FAATAOTO 22 - Tuvalu Revised Bible

1Kafai e tuku mai ke filifili koe me ko koe e manako ki koloa io me ko tou igoa ke takulei, e tau o fili ne koe te takulei o tou igoa.

2E tasi te mea e pau ei a tino mativa mo tino maumea, me ne faite katoa ne te Aliki.

3A tino poto e lavea mao ne latou a fakalavelave, tela la, e fakamao keatea mai i ei, ka ko te tino se mafaufau e fano tonu eiloa ki koga e tupu ei fakalavelave, kae fakamuli ko salamo ei a ia.

4Fakalogo ki te Aliki, kae loto maulalo, kae ka maua ne koe te maumea, te fakaaloalogina mo te ola leva.

5Kafai koe e alofa ki tou ola, taumafai o fakamao keatea mai i malei kola e lave i ei a tino amio masei i te auala.

6Akoako atu ki te tamaliki te mea e tau o fai ne ia e ola ei a ia, kae ka masaua faeloa ne ia i tena olaga katoa.

7A tino mativa ko pologa a tino maumea. Kafai e kaitalafu ne koe ne tupe mai i se tino, ko tena uiga a koe ko pologa i te tino ne kaitalafu koe i ei.

8Kafai e toki ne koe te fuataga o te masei, kae ka fua mai i ei a puapuaga, ka gata foki tau pule i tino kola ne pule sale ne koe.

9Alofa ki tino mativa o tufa atu au meakai ki a latou. Ka maua ne koe se fakamanuiaga ona ko tau mea tena ne fai.

10Ave keatea te tino valea, kae ka se toe ai ne kinauga e fai.

11Kafai e fiafia koe ki te loto ma mo te faipati ki muna lei, kae ka fai koe mo taugasoa o te tupu.

12A te Aliki e tausisi ki te muna tonu ke fakatumau, tela la, e fakaseaoga faeloa ne ia a muna a tino gutu pelo.

13A te tagata paie e nofo eiloa i tena fale; ana muna i a ia e mataku ma fano ki tua i a ia ma po ne te leona.

14A te mulilua se malei, e lave i ei a tino kola e ita ki ei te Aliki.

15A te uiga o tamaliki, e fai ne latou a uiga valea, tela la, e tau o kini ke lei ei olotou amioga.

16Kafai e fai ne au meaalofa ki tino maumea, io me e fakafita ne koe a tino mativa ko koe ke maumea, e iku eiloa koe ki te mativa.

Ko Faataoto e Tolusefulu

17Fakalogo mai, ka akoako ne au koe ki muna a tagata poto. Tauloto olotou akoakoga,

18kae ka fiafia koe manafai e masaua ne koe, ko te mea ke mafai o fakaaoga sale ne koe.

19Au e manako ke tuku atu tou loto katoa ki te Aliki; tena te pogai ka fakaasi atu ei ne au a faataoto konei ki a koe.

20E tolusefulu faataoto konei ko oti ne tusi ne au mo koe. Ne poto e tau o iloa ne koe, ne manatu fakatonutonu foki e tau o tauloto ne koe.

21Ka fakaasi atu foki ki a koe a te uiga tonu o te muna tonu. Tena la, kafai e uga koe ne se tino ke fano o sala te muna tonu, kae ka foki mai eiloa koe mo te tali tela e tonu katoatoa.

1

22Sa fai ne koe se mea se lei ki tino mativa; sa fai ne koe se mea masei ki tino kola ko se maua se lotou fesoasoani i te fono tulafono.

23A te Aliki e kau i a latou o taumafai o fakasao latou, kae e se fiafia ki tino kola e olo o fakamatakutaku latou.

2

24Sa takaga ki tino mata itaita,

25i te mea ma faigata i a koe o tiaki te uiga tena.

3

26Sa tauto ke togi ne koe te kaitalafu a te sua tino.

27Kafai e se maua ne koe o togi, ko tena uiga, a tou moega e ave foki ne latou.

4

28Ke mo a eiloa e fakagasue ne koe te tuakoi tela ne fakatakato ne ou tupuga.

5

29Fakaasi mai se tino e fai ne ia se galuega lei, kae ka fakaasi atu ne au te tagata tela e lei atu i te tokoukega o tino kae e tau o nofo i tafa o tupu.