Faletapu mo potu e teu ei a meaalofa kola ko oti ne fakatapu ki te Atua.

21A Latana, te tama tagata e tokotasi a Kelesona, ko te tupuga o nisi kaiga, e aofia i ei te kaiga o tena tama tagata ko Ieielu.

2226 A te sua tokolua tama tagata a Latana, ko Setama mo Ioelu, e pule i te tausiga o koloa o te Faletapu, mo potu teu koloa.

23E isi foki ne tiute ne tuku atu ke fai ne tino ne tupu mai i a Amalamo, Isala, Hepelona mo Usieli.

24A te ofisa pule i koloa o te Faletapu, ko Sepuelu, se tagata i te kaukaiga o Kelesoma, te tama tagata a Mose.

25A Sepuelu e kaiga mo Selomita i a Eliesa, te taina o Kelesoma. A Eliesa ko te tamana o Lehapaia, Lehapaia ko te tamana o Iesaia, Iesaia ko te tamana o Iolamo, Iolamo ko te tamana o Sikeli, Sikeli ko te tamana o Selomita.

26A Selomita mo tino i tena kaiga e pule i meaalofa katoa kola ko oti ne fakatapu ki te Atua ne te Tupu ko Tavita, e pule foki i matai o kaiga takitasi, pela foki i takitaki o kaukaiga, mo ofisa o te kautau.

27Ne puke ne latou a nisi mea tāua kola ne 'fao mai ne latou mai i olotou fili i te taua, kae fakatapu ke fakaaoga i te Faletapu.

28A Selomita mo tena kaiga e pule i mea katoa kola ko oti ne fakatapu ke fakaaoga i te Faletapu, e aofia ei a meaalofa kola ne aumai ne te pelofeta ko Samuelu, meaalofa ne aumai ne te Tupu ko Saulo, meaalofa ne aumai ne Apinelu te tama tagata a Nelu, mo meaalofa ne aumai ne Ioapo te tama tagata a Seluia.

Ko Tiute o Nisi sa Levi

29A Kenania mo ana tama tagata, ne tino i te gafa o Isala, ne tuku ke fai ne latou a galuega fakafailautusi: te fakamauga o tala tuku fakasolo, mo te fakatokaga o kinauga a tino Isalaelu.

30A Hasapaia, se tagata i te gafa o Hepelona, mo ana kaiga e 1700, ne tagata takutakua katoa, ne tuku ke pulepule ne latou a mea tau te lotu mo mea tau te malo i Isalaelu ki te togala o te Vaitafe ko te Iolitana.

31Ko Ielaia ko te takitaki o tino i te gafa o Hepelona. I te fasefulu o tausaga o te nofoaiga a Tavita, ne fai ei se sukesukega e uiga ki te gafa o Hepelona. E isi ne sotia ko iloga, i te kaiga tena, ne maua atu e nofo i Iasela i te kogā laukele o Kileata.

32Ne fili ne te Tupu ko Tavita e 2700 matai takutakua i te kaiga o Ielaia, kae tuku ne ia ke pulepule ne latou a mea tau te lotu mo mea tau te malo i Isalaelu ki te saegala o te Vaitafe ko Iolitana — ko kogā laukele o Leupena, Kato, mo Manase i te Saegala.