ESOTO 11 - Tuvalu Revised Bible

Ko Folafola atu ne Mose te Tamatega o Toekimua

1Ne fai mai te Aliki ki a Mose, “Toe tasi eiloa te fakasalaga ka fakaoko ne au ki te tupu o Aikupito mo tena fenua. Ka oti aka ko te mea eiloa ko talia mai ne ia ke olo koutou. Ka ko te tonuga, ka afuli ne ia koutou katoa keatea mai tena fenua.

2Fano nei o fai ki tino Isalaelu ke olo latou katoa o akai atu ki olotou tuakoi ki ne mea e faite ki aulo mo siliva.”

3Ko oti ne fai ne te Aliki te kau Aikupito ke a'lofa ki tino Isalaelu. A mafaufauga o tino maluga mo tino katoa o Aikupito i a Mose se tagata maluga eiloa.

4Ne fanatu a Mose ki te tupu kae fai atu penei, “Te Aliki ne fai mai penei, ‘I te valuapo ka fano au i loto i Aikupito,

5ka ko toekimua tagata katoa o Aikupito ka mate; e kamata mai i tama tagata a te tupu, tela ko ia ko te suitupu, ke oko eiloa ki te tama tagata a te pologa fafine tela e solo saito. A toekimua foki a pulumakau ka 'mate.

6Ka 'tagi paka'laga valevale a tino i luga i Aikupito katoa, ko te taimi muamua foki eiloa tenei ka lagona atu a tino ke 'tagi penei, kae kaati se toe lagona foki te vaega tagi penei i aso fakamuli.

7Kae ka seai eiloa se mea ka tupu ki tino Isalaelu; seai foki se kuli ka lagona atu ke tagi ki tino Isalaelu io me ki olotou manu. Tena, ka iloa ei ne koe i a au, te Aliki, e faka'kese ne au a tino Aikupito mo tino Isalaelu.’ ”

8Ne fakaoti atu a pati a Mose penei, “Ou tino maluga katoa ka o'mai ki a au o ifo i oku mua, kae ka fakamolemole mai ke na ave keatea oku tino katoa. Ka oti aka ko fano ei au.” Ne fano keatea Mose mai te tupu mo tena kaitaua lasi.

9Ko oti ne faipati te Aliki ki a Mose penei, “Ka tumau eiloa te se fakalogo o te tupu ki a koe, ko te mea ke fai ne au a vavega e uke i Aikupito.”

10Ne fai ne Mose mo Alona a vavega katoa konei i mua o te tupu, kae ne fai ne te Aliki ke makeke te loto o te tupu, tela ne seki talia eiloa ne ia a tino Isalaelu ke olo keatea mai tena fenua.