SALAMO 102 - Tuvalu Revised Bible

Ko te 'Talo a te Tamataene Puapuagatia

1Te Aliki, fakalogologo mai ki taku 'talo,

Kae ke lagona mai ne koe taku kalaga atu mō se fesoasoani!

2Sa fulitua mai ki a au i taimi e puapuagatia ei au!

Fakalogo mai ki a au,

Kae tali fakavave mai ki a au i taimi e kalaga atu ei au.

3A toku olaga ko matafi atu fua e pela mo se au o te afi;

Mo toku foitino e 'ka e pela me se afi;

4Au ko pela me se mouku ko magemage;

Ko galo foki toku manako ki meakai.

5Au ko manava fita;

Ka ko toku foitino, na ko pakili fua mo ivi.

6Au ko pau me se manu eva o te vao i te toafa,

E pela foki me se lulu e nofo i koga ne fakamasei.

7Au e moe alaala;

Au e pela me se manu e tu tokotasi i luga i te tuafale.

8A oku fili e fai muna ma'sei mai ki a au i te aso katoa;

Mo latou kola e fakatauemu mai ki a au e fetū

Ne latou a tino ki toku igoa.

9-10Ona ko tou ita mo tou kaitaua,

ko fai ei a lefu mo aku meakai,

Ka ko taku meainu e palu mo oku loimata.

Ne puke ake ne koe au kae 'pei keatea.

11A toku olaga e fakatusa ki te malu afiafi;

E pela au mo mouku mage'mage.

12Ka ko koe te Aliki, ko te tupu ki te se gata mai;

E masaua koe ne kautama katoa.

13Ka tu ake koe kae alofa atu ki Siona;

Ko oko mai te taimi e alofa ei koe ki a ia;

Ko te taimi tonu eiloa tenei.

14E ui eiloa a ia ko oti ne fakamaseigina,

Ka ko au tavini e mau eiloa te lotou alofa ki a ia;

E ui eiloa a ia ko malepelepe valevale,

Kae a'lofa eiloa latou ki a ia.

15A malo ka ma'taku ki te Aliki;

A tupu katoa o te lalolagi e ma'taku i tena mana.

16Kafai e toe ati ake ne te Aliki a Siona,

Ka fakaasi atu ne ia a tena sili.

17Ka lagona ne ia te kalaga a ona tino mativa,

Kae ka fakalogo a ia ki olotou 'talo.

18Fakamau ki lalo i tusi a mea ne fai ne te Aliki,

Ko te mea ke iloa ne kautama fakamuli,

Mo tino kola e seki fa'nau mai;

Ke tavae atu latou ki a ia.

19A te Aliki ne onoono ifo mai tena nofoga tapu kae maluga,

Ne kilokilo ifo a ia mai te lagi ki te lalolagi.

20Ne lagona ne ia te tagi fita o pagota,

Kae ne fakasaoloto ne ia latou kola ne fakasala ki te mate.

21Tela la, ka folafola atu ne tino te igoa o te Aliki i Siona,

Ka fakafetai atu foki latou ki a ia i Ielusalema

22i taimi e fakatasi ei a malo mo fenua o tapuaki atu ki te Aliki!

23Ne fai au ne te Aliki ke vaivai ka koi foliki faeloa au;

Ne fakatoetoe ne ia toku ola.

24Te Atua, sa avegina au keatea nei, i a au seki matua.

Te Aliki, a koe e ola ki te se gata mai;

25 Epe 1.10-12 Ne faite ne koe te lalolagi i aso taumua eiloa,

Ko ou lima foki ne fai ei ne koe a lagi!

26Ka 'galo atu katoa latou, ka ko koe e tumau faeloa;

Ka ma'tafi atu foki latou e pela me ne laugatu,

Ka pei keatea ne koe latou e pela me ne gatu,

Kae ka 'galo latou.

27Ka ko koe e tumau faeloa, a tou ola foki e seai se gata mai.

28A omotou fanau ka ola i te olaga manuia,

Mo olotou mokopuna ka ola faeloa i lalo o tau puipuiga.