ESEKIELU 48 - Tuvalu Revised Bible

Ko te Vaevaega o te Fenua i Matakaiga

1-7A te tuakoi ki matu o te fenua e fanatu faka‐te‐saegala, mai i te Tai Metitilani ki te fa'kai o Hetiloni, ki te Auala o Hamata, ki te fa'kai o Enoni, ki te tuakoi i te va o te malo o Tamaseko mo te malo o Hamata, A matakaiga takitasi e tau o maua se vaega o latou tela e vau mai te tuakoi i te saegala o fano fakatetogala ki te Tai Metitilani, e penei te fakasologa mai i matu o fano ki saute:

Tanu

Asela

Nafatali

Manase

Efalaima

Leupena

Iuta.

Ko te Vaega Fakapitoa i te Kogaloto o te Fenua

8A te sua vaega o te fenua e tau o tuku fakaatea ke fakaaoga ki se mea taua. E tau o sefululua mo te afā kilomita te lauefa mai i matu ki saute, kae e pena foki te loa mai i te saegala ki te togala, e pela mo vaega ne tuku ki matakaiga. A te Faletapu e tu i te vaega tena.

9I te kogaloto o te vaega tena, e tau o fua i ei e sefululua mo te afā kilomita ki te sefulu kilomita ke fakatapu mo te Aliki.

10A faitaulaga e tau o maua se vaega o latou i te laukele tapu tena. A te vaega o latou i kona e sefululua mo te afā kilomita mai i te saegala ki te togala, kae e lima kilomita mai i matu ki saute. A te Faletapu o te Aliki e tau o tu i te kogaloto o te koga tena.

11A te laukele tapu tena e mo faitaulaga i te gafa o Satoka. Ne tavini fakamaoni mai a ia ki a au, kae e seki kau ki te fenua o Isalaelu i te faiga o mea se, e pela mo nisi i te matakaiga o Levi kola ne kau i te faiga o amioga masei.

12Tela la, e tau o maua se vaega fakapitoa o latou ke tafa ki te vaega o te kau sa Levi, kae ka fai mo vaega tafasili i te tapu i vaega katoa.

13A te kau sa Levi foki e tau o maua se vaega fakapitoa mo latou, i te feitu ki saute o te vaega o faitaulaga. E tau foki o sefululua mo te afā kilomita mai i te saegala ki te togala, kae lima kilomita mai i matu ki saute.

14A te laukele tela ne fakatapu mo te Aliki ko te toe vaega gali eiloa o te fenua, kae e tapu eiloa se laukele i ei e togi atu ki se tino, io me fesuiaki ki se isi koga, io me tuku atu ki se isi tino. A te koga tena e tapu kae e o te Aliki.

15A te vaega o te laukele fakapitoa tela e toe, e sefululua mo te afā kilomita ki te lua mo te afā kilomita, kae e se tapu, kae ke fakaaoga ne tino. E mafai ne tino o nofo i kona o fakaaoga te laukele. A te fa'kai e tau o tu i te kogaloto o te koga tena,

16kae e tau o sikuea, e 2,250 mita i feitu takitasi.

17I feitu katoa o te fa'kai, e tau o isi se avanoaga e 125 mita i feitu takitasi.

18A te laukele tela e toe, manafai ko oti ne faite a te fa'kai i te laukele ki saute o te laukele tapu — e lima kilomita ki te lua mo te afā kilomita i te feitu ki te saegala, kae e lima kilomita ki te lua mo te afā kilomita i te feitu ki te togala — e tau o fakaaoga te laukele toe tena mo fai fatoaga a tino kola e nofo i te fa'kai tena.

19So se tino e nofo i te fa'kai tena, faitalia te matakaiga e vau a ia i ei, e mafai eiloa o fai fatoaga i te fenua tena.

20Tela la, a te laukele i te kogaloto o te vaega tena ne tuku fakaatea, e tau o sikuea — e sefululua mo te afā kilomita i feitu takitasi, kae e aofia foki i ei a te koga tela e tu i ei a te fa'kai.

21-22I te feitu ki te saegala mo te togala o te laukele tenei e tu i ei te Faletapu, te laukele o faitaulaga, te manafa o te kau sa Levi, mo te fa'kai, a te toega o te laukele e a te pelenise pule. E fanatu faka‐te‐saegala ki te tuakoi i te saegala, kae faka te togala e fano ki te Tai Metitilani, kae e gata mai i matu i te vaega o Iuta, kae ki saute e gata mai i te vaega o Peniamina.

Ko Laukele mo Nisi Matakaiga

23-27I te feitu ki saute o te laukele fakapitoa tenei, a matakaiga kola e seki ai ne lotou vaega ka maua olotou vaega takitasi — e vau mai i te tuakoi i te saegala ke oko ki te Tai Metitilani i te togala. Tenei te fakasologa mai i matu o fano ki saute:

Peniamina

Simeona

Isakala

Sepulona

Kato

28I te feitu ki saute o te vaega o te matakaiga o Kato, a te tuakoi ko tele faka saute togala mai i Tamala ki te laukele o Katesa, kae mai i kona ko fano ei faka matu togala i te tuakoi o Aikupito ke oko ki te Tai Metitilani.

29Muna a te Aliki Sili, “E fai pena te vaevaega o te fenua i matakaiga o Isalaelu.”

Ko Mataloa o Ielusalema

30-34 Faka 21.12,13 E sefululua mataloa ki loto i te fa'kai o Ielusalema. A pui takitasi i ona pui e fa, e 2,250 mita te loa, kae e tolu mataloa i te pui e tasi, e fakaigoa katoa ki igoa o matakaiga o Isalaelu. A mataloa i te pui ki matu e igoa ko Leupena, Iuta mo Levi; I te pui i te saegala ko Iosefa, Peniamina, mo Tanu; I saute ko Simeona, Isakala, mo Sepulona. I te togala ko Kato, Asela, mo Nafatali.

35A te loa katoa o te pui i feitu katoa e fa o te fa'kai e iva afe mita. A te igoa o te fa'kai mai i te taimi nei ko, “Te Aliki Tenei I Konei!”