IOPU 30 - Tuvalu Revised Bible

1A tagata kola e foliki atu i a au e fakalili ne latou a au!

A olotou tamana ne tagata e seai ne aoga,

Tena te mea ne seki tuku ne au ke fesoasoani ki aku kuli i te tausiga o mamoe.

2A latou ne tagata ko se aoga valevale, ko to vaivai seai se lotou mea e mafai o fai mo oku.

3Ko oko eiloa latou i te mativa kae fia'kai, tela ko gau fua ne latou a aka malo i te po, i vao i koga masei.

4E unu ne latou a lakau o te toafa kae kai ne latou,

Ke oko foki eiloa ki aka o te lakau ko te pulumu,

Tela e seai sena gali i te kai.

5E pakalaga atu a tino katoa ki a latou o afuli ke tele,

E pela eiloa me pakalaga ki tino kaisoa.

6Ko seai ne koga e nofo ei latou, na ko ana eiloa,

I pūga kola e keli i kaokao o kaupapa.

7E kalaga latou pela me ne manu kae fakaputuputu fakatasi i lalo o lakau.

8A latou ne tino seai ne aoga kae seai ne igoa!

A latou ne afuli keatea mai te fenua.

9Nei, ko o'mai latou o kata fakatauemu mai ki a au;

Au ko pela fua me se mea faifa'kata a latou.

10E fai fakamasei ne latou a au; e mafaufau latou pela i a au e se fetaui mo latou,

Latou ko te lei ka ko au se tino se aoga fua.

E o'mai foki eiloa o puapuaki mai oku mata.

11Ona ko au ne fai ne te Atua ke vaivai kae se aoga,

Tena ko o'mai ei latou mo olotou kaitaua o fai fakamasei a au.

12A te potukau kona ko faitaua mai ki a au; ko afuli ne latou a au;

Ko fakatoka te toe tauaga a latou ki a au.

13E pono ne latou te auala e sao ei au, kae taumafai o tamate au;

Ko seai se tino ke fakagata ne ia te lotou mea tena e fai.

14E sao mai latou ki loto i toku olo;

E ta ne latou au i te taimi e takavale ei au.

15Au ko oko eiloa i te mataku; a toku toa ko seai,

Pela fua me se laumatagi; a toku maumea foki ko galo atu pela me se kaumana.

16Au nei ko pili o mate; e seai eiloa se lei o toku fi'ta.

17I te po, a oku ivi e mae katoa; a toku mae e se mafai o gata.

18A te Atua e puke mai ki te kola o toku gatu,

Kae mio ne ia oku gatu ke mafuli fakaatea.

19E 'pei ne ia au ki lalo i te pelapela; au ko pau fua mo te pefu.

20Te Atua, au ne kalaga sale atu ki a koe, kae ne seki tali mai eiloa koe;

I te taimi e talo ei au, ka ko koe e se saga mai lele eiloa.

21Au ko fai fakamasei ne koe; ko fakasaua ne koe a au i tou mana katoatoa.

22Ne tuku ne koe au ke agi keatea ne te matagi;

E luelue ne koe au i te kautaufa malosi.

23E iloa ne au, i a au ko ave ne koe ki toku mate,

Ki te ikuga tela e oko ki ei a tino katoa.

24Ai a e ta ei ne koe te tagata ko se aoga,

Te tagata ko se mafai ne ia o fai se mea, na ko te akai fua?

25E a, ne seki tagi fanoanoa au fakatasi mo tino ko maua ne puapuaga,

Kae alofa foki au i a latou kola e mativa?

26Au ne fakamoemoe ke maua te fiafia mo te mainaga,

Kae ko te puapuaga fua mo te pouliga ne oko mai.

27Au ko oko eiloa i te mae kae i aso takitasi,

E gasolosolo ake foki eiloa toku fita mo te puapuaga.

28Au e fanofano sale eiloa mo te fanoanoa,

E seai eiloa se mata fiafia;

E tu au i mua o tino kae fakamolemole ke maua soku fesoasoani.

29A toku leo ko oko eiloa i te fakaalofalofa,

E pela mo te leo o te manu ko te tiakolo mo te manu ko te ositelite.

30A toku pakili ko lanu uli; au ko tai ka i te vela o te fiva.

31Ne masani lagona ne au i konei a pese o te fiafia,

Nei ko te tagi fanoanoa fua tenei e lagona ne au.